Read lango Jekeria 12 Bible Online

Jekeria 12 - lango bible

Jekeria 12

¹Kop a Rwot i kom Icrael: Rwot ame oryeo polo, dok ocibo acakki te lobo, ame ocweo cuny dano iyi dano, okobo ni,

²“Nen aceggi miyo Jerucalem bedo ikopo ame mero rok luŋ ame tye i ŋete. I Juda daŋ okwor bino guro Jerucalem.

³I ninonono abino miyo Jerucalem bedo kidi apek meicel baŋ rok luŋ; jo luŋ ame tiŋo bino wanne atek. Rok luŋ me lobo bino notte karacel me lweny kede.

⁴I nino-nono, Rwot okobo, abino babano aguragura acel acel oko, eka ŋat aŋwec kede te po oko. Cite abino yabo waŋe i kom doggola a Juda i kare ame abino miyo aguragura orok luŋ wangi to oko.

⁵Atekere a Juda bino kop i cunygi kengi kengi ni, ‘Jo ame bedo i Jerucalem tye i teko ame oya i baŋ Rwot me mony, ame Obaŋagi.’

⁶“I nino-nono abino miyo atekere a Juda bedo calo tako ame mac tye a lyel iye i akina yen, dok daŋ acalo mac rao a lyel i akina ŋano. Gin bino neko rok luŋ a tye i ŋetgi, ame tye i ciŋgi tuŋ cem kede tuŋ cam, cite Jerucalem jo bino bedo i ye kun tye kakare i Jerucalem.

⁷“Rwot bino geyo miyo loc i kema a Juda, me kwogo me doggola a Daudi kede kwogo a jo ame bedo i Jerucalem mom myero mi bed malo i kato mea Juda.

⁸I nino-nono Rwot bino geŋo jo ame bedo i Jerucalem kede kwot; i nino-nono dano ame goro meicel i akinagi bino doko calo Daudi, aco doggola a Daudi i nino-nono bino bedo calo ot Obaŋa, ame calo amalaika a Rwot a telo nyimgi.

⁹I nino-nono abino yenyo yo me tyeko rok luŋ ame obino me lweny i kom Jerucalem.

¹⁰ “Abino onyo cuny me kica kede cuny me kwac i kom doggola a Daudi kede i kom jo ame bedo i Jerucalem, me wek ka gin oneno ŋat ame gin ocobo, gin okum pire, acalli ŋat ame kumo pi attinnere ame onywalo acel keken, dok me gin koke atek ateka, acalli ŋat ame koko atin kao.

¹¹I nino-nono kumo bino bedo dwon meicel i Jerucalem, acalli kumo pi Adad-rimmon i bar me Megiddo.

¹²Lobo bino kumo kun doggola acel acel kumo kengi; jo me doggola a Daudi pat kun mongi daŋ kumo pat; jo me doggola a Natan pat kun mongi daŋ kumo pat;

¹³jo me doggoa a Levi pat kun mongi daŋ kumo pat; jo me doggola a Cimei pat kun mongi daŋ kumo pat;

¹⁴karacel kede doggola luŋ ame odoŋ, doggola acel acel bino kumo kengi kengi, kun mongi daŋ kumo kengi kengi.