Read lango Jekeria 10 Bible Online

Jekeria 10 - lango bible

Jekeria 10

¹Kwa wunu kot i baŋ Rwot, i kare me cwir, kwa wunu i baŋ Rwot ame mio pol doko apek, ame mio kot cwe baŋ jo, ame mio dek tu i poto a dano acel acel.

²Pien cal jogi ko bo kop a tere mom otyet neno daŋ goba; jo a leko daŋ tito lek me goba, okweo cuny jo nono. Mannono omio jo rorona calo rommi; oneno can pien akwatgi mom.

³“Akemona Iyet meicel i kom okwat, abino keto can i kom otel-wic; pien Rwot me mony paro pi romi mere, ame en ot a Juda, bino lokogi calo aguragura mere aber i lweny.

⁴Kidi adwoŋ me gwic bino ya i akinagi, teke me guro kema daŋ bino ya i komgi, akud atero me romo daŋ bino ya i komgi, aloc luŋ daŋ bino ya i komgi.

⁵Gin luŋ obino bedo calo jo atek i romo, kun onyono okwor piny i coto i dye yo; gin bino lweny pien Rwot tye kedgi, bino miyo lewic mako jo aŋwec aguragura.

⁶“Abino miyo doggola a Juda doko atek, dok abino laro daŋ doggola a Lucepu. Abino dwogogi cen pien kica omaka i komgi, gin bino bedo calo jo a yam mom okwero, pien an a Rwot Obaŋagi, abino dok gamo kopgi.

⁷Eka Epraim te doko calo lon atek i romo, cunygi bino bedo yom calo jo omato koŋo olok.

⁸Itinogi bino nenogi te lelo, cunygi bino bedo yom i kom Rwot.

⁹Kadi bed rik akeketogi i akina orok, cite gin bino po pira i lobo luŋ a tye kannabor, gin karacel itinogi obino kwo, obino dwogo.

¹⁰Abino dwoggogi oko paco kun oya i lobo Miciri, abino cokogi daŋ oko i Acuria; abino kelogi i lobo Gilead kede Lebanon, tuno ka kabedo doŋ oremogi. Gin bino ŋolo dye nam me Miciri, obino goyo pii ame atagere i nam, kut luŋ i kulo Nail daŋ bino two.

¹¹Awaka a jo Acuria obino juko oko, abiro loc me Miciri bino rwenyo oko,

¹²Abino miyogi obedo atek i Rwot, gin bino natte pi nyiŋe”, Rwot okobo.