Read lango Matayo 11 Bible Online

Matayo 11 - lango bible

Matayo 11

¹Ame Yecu doŋ otyeko ciko jo mere apar wie aryo, en oya i kuno, owoto i pwony kede i rabo kop i paccigi.

²Ka Lakana owinyo pi tic a Kricito a kun en tye i ot kol, eka te ooro jo mere a lube me penyo ni,

³“Yin dano abino ca, onyo okur en ocele?”

⁴Yecu odokkigi iye ni, “Wot ikobbi wunu Lakana gin ame iwinyo wunu kede gin ame ineno wunu:

⁵otowaŋ waŋgi oyabere, jo oŋwalo owoto, kom odobo olony, jo a yitgi odiŋ owinyo, jo oto ocerogi oko, dok orabbi ocan amut aber.

⁶Dano a tammere mom oballe i koma nwoŋo tye kede winyo.”

⁷Ame gin adok oko, Yecu ocako kop kede lwak kop i kom Lakana, ni, “Yam iwoto wunu i tim ka neno ŋo ba? Ka neno ogada a yamo yeŋo bo?

⁸Kara iwoto wunu ka neno ŋo ba? Ka neno dano ame ruko boŋi abeco? Nenu ba, jo a ruko boŋi abeco bedo i pacci a rwode.

⁹Kara doŋ iwoto wunu piŋo? Ka neno adwarpiny? Ee ta, akobbiwu ni, ŋat ame kato adwarpiny.

¹⁰Man en ŋat a rik ocoo pire ni, ‘Nen, acwao aorra i nyimi, ame bino gero yo i nyimi.’

¹¹Atittiwu ni, i akina jo ame mon onywalo, mom tye dano moro ame kato Lakana i dit; ento ŋat atidi meicel i loc me polo dit kato en.

¹²Ya i kare a Lakana ituno atot onyoni, loc me polo olaro kede teko, jo atek mao gigi.

¹³Pien odwarpiny luŋ anaka buk me cik orabo kop ituno kede naka i kom Lakana;

¹⁴cite ka itwero wunu ye, Elia a myero bin ennono,

¹⁵ŋat a tye kede yit me winyo, myero winy.

¹⁶“Kara abino poro jo me kare man kede ŋo? Gin orom kede itino ame bedo i cuk, ame lwoŋo otino wadgi kun okobo ni,

¹⁷‘Wan okuttiwu nyamulere, wun mom imyelo wunu; owerriwu wer lyel, wun mom ikok wunu’.

¹⁸Pien Lakana obino kun mom camo, mom mato daŋ, gin okobo ni, ‘En tye kede cen’.

¹⁹Wot a dano obino ame camo dok mato daŋ, gin dok okobo ni, ‘Nen dano owor kede amero, awot ora-ocoro kede obalo.’ Ento ryeko Obaŋa nen atir ni tye kakare pi ticcere.”

²⁰Icennere Yecu te ero kop akemo i kom boma mogo kan ame etio iye ticcere atek adoŋo, pien okwero ŋut.

²¹“Ibino neno can, yin Korajin! Ibino neno can, yin Betecaida! Pien kono tic atek adoŋo ame otio baŋwu, yam otio i Turo kede Cidon, kono gin oŋut con kun obedo i boŋo cola kede buru.

²²Ento akobbiwu ni, can a Turo kede Cidon bino bedo itikatika i kare me ŋolo kop, katowu.

²³Kede yin Kapernaum, obino tiŋi malo anaka i polo bo? Pe gire; kom obino dwoki piny naka i Kadec. Pien kono tic atek adoŋo ame otio baŋwu yam otio i Codoma, kono ori naka tin.

²⁴Ento akobbiwu ni, can me Codoma bino bedo itikatika i nino me ŋolo kop, kato meri.”

²⁵I kare-nono Yecu te kobo ni, “Apwoyi Pappa, Rwot me polo kede lobo, pien ikano kop magi baŋ jo aryek a ŋeo piny, iyabo baŋ itino atino.

²⁶Eyo, Pappa, pien cunyi opwoo amannono.

²⁷Pappa otyeko jalla jami bec abeca; mom tye ŋattoro ame ŋeo Wod, kono ka Papa keken, onyo ame ŋeo Papo kono ka Wod keken, kede dano ame Wod mito nyuto Papo baŋe.

²⁸Biye wunu baŋa jo ducu ool kede ame yee onuo, an abino weyo korwu.

²⁹Ryoŋ wunu lodina i ŋutwu, pwony wunu kitena; pien an awor, daŋ amwol i cunya, cunywu bino nwoŋo weo.

³⁰Pien lodina yot, dok yecca mom pek.”