Read lango Aggai 1 Bible Online

Aggai 1 - lango bible

Aggai 1

¹I mwaka me aryo me loc abaka Dario, i nino dwe acel me dwe me abicel, kop a Rwot rik obino baŋ Aggai adwarpiny, me en kop baŋ Jerubabel wot a Cealtiel ame onwoŋo rik aloc a jo Juda kede baŋ Yocwa wot a Yekojadak, ame obedo alamdog adwoŋ, ni,

²“Rwot me mony okobo ni, ‘Rok man kobo ni kare mom ru oromo me dok gero ot a Rwot odoco.’ ”

³Kop a Rwot rik obino, kun mio Aggai adwarpiny en akobo, ni,

⁴“Man en kare a myero wun giwu ibed wunu i udiwu ame ogero wigi abeco kun ot man oballe oko?”

⁵Mannono omio Rwot me mony aman okobo ni. “Koŋ itam wunu kite ame ibedo wunu kede,

⁶Icoo wunu koti adwoŋ, ento ikaa wunu aduno; icamo wunu cite mom iyeŋ wunu; imato wunu, cite mom romowu, irukere wunu, cite mom tye ŋattoro ame kome bedo alyet; dok ŋat ame ca mo ocara, camo me aketa icao otutuca oko.”

⁷“Rwot me mony okobo ni, koŋ itam wunu kile ame ibedo kede,

⁸Yit wunu malo i lobo obedo kidikidi, me iwot ikel wunu yen, iger wunu ot; me cunya bed yom, ate nyuto kwogona iye, Rwot okobo,

⁹Ibedo yenyo wunu abup, koŋ inen inwoŋo wunu aduno moro keken, eka i kare ame ikelo wunu paco, amio oket oko. Piŋo kara ba? Rwot me mony en okobo. Pien oda oballe oko, kun wun giwu, ŋat acel acel tye abolle abola i tic me ode keken.

¹⁰Mannono en gin omio polo i malo okwero coro toyo piny, lobo daŋ mom ceko cam.

¹¹En omio an daŋ akobo ni, can pii myero bed tye i kom potti, i kom kiddi, i kom kal, i kom koŋo olok anyen, i kom moo, kede i kom ginnoro ducu ame doŋo lobo, kede i kom jo kede dok, kede i kom jami luŋ ame gin otio.”

¹²Mannono omio Jerubabel wot a Cealtiel, kede Yocwa wot a Yekojadak, alamdog adwoŋ, karacel kedejo luŋ ame onwoŋo odoŋ, gin luŋ rik ote winyo kop a Rwot Obaŋagi, kede kop Aggai adwarpiny, kite ame Rwot Obaŋagi oore kede, Lwak rik te bedo kede lworo i nyim Rwot.

¹³Eka Aggai, akwena a Rwot te kop i lwak kun tittigi kop a Rwot, “An at ye kedwu, Rwot okobo,”

¹⁴Rwot te tugo cuny Jerubabel wot a Cealtiel, aloc me Juda, kede Yocwa wot a Yekojadak, alamdog adwoŋ, karacel kede cuny jo ducu ame onwoŋo rik odoŋ; gin te bi no cako tic i ot a Rwot me mony, ame obedo Obaŋagi.

¹⁵Gin ocako tic i nino dwe pyeraryo wie aŋwen me dwe me abicel.