Read lango Mika 1 Bible Online

Mika 1 - lango bible

Mika 1

¹Man en kop ame rik Rwot onyuto baŋ Mika ame obedo dano me Morecet, ame en onyutte i kom Camaria kede i kom Jerucalem, i kare a Yocam, Akaj, kede Kejekia, ame gin luŋ obedo obakki me Juda,

²Wun rok ducu winy wunu ba, ter yiti ba, yin lobo kede ginnoro luŋ iye; me Rwot Obaŋa bed caden i komwu, kun en Rwot gire ko bo i ode acil.

³Pien nen wunu ba, Rwot tye a ya oko i kabedo mere, en abino piny te wowota i wi kiddi ame tye i wi lobo.

⁴Kiddi bi no meye oko i kan a en onyono, kun luŋ daŋ babara oko, calo odok kic ame tye i ŋet mac, calo pii ame corre piny kun ya i wi tur malo

⁵Man luŋ timere pien Yakobo okalo wi cik oko, kede pi bal a jo me Icrael. Yakobo okalo wi cik i yore aŋo? Mom Camaria en a nyuto? Kara jo me ot a Juda otimo bal aŋo? Mom Jerucalem en a nyuto?

⁶Mannono bino miyo aloko Camaria doko wi obur i dye tim kan ame opito iye olok; kiddi iye luŋ abino onyo oko piny i luŋ, ate miyo acakki me tere bedo wie nono.

⁷Cal apaa me re luŋ obino ŋiŋido oko, ginnoro luŋ ame en omio onwoŋo obino waŋo i mac, abino daŋ babalo cal jogi mere luŋ; pien ocokogi i kom timo tim me alaya, abino dwokogi daŋ cen iyi ocara me timo tim me alaya.

⁸Man bino miya akumo, ate kok; abino wot i tyena nono, kun awoto onoro; abino kok calo ekwe, abino kumo calo udo.

⁹Pien wan ret a Camaria mom twero caŋ; otuno daŋ gire oko i Juda, tye kom doŋ i dogcel a jona, naka i Jerucalem.

¹⁰Kur itit wunu pire i Gat, kur daŋ ikok wunu; wot iŋenne wunu iyi apua wun jo Bet-le-apra,

¹¹Kat wunu anyim, wun jo me Capir, kun it ye wunu onoro ame lewic makowu; aco wun jo me Janan, kur idony wunu oko; koko ame tye ka winyere i Bet-ejel nyuto ni ka-larrewu mom dok twero nwoŋere kuno.

¹²Jo ame bedo i Marot tye akuro gin aber kun oparo meicel, pien gin arac doŋ obino piny kun oya i baŋ Rwot otuno naka i dogcel me Jerucalem.

¹³Twe wunu aguragurawu i kom gadigadi lweny, wun jo me Lakic; wun en ame rik icako wunu kelo bal i kom jo me Cion, pien bal a jo Icrael gin rik ogeo neno i baŋwu.

¹⁴Pi mannono ba, wun en ame ibino miyo wunu mot me pokere i welewu me Morecetgat; udi me Akjib bino bedo gin a bwolo jo baŋ obakki me Icrael.

¹⁵Aco wun jo ame bedo i Mareca, abino dok kelo dano ame bi no loyowu; jo ame yam kela kwogo baŋ jo Icrael bino wot oko i Adullam.

¹⁶Cid wunu yer wiwu oko, me bed otal pi itinowu ame yomoro cunywu; mi wiwu tal calo me acut, pien gin bino ya oko i banwu obino terogi oko iyi opii.