Read lango Jekeria 11 Bible Online

Jekeria 11 - lango bible

Jekeria 11

¹Yab doggolani, yin Lebanon, mi mac waŋ yen cedarni oko!

²Kok ba, yin cipre, pien cedar doŋ orette oko piny, pien yen adoijo mege doŋ oballe oko! Koku ba, wun kworo luŋ me Bacan, pien bun oculle doŋ olwero oko!

³Koŋ iwiny ba koko okwat, pien kwogogi doŋ obalo oko! Koŋ iwiny ba mor eŋatu, pien ka ponogi luŋ i Jordan doŋ oballe oko.

⁴Rwot Obaŋana okobo ni, “Yin myero idok ikwa rommi ame opito me aneka.

⁵Jo ame wilogi nekogi, eka mom ote keto cannoro i komgi. Jo a catogi kobo ni, Rwot myero pwo, pien doŋ adoko alonyo; okwatgi kica daŋ gire mom makogi.

⁶Pien kica gire mom dok bino maka i kom jo ame bedo i lobo-ni, Rwot okobo. Nen, abino miyo ŋat acel acel poto i ciŋ akwattere, dok ŋat acel acel bino poto iciŋ abaka mere; gin bino ŋinyo lobo, mom abino laro dano moro i ciŋgi.”

⁷Mannono omio an adoko akwa rommi ame jo awilo neko aneka. Eka ate kwanyo abiro aryo, acel ate cako nyiŋe Kica, en ocele ate cako nyiŋe Note. An ate kwayo gira rommi.

⁸Rik ate rweyo okwattono adek i dwe acel, pien onwoŋo cunya doŋ mom romo diye i komgi, gin daŋ onwoŋo yigi okwera oko,

⁹Omio ate kobo ni, “Mom gira abino bedo akwatwu. Rommi a myero to bino to; rommi a myero rwe oko, obino rweyo, me wek odoŋŋere, ŋat man cam riŋo kom awottere.”

¹⁰An ate kwanyo abirona ame nyiŋe Kica-ca, ate turo oko, kun aturo kede cikere ame rik acikere kede i rok luŋ.

¹¹Cikere-naca rik te tur oko i ninonono, ocat rommi ame obedo nena oŋeo ni mannono obedo kop a Rwot.

¹²An ate kobbigi ni, “Ka ce ineno wunu ni ber, mia wunu ocarana; aco ka mom, wek wunu bedi.” Gin te pimo cekel pyeradek me ryal me ocarana.

¹³Rwot te cika ni, “Bol i ka kano lim,” en lim ame gin ocula kede i wel aber wokkono. An ate tero cekel pyeradekkono bolo i ka kano lim a Rwot.

¹⁴Icennere ate dok turo abiro me aryo, ame nyiŋe Notte-ca, kun aturo kede notte me omego i akina Juda kede Icrael.

¹⁵Rwot te cika ni, “Yin dok igam jami tic okwat a mom konyo.

¹⁶Pien nen, abino miyo akwattoro ya i lobo-ni ame mom bino paro pi rommi ame tye a to atoa, mom daŋ bino yenyo rommi ame amito rwenyo oko, dok daŋ mom bino caŋo rommi owanne mege, akadi pito rommi a komgi yot, cite bino mwodo riŋo a en ocwe mege, kun kikilo anaka ogweŋŋwere tyengi.

¹⁷Akwatta a konnyere mom bino neno can be, ame weko rommi mere ata! Pala romo myero ŋol bade, cob daŋ waŋe me tuŋ cem! Myero mi bade luŋ kwe oko, waŋe me tuŋ cem daŋ to oko.”