Read lango Abakuk 1 Bible Online

Abakuk 1 - lango bible

Abakuk 1

¹Man en kop a pire dit ame rik Obaŋa onyuto baŋ Abakuk, Ama Rwot, abino kara kok baŋi pi kare a rom mene kun mom iwinyo kokona?

²Onyo abino kok baŋi pi tim me byemi naka awene kun mom ilara?

³Piŋo kara imia aneno gin arac, kun daŋ aneno kit ame jo neno kede can? Tim me nek kede byemi en ame odurre i nyima, da kede lweny timere kare luŋ,

⁴Cik doŋ odoko gire agoro oko, ŋolo kop mom doŋ tye atira, Pien jo areco guro jo a kitegi atira i dyere, ŋolo kop atira doŋ te dwalle oko.

⁵Koŋ iŋiŋio wunu i akina orok, me inen wunu; wur wunu atek meicel. Pien at ye ka tiyo tic i karewu ame mom itwero ye wunu ka otittiwu,

⁶Pien nen, at ye ka tugo jo Kaldaya, ame gin obedo rok ager dok a komgi mit atek, rok ame dorre ŋolo twon kobo alac-ci aria, me mayo kan a mom megi.

⁷Gin onyo koyo i kom jo, dok nenogi iyiliyili meicel, gin oŋolo kop kun olubo tamgi kengi,

⁸Aguraguragi dwir kato kwac oko, dok daŋ oger okato epet me dyewor oko; wegi aguraguragi ŋweco kato akata kun owakere gigi awaka, Wegi aguraguragi nwoŋo oya i kannabor meicel, otwarre gigi i ŋwec calo cur ame amwomere me mako gi-acama mere,

⁹Gin luŋ obino me yenyo kolo, Iworo ca ko mako jo i nyimgi kun gin mom ru otuno, Jo mere coko opii bala acoko kwoyo,

¹⁰Oŋalo obakki aŋala, kun daŋ ocao olocgi acaa, Ka oneno cel me boma onyero anyera, pien gin oyido lobo karacel ote mayo boma oko.

¹¹Gin okato gigi oyotoyot calo yamo gin obedo jo areco ame tek komgi en obedo obaŋagi.

¹²Ama Rwot Obaŋana, ame yin ŋat Acil, mom yin giri ibedo tye geye con i con? Wan gire mom obino to, Ama Rwot, yin gire ame iketogi me keto can i komwa yin gire ame imokogi me twenyowa, ama Agwokwa.

¹³Yin giri waŋi cil meicel ame mom iromo kanyo gin arac, dok daŋ mom itwero kanyo tim a mom tye kakare. Piŋo kara yin ibedo neno jo a mom ogen anena, aco kono jo areco tye amwonyo jo abeco, ame kitegi atira katogi kun yin iliŋ giri aliŋa?

¹⁴Pien yin iketo dano acalo rec me nam, acalo gin ame lak alaka ame mom i ŋat a loogi.

¹⁵Jo bedo yutogi oko i golo, owaogi oko kede bwo, ocokogi iyi bwogi; eka ote bedo ŋatte gigi yomcuny.

¹⁶Gin oyalo obwogi, kun owaŋŋigi gin aŋwece kur calo obaŋagi; pien gin en ame omiogi otye aber, dok gin en ame omiogi odoko twon olonyo meicel.

¹⁷Gin myero medde ameda iwoto pala lwenygi, kun oneko kede oroko abono kica moro i cunygi?