Read lango Mika 5 Bible Online

Mika 5 - lango bible

Mika 5

¹Aman doŋ omio cel ogurowa oko dyere, okwor doŋ ogurowa oko, gin doŋ ocako bapo lem aloc me Icrael oko.

²Ento yin Beterekem Eprata, yin ititidi moro me bedo i akina pacci a jo Juda, cite dano ame bino bedo aloc a jo Icrael bi no ya i bani kannono pira, dano ame bi no mere ocako winyere con meicel.

³Mannono omio Rwot koŋ bino jalowu ata tuno ka kare oromo, tuno ka nyako ame rem me nywal ogoo doŋ onywal oko; omego mere en aloc odoŋ luŋ te doŋ dwogo oko baŋ jo Icrael.

⁴En bino cun i tek a Rwot kun kwayo rommi mere, kede kwogo adwoŋ meicel ame ya i baŋ Rwot Obaŋa mere. Gin doŋ bino bedo i kuc, pren aman en doŋ bino bedo adwoŋ meicel naka i agikki me lobo.

⁵Pien dano-nono bi no kelo kuc. Kare ame jo Acuria bino bino lobowa, kare ame tyengi bino nyono lobowa, wan obino cwayo okwat abiro me lweny i komgi, kun odone aboro en ame telo lwak:

⁶gin bino loyo lobo me Acuria i pala lweny, kede lobo me Nimulodi i pala lweny ame owoto doŋ oko iyi akure; gin bino larowa oko i cin jo Acuria kare ame gin obino i lobowa kare ame tyengi bi no nyono lobowa.

⁷Icennere jo a Yakobo odoŋŋere bino bedo i akina rok apol apola, ame calo toyo ame oya i baŋ Rwot, ame calo kot ame oŋido i kom lum, ame mom kuro jo kadi acel, mom daŋ gire kuro itino a dano.

⁸Eka jo a Yakobo odoŋŋere te bedo i akina rok apapat, ame calo eŋatu iyi akina leyi ame tye i buŋ, acalo atin eŋatu i akina rommi ocokere; ame ka obeo i akinagi nyonogi piny, kikilogi atitino, kun ŋattoro a larogi mom tye.

⁹Ibino ti ŋo ciŋi malo i kom okworri, jo ame dagi luŋ ibino tyekogi oko,

¹⁰Dok daŋ i nino-naca abino miyo aguragura rwenyo oko i akinawu, gadigadi lwenywu daŋ abino tyeko oko, Rwot okobo.

¹¹Boma luŋ ame tye i lobowu abino miyo rwenyo oko, ka ponowu luŋ ame tek daŋ abino mumuko oko,

¹²Tic me emuroko daŋ abino kwanyo oko i ciŋwu, ajoka moro mom dok bino nen i lobowu;

¹³cal apaa daŋ abino miyo rwenyo oko, kede kiddi luŋ ame icibo wunu me awora mom dok ibino medde wunu ryebere piny i nyim gin ame ciŋwu en otio.

¹⁴Abino puto yen Acerawu oko i akinawu, abino daŋ babalo bomawu luŋ,

¹⁵Dok daŋ abino culo kwor i twon akemo kede iniga, kom rok luŋ ame rik mom owinyo koppa.