Read lango Jekeria 5 Bible Online

Jekeria 5 - lango bible

Jekeria 5

¹Dok ate tiŋo waŋa malo ate neno nen, buk adola ame twarre!

²Amalaika te penya ni, “Ineno kara ŋo?” An ate dokee ni, “Anene buk adola ame twarre; borrere romo futi pyeradek, eka laccere te romo futi apar wie abic.”

³Amalaika te kobba ni, “Man en kop ame ceno jo, ame woto i wi podo luŋ, pien ocoo tuŋ cel ni, jo luŋ ame kwala kwo obino ryemo oko cakere tin, dok ocoo tuŋ cel ni, jo luŋ ame kwoŋo kwon me goba goba obino ryemo daŋ oko cakere tin.

⁴Abino doŋ cwayo buk ceno jo-nono wot oko, Rwot me mony okobo, bino donyo i ot akwo kede i ot a ŋat akworjo i nyiŋa goba goba; bino bedo i ode kun tyeko oko, anaka yen kede kiddi luŋ ame ogero kede.”

⁵Icennere amalaika ame obedo kop keda obino te kobba ni, “Tiŋ waŋi malo me inen gin ame tye ka kato oko-ni,”

⁶An ate penye ni, “Mano kara ŋonono?” En te gamo ni, “Man dwoŋo ame kato oko.” Dok te gamo ni, “Man balgi i lobo luŋ,”

⁷Nen, ote tirjo nyonyo moro apek ame onwoŋo owumo kede doge, dako moro onwoŋo tye obedo iyi dwoŋo!

⁸Amalaika te kobo ni, “Man bal.” Eka te juŋo dako dwoko iyi dwoŋo, te daŋ coro nyonyo apek-ca cego oko i doge,

⁹Dok ate tiŋo waŋa malo, ate neno mon aryo tye atwarre abino kun yamo onwoŋo tye i bwomgi; gin onwoŋo tye i bwomgi bala mea araptela. Gin otirjo dwoŋo otero i akina lo bo kede polo.

¹⁰An ate penyo amalaika ame akop keda ni, “Kara dwoŋo koŋo otero kwene?”

¹¹En te dokka iye ni, “I lobo me Cinar, me gero ot pire; kare ame doŋ otyeko yiko obino cibo dwoŋo i kan a myero cuŋ iye kuno.”