Read lango Jepania 3 Bible Online

Jepania 3 - lango bible

Jepania 3

¹Boma ame jem, ame oballe oko, dok ame buro jo, bino neno can!

²En mom winyo kop a ŋattoro, ka ojuko, mom daŋ ye, En gire mom geno Rwot, mom daŋ noko Obaŋa me re aceggi.

³Rwode luŋ iye, obedo eŋatu ame mor: oŋolkoppege luŋ, gin epet dyewor: ame mom oweko ginnoro doŋ naka odiko. Aco odwarpinnyege, obedo jo a konygi mom,

⁴gin mom odwarpiny ikokome; olamdoggege obedo jo ame pyedo gin acil, otimo tim me byemi i kom cik.

⁵Rwot ame bedo iye kite atira, en gire mom timo ginnoro arac; odiko ducu en nyuto kite a en ŋolo kede kop atira; en mom ken kadi acelloro, ento jo areco kwia gigi lewic.

⁶“Atyeko doŋ jwero rok apol oko, celgi atek luŋ doŋ odoko wi obur; gudogi luŋ daŋ doŋ amio odoŋ nono, aboŋo jo moro ame woto iye; bomagi luŋ daŋ odoŋ nono, aboŋo ŋattoro ame bedo i yigi.

⁷Rik onwoŋo akobo ni, ‘Ateteni, en gire bino lwora, ka ajuko, en bino winyo doga; waŋe gire mom bino wumere, i kom kop luŋ ame acike iye.’ Ento gin gigi rik ote bedo medde ameda mitkom me balo ginnoro luŋ ame gin otio.”

⁸“Pi mannono, koŋ doŋ ikura wunu”, man kop a Rwot ikokome, “tuno i nino ame abino ya iye malo calo caden. Pien amoko doŋ tamma me coko rok luŋ, kede loc apapat karacel, me awuk akemona i komgi, kede lyeto luŋ me inigana; pien mac me akemo me nyekona, bino waŋo wi lobo luŋ.

⁹“I kare-naca, abino ŋolo kop a jo ducu, me gin kob kop atira, me gin luŋ olwoŋ nyiŋ Rwot, dok daŋ oti baŋe i cuny acel.

¹⁰I ŋe kulo me Eciopia luŋ, jo ame kelo kwacgi baŋa ya iye, ame gin jona ame oket atata, gin bino kelo mot baŋa.

¹¹“I nino-nono, mom dok abino miyowu lewic, pi timwu ame ijem wunu kede i koma, pien i kare-nono abino kwanyo i akinawu oko twoni jowu a yam ŋatte meicel, awakere, mom dok obino medo yon, i wi kidina acil,

¹²pien abino weko i akinawu, jo ame mwol, dok ame ocan. Gin bino yenyo ka larregi i nyiŋ Rwot,

¹³ame gin jo ame odoŋ iyi Icrael. Gin mom bino timo ginnoro arac, mom daŋ obino ko bo kopporo me goba, leb a rac a kobo kop me goba mom bi no bedo tye i doggi. Pien gin obino cem, ote buto gigi calo rommi, kun mom tye ŋattoro ame miogi lworo.”

¹⁴Wer giri i yomcuny, yin Cion; go ijira, yin Icrael. Lel giri, kun inatte meicel i cunyi ducu, yin nyako me Jerucalem.

¹⁵Rwot doŋ okwanyo kop a yam eŋolo i komi oko, en doŋ oryemo okworri oko, Abaka me Icrael, en Rwot, tye gire i akinawu; mom dok ibino medde lworo gin arac,

¹⁶I nino-nono, obino ko bo baŋ Jerucalem ni, “Kur ilwor ba, yin Cion; kur imi cini dok goro.

¹⁷Rwot Obaŋawu tye gire i akinawu, twon atek i lweny, ame mio oloo lweny, en bi no lelo i komi kun yie yom meicei, bino rocci idoko anyen pi marrere, bino ŋatte meicel i komi, kun wero i dwoŋ aloŋo, bala i nino me kwero ecuban.

¹⁸“Abino kwanyo can oko i komi, ame mio mom dok oyeti pire.

¹⁹Nen ba, i kare-nono abino tic i kom jo luŋ ame yam wuni. Abino laro jo oŋwalo, ate daŋ coko jo a yam oryemo oko, Abino loko lewicgi doko ginnoro me pak, nyiŋgi bino winyere i lobo luŋ.

²⁰I kare-nono abino kelowu paco, i kare ame abino cokowu karacel; abino miyo nyiŋwu rwo kun daŋ opakowu, i akina jo luŋ ame bedo i lobo, I kare ame abino dwokkiwu kucwu, kun ineno wunu kede waŋwu”, man kop a Rwot.