Read lango Abakuk 3 Bible Online

Abakuk 3 - lango bible

Abakuk 3

¹Man en kwac adwarpiny Abakuk i dwon wer ame olwono ni Cigionot, en okwao Obaŋa kun kobo ni,

²Ama Rwot, doŋ at ye ko winyo kop i komi, dok daŋ an alworo ticci meicel. Dok imed tiyo ticci-nono i dye mwakki; mi jo ŋe i dye mwakki; po daŋ pi kica ka akemo omaki.

³Obaŋa oya i Teman i Edom, Ŋat acil oya i wi kidi me Paran. Kwogo mere owumo polo oko, dok daŋ onwoŋo opake i wi lobo ducu.

⁴Kwogo mere onwoŋo memenya acil meicel lero mere onwoŋo ya i cine, en kan ame okano iye teko mere.

⁵En ocwao two otelo nyime, omio too edeke olubo yore.

⁶Ka en ocuŋ, lobo yenere, ka en oneno jo, kom rok luŋ myel; turrogo ame onwoŋo operakino te ŋiŋida oko, tude mo go ame ori nakanaka, rwobere oko piny. Mannono kan ame yam en maro wot iye.

⁷Ate neno jo Kucan ame bedo i kemagi tye aneno can, bomji me icene a jo Midian te daŋ yeŋere,

⁸Akemo rik onwoŋo omaki i kom kulli bo, ama Rwot? Akemo rik onwoŋo omaki i kom kulli bo, iniga onwoŋo omaki i kom nam bo, kare ame onwoŋo irino aguragurani, i wi gadigadini me loc?

⁹Iyiko doŋ akud ateroni oko, atero mere daŋ doŋ iketo oko kom tol. Imio pii i kulli opoko lobo oko.

¹⁰Kiddi onenni te ero yeyena oko, twon pii moro ager meicel te mol, kato; pii atut a tye i te lobo te mor oko, bwo mere te yenyo malo amala.

¹¹Ceŋ kede dwe te lirakino kakargi, i kare ame lero me ateroni kato i kare ame toŋŋi meny ipilpil.

¹²Yin onwoŋo ibeo i dye lobo twon akemo, ijejebo rok luŋ piny i te tyeni i twon iniga.

¹³Yin onwoŋo iwoto me wot laro joni, me laro danoni ame iyero. Yin onwoŋo ininyo atel wii obalo oko, kun iweko kome doŋ nono cakere i eme naka i ŋute.

¹⁴Iwawano wi olwennyere kede atero, ame rik onwoŋo obino calo yamo ajuru, me keketo an oko, kun olelo gigi calo jo ame mito tyeko ocan i muŋ,

¹⁵Yin giri rik ibeo i dye nam aguragurani ame pii mere onwoŋo opoŋ kun amol ager meicel.

¹⁶Awinyo mannono luŋ koma te myel, del doga daŋ te myel pi winyo dwone; cogona daŋ te cako bedo bala gin ame atotopa oko, kun tyena twomere kengi kengi. Abino bedo mot kun akuro nino me can, ame bi no poto i kom jo ame bino me lweny i komwa.

¹⁷Kadi oduro mom cak turo, dok akadi olok daŋ mom nyak nyiggi, ginnoro daŋ mom nwoŋere i kom jeituni, kun potti daŋ mom oceko cam, rommi daŋ tum oko iyi anok, kun dyannoro daŋ mom iyi awi,

¹⁸an gira pwod abino lelo i Rwot, cunya pwod bino bedo ayom kom Obaŋana, Alarra.

¹⁹Rwot Obaŋa en tekona, en ame mio tyena bedo ayot calo tyen atil, en ame mio awoto malo i wi kiddi. Baŋ adwoŋ wer: me awera kede naŋa opuk-gu.