Read lango Jekeria 8 Bible Online

Jekeria 8 - lango bible

Jekeria 8

¹Kop a Rwot me mony owinyere baŋa ni,

²“Rwot me mony okobo ni mannono, Twon nyeko atek meicel omaka pi Cion, nyeko omaka i kom i twon akemo adwoŋ meicel.

³Rwot okobo ni, Abino dwogo i Cion, abino bedo i dye Jerucalem; dok Jerucalem obino lwoŋo ni boma ame genne, dok kiddi a Rwot obino lwoŋo ni kidi acil.

⁴Rwot me mony okobo ni mannono, Co oteggo kede mon oteggo bino dok bedo i dye yo me Jerucalem, ŋat acel acel bino mako lut ko mo mere pi tio.

⁵Itino anyira kede awobe bino raude ata i dye yo boma kun otuko iye.

⁶Rwot me mony okobo ni mannono, Ka ce man me awura i waŋ jo ame odoŋ i kare man, myero dok bed me awura i waŋa daŋ? Man kop a Rwot me mony okobo.

⁷Rwot me mony okobo ni mannono, Nen abino laro jona ame tye tuŋ kide kede en ame tye tuŋ to.

⁸Abino kelogi me bedo i dye Jerucalem, Gin bino bedo jona, an abino bedo Obarjagi, kun an abedo ame genne, dok ame kita daŋ atira.”

⁹Rwot me mony okobo ni mannono, “Mi ciŋwu bed atek, wun ame i kare man ibedo wunu winyo kop magi i dog odwarpiny, cakere i kare ame ogeo cano acakki te ot a Rwot me mony, me wek ger ot a Rwot.

¹⁰Pien i kare ame nino-nono rik mom ru oromo, rik onwoŋo mom oculo ocara a dano moro, onyo me a lee moro, anaka kuc daŋ rik mom baŋ ŋat ame kato oko onyo ame dwogo i yie pi okwor; pien rik amio ŋat acel acel mom mito awottere.

¹¹Cite aman doŋ mom abino tic i jo-ni odoŋ-ŋi bala kare acon, Rwot me mony oko bo.

¹²Pien obino coyo koti kede kuc; olok bino nyak, lobo bino ceko cam, polo bino onyo toyo. Abino miyo jo-ni odoŋ-ŋi leo jamigi luŋ.

¹³Acalo yam ibedo wunu nyiŋ ame orok ceno kede jo, wun doggola a Juda kede doggola Icrael, amannono daŋ abino larowu eka ite bedo wunu okel winyo baŋ jo ocele. Kur ilwor wunu, cite mi ciŋwu bed atek.”

¹⁴Pien Rwot me mony okobo ni mannono, “Acalo rik doŋ ayiko me timowu rac, i kare ame kwariwu rik omio akemo omaka, cunya rik mom te kwe, Rwot me mony okobo.

¹⁵Kittono daŋ i kare man doŋ ayiko me timo ber baŋ Jerucalem kede baŋ doggola a Juda, kur ilwor wunu.

¹⁶Wun ibino wunu timo kit man: Ŋat acel acel myero kob kop ateni baŋ awottere, ŋol wunu kop ateni ame kelo kuc i ka ŋolo kop i dog pacowu.

¹⁷Kur iyik wunu kopporo arac i cunywu, ŋat man i kom awottere. Kur imar wunu kwoŋ goba goba, pien mannono luŋ an adag gira, Rwot okobo.”

¹⁸Kop a Rwot me mony owinyere baŋa ni,

¹⁹“Rwot me mony okobo ni mannono, Kanyo kec me dwe me aŋwen, kede kanyo kec me dwe me abic, kanyo kec me dwe me abiro kede kanyo kec me dwe me apar bino doko kare me yomcuny kede lelo, kede kare me ecuban me yomcuny baŋ jo me Juda; pi mannono myero imar wunu ateni kede kuc.

²⁰“Rwot me mony okobo ni mansnono, ‘Rok apol pwod bino bino, anaka jo ame bedo i boma apol apola.

²¹Jo ame bedo i boma acel bino wot i boma ocele kun okobo ni, “Oru wunu wot, me owot okwa Rwot timwa ber, oyeny wunu Rwot me mony; an awot.”

²²Jo apol kede rok atek bino bino i Jerucalem pi yenyo Rwot me mony, kede kwayo Rwot me timgi ber.

²³Rwot me mony okobo ni mannono, I kare-nono jo apar ame oya i rok me leb apapat bino mako kanyi Ajudaya kun kobo ni, “Wekwa owot kedi, pien owinyo ni Obaŋa tye kedwu.” ’ ”