Read lango Jekeria 9 Bible Online

Jekeria 9 - lango bible

Jekeria 9

¹ Kop a Rwot otiko lobo Kadrak, en bino nworjo kabedo me re i Damaciko, Pien boma luŋ me Aram me a Rwot, acalo atekere me Icrael daŋ luŋ.

²Kamat daŋ ame tye i waŋ apokki mere, Turo kede Cidon kadi gin ryek meicel.

³Turo ogero cellere pire kene, ocoko ryal oyido calo kwoo kede jabu acalli coto i dye yo.

⁴Cite, nen ba, Rwot bino yako jami mere oko, bino bolo lonyo mere luŋ i nam, aco en obino waŋe i mac.

⁵Acikelon bino neno, lworo bino mako; Gaja daŋ bino neno, te minne i rem: Ekron daŋ amannono, pien lewic bino make i gennere. Abaka bino rwenyo oko i Gaja; Acikelon bino doŋ nono aboŋo jo.

⁶Rok orubere aruba bino bedo i Acidod; abino giko wakere i lobo piriciti.

⁷Abino kwanyo remo mere oko i doge, gi-kwer daŋ abino kwanyo oko i akina lake; en daŋ bino bedo jo odoŋ pi Obaŋawa; bino doko calo atekere a tye i Juda, Ekron bino doko calo jo Jebuc.

⁸Icennere abino guro kema oda me gwoko, me ŋattoro kur bed be bea i ŋete; aloccoro a burogi mom dok bino donyo i akinagi, pien aman doŋ an i koma ame aneno i waŋa.

⁹Lel atek, yin Cion! Go ijira, yin Jerucalem! Nen, abakani abino baŋi; en oloo kop, oloo daŋ lweny! En mwol, dok tye arino i kana, tye i wi atin kana a twon.

¹⁰Abino tyeko gadigadi lweny oko i Epraim, ate tyeko aguragura lweny daŋ oko i Jerucalem; akud atero me lweny daŋ obino geŋo oko, en bino rabbi rok luŋ kop me kuc; loccere bino ya i nam naka i nam ocele, dok bino ya i Kulo naka tuno kan a lobo ogik iye.

¹¹Aco yin daŋ, pien pi remo me cikerena kedi, abino miyo joni ame otero iyi opii, ya oko i bur a pii mom iye,

¹²Dok wunu i cel atek, wun obuc a tye i gen; tin aciko ni abino culowu kun adodo iryo,

¹³Pien doŋ agomo Juda acalo akud aterona, Epraim doŋ amio obedo atero mere, Abino tugo itinoni, yin Cion, i kom itinowu, wun jo Grik abino tiŋi malo calo pala romo a ŋat atek.

¹⁴Icennere Rwot bino nen i wigi malo, eka atero mere te meny bala lutkot; Rwot Obaŋa bino kuto opel, te wot i dye yamo ajuru me anyarolum,

¹⁵Rwot me mony bino gwokogi, atyeŋ ame obao mom bino gudogi, gin bino nyono oko piny i te tyengi; gin bino mato remogi bala koŋo olok, bino yeŋogi bala becen opoŋ, bala gul keno lam ame ocoro iye remo.

¹⁶I nino-nono Rwot Obaŋagi bino larogi, pien jo mere calo rommi; pien gin obino papara i barrere, acalo gweŋ alilia i tok kwogo me loc.

¹⁷Eyo, kara berrere bino bedo rom mene! Kal bino miyo awobe cwe, koŋo olok anyen bino cweyo anyira.