Read lango Jepania 1 Bible Online

Jepania 1 - lango bible

Jepania 1

¹Man en kop a Rwot ame rik obino baŋ Jepania wot a Kuci, wot a Gedalia, wot Amaria, wot a Kejekia i kare ame Yocia wot Amon onwoŋo abaka me Juda,

²“Abino jwero jami luŋ aluŋa, ame tye i wi lobo,” man kop a Rwot ikokome,

³“Abino jwero jo karacel kede leyi, abino jwero winy ame twarre malo, karacel kede rec ame bedo i namo Abino reto jo areco oko piny; abino tyeko jo oko i wi lobo”, man kop a Rwot ikokome.

⁴“Abino ryeyo ciŋa i kom Juda, kede i kom jo luŋ ame bedo Jerucalem; abino tyeko Baal odoŋ oko kabedo man, karacel kede nyiŋ olamdog me cal jogi; jo ame ryebere piny i wi ot malo,

⁵me woro mony me polo, jo ame ryebere piny te kwoŋ baŋ Rwot, aco kun dok okwoŋere i nyiŋ Milkom; karacel kede jo odok oko cen i lubo

⁶yo Rwot, jo a mom yenyo Rwot akadi penyo tammere,”

⁷Lin oko i nyim Rwot Obaŋa! Pien nino a Rwot doŋ ceggi acega; Rwot doŋ oyiko mot me aŋola oko, olonyo daŋ doŋ we le mere oko,

⁸I nino me miyo mot aŋola a Rwot, “Abino keto can i kom rwode kede itino aba ka, kede i kom jo ame ruko ruk a rok ocele.

⁹I nino-nono, abino keto can i kom jo luŋ, ame myelo kalo arii me doggola, karacel kede jo ame mio kolo kede goba dure i ot adwoijgi.”

¹⁰Rwot ikokome okobo ni, “I nino-nono koko bino winyere i Dogcel me Rec, aco duru bi no winyere i tun ocele me boma-nono, eka ginnoro te mor aloŋo meicel, kun ya i wi kidi malo.

¹¹Kuk wunu duru ba, wunu jo a bedo i boma-nono i tutuŋ pinnyere! Pien ocatwil luŋ doŋ otum oko, jo a pimo ryal luŋ doŋ otyeko oko,

¹²Kare ame abino yenyo Jerucalem kede tara, abino keto can i kom jo ame bedo mot, bala koŋo olok ame doŋ ocek oko te pye mot, jo ame kobo i cunygi ni, ‘Rwot mom bino timo gin aber, dok daŋ mom bino timo ginnoro arac.’

¹³Jamigi obino yako oko, udigi bino doŋ yigi nono; kadi oger udigi, mom obino bedo iye; kadi opit olokgi, mom obino mato koŋo mere.”

¹⁴Twon nino a Rwot adwoŋŋere doŋ ceggi acega, nino-nono tye abino oyotoyot; nino a Rwottono koppere kec, lo atek kok kuno i dwoŋ aloŋo.

¹⁵Nino-nono obedo nino me akemo, nino me can kede me rem, nino me rjininyo jami kede balo, nino ame piny bino wummere mutu acol icuc, nino me pol kede me colpiny.

¹⁶Nino me koko apel kede me wo me lweny, kom boma mogo ame ocecelo atek, kede i kom cellogo ame ogero abocoboco.

¹⁷Abino miyo jo neno can meicel, ame te miyogi wot calo otowaŋ, pien gin otimo bai i nyim Rwot; obino kikiro remogi calo apua, aco komgi obino bolo calo cet dyan,

¹⁸Ryalgi kede jabugi mom gire bino larogi, i nino me akemo a Rwot. Mac me akemo me nyeko mere, bino waŋo wi lobo luŋ; bino miyo agikki bino me oyot, i kom jo luŋ ame bedo i lobo.