Read lango Malaki 3 Bible Online

Malaki 3 - lango bible

Malaki 3

¹Rwot me mony odok ipenywunono ni, “Neno wunu ba, acwayo aora i nyima, me en gera yo, me Rwot ame iyenyo wunu-nono bin oko oyotoyot i ode. Neno wunu ba, aor me cikere ame cunywu yom i kome-nono, abino doŋ oko.

²Ento na ame bino kanyo nino-nono ka en obino? Dok na ame bino cuŋ ka en onen? “Pien en bino bedo calo mac ame lio ryal, dok acalo cabun me biyo boŋo,

³En bino bedo piny me nolo kop acalo ŋat ame lio ryal bedo acil, en bino lonyo ikwae a Levi doko acil kun liogi acalo jabu kede ryal, tuno waŋ ame gin doŋ romo miyo mot baŋ Rwot i cuny aler.

⁴Mannono bino miyo mot ame jo Juda kede jo Jerucalem mio, bino dok yomoro cuny Rwot calo i kare acon kede i mwakki ame okato.

⁵“An doŋ abino nokowu aceggi, me ŋolliwu kop. Abino bedo acaden ame kobo kop oyotoyot i kom otim tim me jojok, i kom ocod cot, i kom okwoŋ kwoŋ me goba, i kom jo ame cero opakaca pi ocaragi, kede jo ame buro mon a coggi oto, itino kic, karacel kede jo ame cwao orok a bedo i akinagi teŋe kun mom olwora gigi, man kop a Rwot me mony okobo.

⁶“Pien an a Rwot ame mom dok alokere; pi mannono ba, wun ikwae a Yakobo, mom ru ajwerowu wun ducu.

⁷Cakere i kare a kwariwu, wun igak wunu oko i kom cikka, kun mom igwoko wunu. Dwog wunu doŋ baŋa, me an daŋ adwog baŋwu, Rwot me mony okobo. Ento wun dok ipenyo wunu apenya ni, ‘Wan kara obino dwogo i yore aŋo?’

⁸Dano twero yako Obaŋa? Nen itye wunu ka yaka. Ento wun dok ipenyo wunu ni, ‘Kara wan oyaki i yore aŋo?’ Iyaka wunu i mi yo acel me apar karacel kede motwu.

⁹Oceno wun luŋ i cen, pien itye wunu ka yaka; rokwu luŋ tye ka yaka.

¹⁰Kel wunu acel me apar luŋ i ka kano cam, me cam bed tye i oda; me koŋ dok itema wunu kede, Rwot me mony okobo, koŋ inen wunu ka ce mom abino yabo waŋ dirica luŋ me polo pirwu, ate corriwu lwak jami apipim.

¹¹Abino geno ginnoro luŋ ame balo cam i pottiwu, me gin kur tyek cam ame ocek i pottiwu; nyig olokwu ame tye i poto mom bino ony, Rwot me mony okobo.

¹²Rok ocele luŋ te doŋ lwoŋowu ni wun rok a komwu gum, pien ibino bedo bedo wunu i lobo me yomcuny man kop ame Rwot me mony okobo.

¹³“Wun ikobo wunu kop areco i koma, Rwot me mony okobo. Cite wun dok ipenyo wunu ni, ‘Kara wan okobo kop aŋo i komi?’

¹⁴Wun ikobo wunu ni, ‘Konyo kara ŋo me bedo woro Obaŋa? Gin aŋo aber ame wan onwoŋo pi bedo cobo gin ame en ociko onyo pi bedo wot i nyim Rwot me mony bala jo ame akwero cola?

¹⁵Cakere i kare man wan olwoŋo jo ame wakere ni jo ame komgi gum. Pien jo ame timo gin arac bedo jo ame tye aber i jami ducu mom mannono keken; cite gin ka otemo Obaŋa, gin obwot gigi aboŋo ginnoro ame gudogi.’ ”

¹⁶Jo ame lworo Rwot te bedo kop i akinagi kengi kengi; Rwot te ciko yite winyo gin ame gin akobo; ote coyo buk i nyim Rwot, me po i kom jo ame rik onwoŋo lworo Rwot kun daŋ otamo pire.

¹⁷Rwot me mony te kobo ni “Gin bino bedo jona, jo ame obedo mera an ikoma, i nino ame abino tic iye, kun atimogi kica kite ame dano timo kede kica baŋ wode ame wore.

¹⁸Mannono bino miyo dok ineno wunu apokapoka ame tye i akina jo ame kitegi atira kede jo areco, jo aworo Obaŋa kede jo ame mom woro Obaŋa.