Read lango Jekeria 14 Bible Online

Jekeria 14 - lango bible

Jekeria 14

¹Nen ba, nino a Rwot tye abino, ame jami luŋ ame oyako i baŋwu obino poko i akinawu.

²Pien abino coko rok luŋ karacel me lweny i kom Jerucalem. Gin bino mayo boma ote yako udi kun daŋ obuto i mon tetek; nucu jo me boma obino tero oko iyi opii; citejo ocele mere-ni mom obino jwayo oko i boma.

³Icennere Rwot dok bino wot lweny i kom rokkono luŋ, acalo elwenyo kede i nino me lweny.

⁴I nino-nono tyene bino cuŋ i wi kidi me Jeituni, ame tye i nyim Jerucalem tuŋ kide. Kidi me jeituni bino barre yie aryo, kun cakere i tuŋ kide dok kede tuŋ to; luŋ bino doŋ alac meicel. Kidi tuŋ cel bino dok tutuŋ anyarodi, eka tuŋ ocele te dok tutuŋ anyarolum.

⁵Luŋ me kidina luŋ bino torre oko, pien luŋ kiddi bino tuno naka i ŋete. Ibino wunu riŋo acalo rik iriŋo wunu oyerjo i kare abaka Ujjia me Juda. Icennere Rwot Obaŋawu bino bino karacel kede jo mere acil luŋ.

⁶I nino-nono nico kede koyo bino bedo pe.

⁷Piny bino bedo bala iceŋ nakanaka, Rwot ŋeo man, kun gire mom dyeceŋ kadi dyewor, pien otyeno ceŋ bino ryeny.

⁸I nino-nono pii akwo bino mollo kun ya i Jerucalem, nucu mere tuŋ cel bino mollo i nam me tuŋ kide, eka nucu mere ocele te mollo i nam me tuŋ to; bino daŋ timere amannono i oro, kite ame obedo timere kede i cwir.

⁹I nino-nono Rwot bino doko abaka ame loo lobo ducu, en bino bedo abaka kene, kun nyiŋe kene en atye.

¹⁰Lobo luŋ bino doko bar, cakere i Geba tuno naka i Rimmon ame tye tutuŋ anyarolum me Jerucalem, Cite Jerucalem bino dyedde gire kakare cakere i dogcel a Benjamin tuno anaka i dogcel acon, naka i dogcel me Gul kede dok cakere i pem me Kananel tuno anaka i bur nyono olok abaka.

¹¹Jo bino bedo iye, pien mom dok obino kwero ginnor o me aneka iye. Jerucalem bino doŋ bedo i kuc.

¹²Man bino bedo too edeke ame Rwot bino pwodo kede rok luŋ ame olwenyo i kom Jerucalem: riŋo komgi bino top oko kun pwod ocuŋ i tyengi, waŋgi bino top oko iyi opoko waŋgi, lebgi bino top oko iyi doggi.

¹³I nino-nono twon lworo moro ame oya i baŋ Rwot bino babaŋogi oko, ame te miyo ŋat acel acel tiŋo ciŋe i kom awottere kun goo awottere kede ciŋe.

¹⁴Koŋ inen anaka, Juda daŋ bino lweny i kom Jerucalem. Gin bino coko lonyo a rok luŋ ame tye i ŋete, jabu, ryal, kede ruk apol meicel.

¹⁵Kodi too edeke-nono bino poto daŋ i kom aguragura, leyi acalli kane, inaga, kane kede i kom leyi luŋ me gonnyono.

¹⁶Ŋat acel acel ame obwot i kom rok luŋ ame onwoŋo obino me lweny i kom Jerucalem, bino wot i Jerucalem mwaka i mwaka me woro abaka, ame en Rwot me mony, kede kwero ecuban me gaŋo.

¹⁷Ka ce atekere moro me wi podo mom bino wot i Jerucalem me woro Abaka ame en Rwot me mony, kot mom bino cwe baŋgi.

¹⁸Ka ce atekere me Miciri mom owoto, mom onen kuno, too edeke ame rik Rwot owuno kede rok a mom owoto i Jerucalem kwero ecuban me gaŋo bino makogi,

¹⁹Man en too edeke ame obino pwodo kede jo i Miciri kede rok luŋ ame mom bino wot kwero ecuban me gaŋo.

²⁰I nino-nono obino goro coc i kom olaŋ me aguragura ni, “Okwero obedo acil pi Rwot.” Gulli ame tye i ot Rwot bino bedo acalo tabo ame tye i nyim ke ŋo lam.

²¹Gulli luŋ ame tye i Jerucalem kede Juda obino kwero bedo acil pi Rwot me mony, me wek jo luŋ ame ŋolo leyi me yalo Obaŋa bin kwany i akinagi, oted riŋo ame oyalo Obaŋa. Acat willoro mom dok bino nen i ot a Rwot me mony i nino-nono.