Read lango Nakum 3 Bible Online

Nakum 3 - lango bible

Nakum 3

¹Boma ame onyo remo bi no neno can, ame opoŋ iye go ba kede jami ayaka; ame mom giko tim me yak.

²Koŋ iwiny wunu kite ame abiro cot kede! Kite ame okot me gadigadi mor kede, winyu pye aguragura, kede ŋwec a gadigadi lweny.

³Nen koŋ kite ame wegi aguragura aŋwec kede ame pala romogi tye ameny ipilpil kede toŋŋigi ame aryeny aryenya! Lwak jo oneko tye oyido ibim ame komgi tye oradde atata! Jo tye ata amedde ameda ame jo doŋ tye agatte agata komgi!

⁴Man atimere pi tarwan a Nineve, dako ame alaya, ame yomoro cuny jo i timere me jojok, ame tye ka rwenyo rok apol pi timere me alaya, kun rwenyogi i timere me jojok.

⁵Rwot me mony oko bo ni, “Nen ba, an doŋ at ye ame atiki, abino elo boŋo i pyeri abolo i wi malo; abino miyo orok neni kun it ye onoro, ibino bedo kede lewic kun gin luŋ oneno,

⁶Abino juko komi i gigi mogo me kwer, abino timo tim me acaye i komi, abino miyo idoko gin ame yi jo okwero,

⁷Jo luŋ ame bino neni obino ŋwec oko kun okobo ni, Nineve doŋ odon yie nono, na kara ame bino koke? Abino kara nwono jo me kweyo cunye kwene ba?”

⁸Yin iber ikato Tebe ame rik obedo i ŋet Nail ame pii onwoŋo oguro dyere kun gwoke calo cellere?

⁹Teko mere ame ka gikere mom, rik ocuŋ i kom Eciopia kede Miciri; Put kede Libfa daŋ rik okonye.

¹⁰Kadi amannono, rik obin otero oko, obin otero oko iyi opii itino mere rik ote ŋiŋinyo oko atitino iyi agikki wanayo luŋ; obin obolo kwir pi jo mere me awora, jo mere adono luŋ ote tweyo kede nyor.

¹¹Yin daŋ ibino mer; ibino daŋ bedo ababaŋ, ibino yenyo yo me larre ciŋ okworri.

¹²Celli luŋ bino bedo calo oduro ame nyige pwod ogeo cek aceka, ame ka oyeŋo nyige ony piny i dog jo ame camo.

¹³Nen ba, jo me lwennyi luŋ calo mony baŋi, dogcel me loboni oyabo alac pi okwori; mac daŋ doŋ onaŋo lodi me dogcelli oko.

¹⁴Twom pii, pien okwor bino guro oko, yik celli bed atek; dony iburlobome inyon lobo, mak bao me goyo matafali!

¹⁵Mac bi no jweri oko kuno, pala lweny bino nolli oko, bino iweri calo bonyo. Nya imedde giri calo bonyo, nya imedde ameda calo ocene!

¹⁶Imedo doŋ ocat-willi odoko apol, ame kato acer i polo oko. Bonyo yaro bwome te twarre gire oko.

¹⁷Olocci pol calo ocene, odoneni pol calo lwak bonyo apipim ame tye aony i wi cel i kare me koyo; ka cen odonyo gin te twarre wot gigi oko, mom tye ŋattoro ame ŋeo kan a gin tye iye.

¹⁸Yin abaka me Acuriaokwatti be onino oko, joni ame oworo daŋ owe gigi oko. Joni tye olal atata i wi kiddi, kun ŋattoro acokogi karacel mom tye.

¹⁹Kan owano i komi mom twero can, waŋ bur i komi doŋ odet atek. Jo luŋ ame winyo kop ikomi obapo ciŋgi i wit. Ŋa kara ame timmi arac me kare luŋŋono mom ogudo kome?