Read lango Jekeria 6 Bible Online

Jekeria 6 - lango bible

Jekeria 6

¹Dok ate tirjo waŋa malo ate neno gadigadi lweny aŋwen oya i akina kiddi aryo; kiddi-nono onwoŋo obedo kiddi me mola.

²Gadigadi me agege tye iye aguragura arema, me aryo mere tye iye aguragura acol,

³me adekkere tye iye aguragura atar, eka gadigadi me aŋwennere te bedo iye aguragura obedo abacabac kun tatar.

⁴Apenyo amalaika ame onwoŋo tye akop keda ni, “Magi kara gin aŋo, adwoŋŋa?”

⁵Amalaika te dokka iye ni, “Magi awot baŋ yamo aŋwen me polo, kun nwoŋo koŋ ogeo cuŋ i nyim Rwot me loba luŋ.

⁶Gadigadi ame tye i aguragura acol awot adok mere tutuŋ lobo me anyarodi, en atarrere adok tutuŋ to”,

⁷aco en obedo abac abac awot adok tutuŋ lobo me anyarolum, gin atwarre aka to oko, gin orurua me cako wotgi oko me loloŋo lobo. Te doŋ cikogi ni, “Wotu, iloloŋo wunu lobo.” Gin daŋ te loloŋo lobo.

⁸En olwoŋa te kobba ni, “Koŋ inen jo-ca ame wo to tutuŋ lobo me anyarodica okweo cunya i kom lobo ame tye tutuŋ anyarodi.”

⁹Kop a Rwot dok te bino baŋa ni,

¹⁰“Kwany jo-ni i akina jo a yam otero i opii, Keldai, Tobia kede Yedaiya, ame gin jo a doŋ otuno kun oya i Babulon; wot kedgi i nino acel-lu i ot a Yocia wot a Jepania.

¹¹Gam ryal kede jabu i baŋgi, eka ite tiyo kede tok kwogo. Rwak tok kwogo abaka i wi Yocwa wot a Yekocadak, alamdog adwoŋ.

¹²Titte ni, ‘Rwot me mony okobo ni, Nen dano a nyiŋe Jaŋe ene. En bino doŋo i kabedo mere, dok en bino gero ot a Rwot.

¹³En ame bino gero ot a Rwot; en bino bedo i kwogo ame oporre pi abaka, bino bedo i wi kom loccere, te loc iye. Alamdog bino cun i ŋet kom loccere, niaŋere me kuc bino bedo i akinagi gin aryo luŋ.’

¹⁴Tok kwogo abaka-nu bino bedo i to a Rwot, me wek bedo gin me po baŋ Keldai, Tobia, Yedaiya kede Yocia wot a Jepania.

¹⁵“Jo ame tye kannabor bino bino, bino konyo jo i gedo me gero ot a Rwot; mano bino miyo iŋeo wunu ni Rwot me mony en oora baŋwu. Man bino timere ka ce iketo wunu cunywu i winyo dwon Rwot Obaŋawu.”