Read lango Jekeria 4 Bible Online

Jekeria 4 - lango bible

Jekeria 4

¹Amalaika ame rik okobo keda, dok te bino baŋa tyen me aryo, te coya bala kite ame oco kede dano i waŋ nino.

²Amalaika-nono te penya ni, “Ineno ŋo?” An ate dokke ni, “Nen, aneno gi-cibo tara ame kome luŋ obedo jabu, kede bakuli ame tye i wie, kede tara abiro ame ocibo i wie, kun tara acel acel ame ocibo i wie doge tye abiro.

³Yen Jeituni aryo onwoŋo tye i laŋete, kun acel acel tye tuŋ cem me bakuli, kede en ocele tye tuŋ cam.”

⁴An ate penyo amalaika ame akop keda ni, “Magi kara ŋo, adwoŋ?”

⁵Amalaika ame okobo keda te dokka iye ni, “Yin mom iŋeo jami magi?” An ate gamo ni, “Mom gire aŋeo, adwoŋ.”

⁶En dok te gamo doga ni, “Man en kop a Rwot baŋ Jerubabel, ame okobo ni, Mom kede twer kadi teko, cite kede Cuny ame oya i baŋa, Rwot me mony okobo.

⁷Yin iŋo kara, yin twon kidi adwoŋ? Yin ibino doko bar i nyim Jerubabel. En bino kelo kidi me atenni ot kun jo wo ni, ‘Gum, gum obed gire bane!’ ”

⁸Kop a Rwot dok te medde bino baŋa kun kobba ni,

⁹“Ciŋ Jerubabel doŋ ocano acakki te ot man; daŋ doŋ obino tyeko i ciŋe. Man bino miyo iŋeo ni Rwot me mony en oora baŋwu.

¹⁰Pien ŋat ame cao nino me kop anok, bino lelo, dok daŋ bino neno birigi i ciŋi Jerubabel. “Magi abiro-ni gin waŋ Rwot ame loloŋo lobo luŋ.”

¹¹Dok ate penye ni, “Kara yen Jeituni ame tye tuŋ cem kede tuŋ cam me gi-cibo tara ca kono obedo gin aŋo?”

¹²Ate dok medo penye, tyen me aryo ni, “Kara jaŋ jerturu aryo-ni kono obedo gin aŋo, ame tye i ŋet paipo aryo me jabu a moo mollo i yigi-nue?”

¹³En te penya ni, “Yin mom iŋeo jami magi?” An ate gamo ni, “Mom gira aŋeo, adwoŋ.”

¹⁴Eka en te kobba ni, “Magi gin jo aryo ame owirogi kede moo ame gin cun i ŋet Rwot me lobo luŋ.”