Read lango Malaki 2 Bible Online

Malaki 2 - lango bible

Malaki 2

¹“Aman doŋ ba, wun olamdog, cik man otikowu.

²Ka ce mom ibino winyo wunu, ka ce mom ibino mako wunu i cunywu pi keto kwogo i koma, an abino cwayo cen i komwu ate daŋ ceno jamiwu abeco oko; iyi ateni mere, atyeko doŋ cenogi gire oko, pien wun mom imako wunu i cunywu, man kop a Rwot me mony okobo.

³Nen ba, abino miyo mom dok inywal wunu, dok daŋ abino miyo badwu mito oko, dok abino juko waŋwu kede wee, wee mot aŋolawu ame imio wunu baŋa, ate ryemowu oko i nyima.

⁴Man-nono bino miyo iŋeo wunu ni cik man rik acwao pirwu, me cikerena kede Levi moki, man kop ame Rwot me mony okobo.

⁵Cikerena kede rik onwoŋo obedo cikere me miyo kwo, kede kuc, ate daŋ miyo gin luŋ baŋe; me en bed kede lworo; en daŋ rik te lwora kun woro nyiŋa.

⁶En onwoŋo pwonyo ka pwony me ateni keken, kun kopporo arac mom donnyo i doge. En obedo wot karacel keda i kuc kun tio gin ame tye atira dok daŋ omio jo apol oweko timo gin arac.

⁷Alamdog myero ogwok kop me ateni ame en neo i kom Obaŋa, jo myero wot baŋe me winyo pwonnyere, pien en obedo a kwena a Rwot me mony.

⁸Cite wun doŋ iweko wunu lubo yo-nono oko. Gin ame wun ipwonyo wunu tye ka tatago jo apol meicel, ibala wunu cikere a Levi oko, Rwot me mony okobo.

⁹Mannono omio an amiowu idoko wunu jo ayot meicel, ame ocao i i nyim jo ducu, pien mom ilubo wunu yona, dok daŋ itye wunu kede apoka-poka i pwonywu.”

¹⁰Wan luŋ mom papawa acel? Obaŋa acel mom en ame oketowa? Pino dok ŋat acel acel mom bedo ŋat a genne baŋ awottere, kun obalo wunu cikere ame rik kwariwa ocikere kede?

¹¹Jo Juda yam mom obedo jo ame genne; gin obedo timo tim me kwer iyi Icrael kede i Jerucalem. Gin obalo kabedo acil ame obedo me a Rwot, kabedo ame en maro, dok daŋ gin onyomo anyira a rok ame woro obana ocele.

¹²Rwot myero mi waŋ ŋat ame timo kodi tim man rweny oko i kema a Yakobo, me kur dok medde bedo kede acaden onyo ŋat ame gamo kop a Rwot, onyo ame kela mot baŋ Rwot me mony.

¹³Gin ocele ame dok itimo wunu daŋ ene. Iwumo wunu wi keno lam a Rwot kede pig waŋwu, ikok wunu dok daŋ icucura wunu, pien en mom dok keto cunye i kom motwu, mom daŋ gamo i baŋwu, akadi pwoyowu pire.

¹⁴Wun ipenyo wunu ni, “Kara piŋo omio en dok timo kittono?” Pien Rwot obedo acaden ame neo kop i kom cikerewu ame onwoŋo rik icikere wunu kede wun i dakoni, ame rik inyomere kede kun yin pwod awobi, ento yin doŋ ituro cikerewu oko, akadi bed en pwod tye acalo awotti, dok dakoni ame onwoŋo rik icikere kede i nyim Obaŋa.

¹⁵Mom Obaŋa omio yin idoko kom acel kede cuny daŋ acel, wun kede? Gin aŋo ame en Obaŋa mito i baŋwu? En mito ni ibed wunu itino ame wore. Pi mannono, myero igwokere wunu ba, ŋattoro kur tur cikere mere baŋ dako me re ame enyomo kun en pwod awobi,

¹⁶“Pien an adag keto nyom, Rwot Obaŋa me Icrael en okobo, adag daŋ ŋat ame timo kodi tim me kolo-nono baŋ cege, Rwot me mony okobo, Pi mannono, myero igwokere wunu ba, me ŋattoro kur bed ŋat a mom genne.”

¹⁷Kopwu doŋ oolo kom Rwot oko, Aco wun dok ipenyo wunu ni, “Wan kara oolo kome i yore aŋonnono?” Wun lolo wunu kome pi kobo ni, “Jo luŋ ame timo gin arac, gin gire obedo jo abeco i nyim Rwot, yie daŋ yom i komgi.” Dok pi penyo ni, “Obaŋa ame ŋolo kop atira-nono kara tye kwene?”