Read lango Jekeria 7 Bible Online

Jekeria 7 - lango bible

Jekeria 7

¹Kop a Rwot rik dok owinyere baŋ Jekeria i mwaka a Dario me aŋwennere, i nino dwe aŋwen, me dwe me aboŋwen ame olwoŋo ni Kiclev.

²Jo me Betel onwoŋo rik oro Carejer kede Regem-melek karacel kede lwakgi me owot okwa kica i baŋ Rwot,

³dok daŋ openy olamdog me ot a Rwot me mony karacel kede odwarpiny ni, “Myero akoki, akany kec i dwe me abic kite a rik abedo timo mwakki apol ata?”

⁴Kop a Rwot rik te winyere baŋa ni,

⁵“Peny jo luŋ me lobo karacel kede odwarpiny ni, Kare ame rik ikanyo wunu kec dok daŋ ikumo wunu i dwe me abic kede me abiro pi mwakki pyerabiro ame okato, rik ikanyo wunu kec pira?

⁶Kare ame it ye icem wunu kede i kare ame it ye ka mat wunu, mom onwoŋo icem dok daŋ imatte wunu pirwu kenwu?

⁷Kare ame rik jo obedo i Jerucalem i kuc, karacel kede i boma ducu ame ceggi kede, kun daŋ jo bedo i Negeb kede i lobo apipiny, mannono mom en kop a rik Rwot otito i dog odwarpiny me kare acon?”

⁸Kop a Rwot owinyere baŋ Jekeria ni,

⁹“Rwot me mony okobo ni mannono, Ŋol wunu kop kakare, tim wunu ber kede kica ŋat man baŋ ominnere,

¹⁰kur ibur wunu dako a cware oto, atin kic, welo onyo acan; nattoro i akinawu kur yik ginnoro arac i cunye i kom ominnere.”

¹¹Cite gin gigi okwero winyo doga ote cerre gigi ocera, kun oloko ŋegi, oculo daŋ yitgi oko me kur owiny kop.

¹²Gin omio cunygi odoko atek bala lela, me kur owiny cik kede kop a Rwot me mony ame rik ocwao i Cuny mere Acil i dog odwarpiny me kare acon, Mannono omio twon akemo adwoŋ meicel obino baŋ Rwot me mony.

¹³“Kite acalo rik alwoŋo eka gin te kwero winyo, amannono daŋ gin olwoŋo, an ate kwero winyo. Rwot me mony okobo.

¹⁴Akeketogi oko i yamo ajuru i akina orok ame gin yam mom oŋeo. Mannono omio lobo ame rik gin oya iye oballe kun ŋattoro mom ŋoŋolo yie, lobo ame rik yomoro cunygi oballe oko.”