Read lango Mika 7 Bible Online

Mika 7 - lango bible

Mika 7

¹Aneno can doi! Pien doŋ acalo bala kare ame doŋ otyeko coko nyig yen me oro oko, ame doŋ otyeko dedepo nyig olok oko, ame nyige moro me acama doŋ mom, nyig oduro moro a cunya mito ogeo cek doŋ mom.

²Jo ame woro Obaŋa doŋ oto luŋ i lobo, ŋattoro ame cunye ler mom gire tye, Jo luŋ maro ka libo owotegi me aneka, inwoŋo ŋat acel acel tye adwaro ominnere kede boo.

³Gin luŋ odiro meicel i timo gin arac; aco oloc kede oŋolkop, gin luŋ okwao ka lim me wilogi i muŋ. Twon lo adiro iloko tam a jo, tittigi ka tam arac ame tye i cunye; eka gin doŋ te yiko,

⁴Ŋat ame aber i akinagi, calo ocokocok, aco ŋat a cunye ler i akinagi, calo okuto ame ocelo i poto. Nino ame okur pinygi yam orabo pire, nino me keto can i komgi doŋ otuno gire oko, aman daŋ kare me babaŋogi ceggi acega.

⁵Kur iket genni i kom awoti, kur daŋ ibed kede gennoro i kom dyeri, myero igwok kop ame ya i dogi, naka baŋ ceggi ame inywako wunu kede kabuto;

⁶pien awo bi mom gire keto kwogo i kom pappere nyako daŋ pyem apyema tottere, eka ci-wod te pyem i tattere, okwor a dano gire obedo jo me paco mere.

⁷Cite an gira abino neno Rwot, abino gira kuro Obaŋa ame lara, Obaŋana bino gire winyo koppa.

⁸Kur ilel i koma ba, yin akworra; ka ee arette, abino dok ya; ka ee abedo kan acol, Rwot en ame bino bedo cen ame menya.

⁹Abino gira kanyo ake mo a Rwot, pien an atimo bal i nyime, tuno waŋ ame apido koppa, ame en doŋ omia aloo kop, En doŋ te kela oko kannaler; ate doŋ neno lar mere.

¹⁰Akworra daŋ bi no neno, lewic bino mako dako ame onwoŋo penya ni, “Kara ane en Rwot Obaŋaninono?” Abino ne ne kede waŋa ka otye ka nyone piny, acalo coto ame tye i dye yo.

¹¹Nino me gero cel me Jerucalem tye abino, I nino-naca obino jero waŋ lobo teŋe.

¹²Jo bi no bino baŋwu i nino-naca, kun oya i Acuria, anaka i Miciri, ote ya i Miciri anaka i kulo Efurate, dok ote ya i nam naka i nam, kede i kidi naka i kidi,

¹³Cite wi lobo luŋ gire bino doko wi obur pi jo ame bedo iye, pi gin arac ame gin oti mo.

¹⁴Kwa joni kede lutti, ame gin obedo rommini ame opokki me bedo megi, ame bedo kengi i bun, i dye lobo ame opuro iye cam; kwagi i Bacan kede i Gilead, bala kite a rik koŋ timere kede con.

¹⁵Bala kare ame rik iya wunu i Miciri, abino nyuttiwu gigi mogo me awura,

¹⁶Orok bino ne no lewic te makogi, i kom twergi luŋ; gin bino wumo doggi oko kede ciŋgi, yitgi daŋ bi no din gire oko;

¹⁷gin bi no cako moko apua calo twol, acalo leyi ame mol amola i lobo; gin bino bino ame komgi amyel amyela, kun nwoŋo oya i ka-ponogi atek, gin bino cako bedo i twon lworo adwoŋ meicel, i kom Rwot Obaŋawa, gin bino bedo kede lworo piri.

¹⁸Ŋa kara ame dok obedo Obaŋa calo yin, ame timo kica baŋ jo me re odoŋ i kom rocgi? Yin giri mom ikano akemo i cunyi nakanaka, pien cunyi giri yom i mar a mom lokere.

¹⁹Kica gire bino dok maki i komwa, eka ite nyono balwa i te tyeni piny. Yin giri ibino dwiro balwa luŋ piny i te kut me nam.

²⁰Yin dok ibino nyuto genni kom Yakobo, kede mar a mom lokere kom Iburaim, kite ame rik ikwoŋo kede baŋ kwariwa i kare okato.