Read lango Matayo 12 Bible Online

Matayo 12 - lango bible

Matayo 12

¹I kare-nono Yecu owoto kun ŋolle i poto bel i nino me cabit. Onwoŋo kec aneko jo a lube, gin te ero rito wit bel, te mwodo.

²Oparicayo ka oneno, ote kobbe ni, “Nen, jo a lubi otimo gin ame cik okwero ni jo kur ti i ceŋ cabit!”

³En te gamo doggi ni, “Wun ce mom ikwano wunu gin ame nwaŋ Daudi otio ka rik kec oneke, kede jo a rik tye karacel kede?

⁴Kite ame en odonyo kede i ot Obaŋa, te camo ogati ame oketo i nyim Obaŋa, a yam cik kwero ni en kur cam, kadi jo ame tye karacel kede, kono ka olamdog keken?

⁵Kede onyo mom ikwano wunu i cik ni i ceŋ cabit olamdog i ot Obaŋa daŋ balo cabit, cite mom onwoŋo kop?

⁶Ento an akobbiwu ni, gin adwoŋ akato ot Obaŋa tye kano

⁷Kono ce iŋeo wunu te kop man, ni, ‘Amito kica, mom gin oŋolo’, kono mom iŋolo wunu kop oloo jo a balgi mom.

⁸Pien Wot a dano en rwot me cabit.”

⁹Yecu oya i kuno obino i kacokere megi.

¹⁰Kuno onwoŋo tye iye dano ame bade omito. Jo a mito pide te penye ni, “Cik ye ni caŋ dano i cen cabit?”

¹¹En te penyogi ni, “Kara ŋa i akinawu, ka tye kede romo acel, eka romo-nu te poto oko i bur i ceŋ me cabit, en mom bino mako, te wayo oko?

¹²Dano mom pire tek meicel akato romo? Pi mannono cik ye ni tim gin aber i ceŋ cabit.”

¹³Eka en te kobbi lo-nu ni, “Rye badi oŋ.” En oryeo bade, te caŋ oko, te doko aber arorom i tuŋ cel.

¹⁴Oparicayo te kato oko, ote poro kop i kome, kite a myero oneke kede.

¹⁵Ka Yecu oŋeo, te ya oko i kuno. Jo apol te lube, daŋ en te caŋogi ducu,

¹⁶te jukogi ni, kur omi jo ŋe.

¹⁷Man otimere me kop Obaŋa a rik obino i dog adwarpiny Icaya cobere kakare, ni,

¹⁸“Nen amirona ame ayero, ame amaro, cunya yom i kome. Abino keto Cunya bed i kome, en bino tero kwena me ŋolo kop atir baŋ Orok.

¹⁹En mom bino da, mom bino redo areda, mom obino winyo dwone i waŋa yo;

²⁰en mom bino turo ogada ame okak, dok mom bino neko uci tara a pwod aduny, ituno ka en omio kop ame oŋolo atir oloo lobo;

²¹ento Orok bino geno gin aber pi nyiŋe.”

²²Eka ote kelo atowaŋŋoro a tye kede cen arac, ame lebe oto baŋ Yecu. Ocaŋe, omio alebeoto oloko, daŋ te neno piny.

²³Lwak jo ecipan owuro kun okobo ni, “Kara man mom akwar Daudi?”

²⁴Ento Oparicayo ka owinyo te kobo ni, “Dano man ryemo cen pi twer a Beeljebul, adwoŋ me cen, keken.”

²⁵Ento en oŋeo tamgi oko, te kobbigi ni, “Kare ducu ka loc opokere yie aryo, lobo mere balle oko, dok kare ducu ka paco onyo ot opokere yie aryo, mom cuŋ.

²⁶Ka Catan ryemo Catan, en nwoŋo opokere yie aryo; kara loccere bino cuŋ iŋo?

²⁷Dok ka an aryemo cen pi twer a Beeljebul, kara itinowu ryemo pi twer aŋa? Pi manno gin bino ŋolliwu kop.

²⁸Ento ka an aryemo cen pi Cuny Obaŋa, loc Obaŋa doŋ obino baŋwu.

²⁹Dano twero donyo i ot a ŋat atek niŋo, a mom koŋ ogeo tweyo dano atek-ku, eka te yako ode.

³⁰Dano a mom tye tuŋ baŋa en akworra, dok dano a mom coko karacel keda, en keto aketa.

³¹Pi mannono, akobbiwu ni, bal acel acel a jo tio kede ayet ducu ame oyeto kede Obaŋa, obino timogi iye kica, ento ayet ame oyeto kede Cuny Acil mom obino timo iye jo kica.

³²Dok dano ame kobo kop arac i kom Wot a dano obino timo kica, ento dano ame kobo kop arac i kom Cuny Acil mom obino timo kica, kadi i kare man, onyo i kare a bino i nyim.

³³“Myero iŋe wunu ni yat aber nyige daŋ beco, yat arac nyige daŋ reco; pien yat ŋeye I kom nyige.

³⁴Wun itino ororo, itwero wunu kobo kop aber nino, ame kono wun jo areco? Pien kop ame ocokere i cunyi, en ame dog daŋ kobo.

³⁵Dano aber kwanyo gin aber i akina jami abeco ame en okano dano arac kwanyo gin arac i akina jami areco ame en okano.

³⁶Akobbiwu ni kop ducu ame jo kobo aboŋo gwokere iye, obino piddigi pire i nino me ŋolo kop;

³⁷pien kop ame ikobo bino miyo iloo kop, dok kop ame ikobo bino miyo kop loyi.”

³⁸Jo mogo i akina opwony-cik kede Oparicayo te kobbe ni, “Apwony, wan omito neno anyuttoro a ya i baŋi.”

³⁹En te gamo ni, “Lwagi jo areco kede ocod cot-ti yenyo anyut, ento mom obino miyogi anyuttoro, kono ka anyut adwarpiny Yona keken.

⁴⁰Pien acalo Yona rik otyeko nino adek, dyeceŋ kede dyewor, iyi rec, kite-nono Wot a dano daŋ bino tyeko nino adek, dyeceŋ kede dyewor, i lobo.

⁴¹Jo Nineve bino cuŋ karacel kede lwagi jo me kare man, i kare me ŋolo kop, te miyo kop loyogi: pien gin rik oŋut pi kop a Yona orabo, cite nen, gin adwoŋ akato Yona tye kan.

⁴²Abaka a dako me tutuŋ anyarolum bino cuŋ karacel kede lwagi jo me kare man i kare me ŋolo kop, te miyo kop loyogi; pien en otuno iya i agikki me lobo pi winyo ryeko a Culeman, koŋ inen, gin adwoŋ akato Culeman tye kan.

⁴³“Ka cen arac oya i kom ŋattoro, en woto mano kabedo a pii mom iye kun yenyo ka weo; naka mom onwoŋo.

⁴⁴En te kobo ni, ‘Adok gira i oda kan a rik aya iye.’ Ka otuno, en onwoŋo ŋattoro mom iye, oweo yie acil, ame oyiko aber.

⁴⁵En dok te wot omo cen ocele abiro a gin doŋ reco akate, gin donyo bedo kuno; icennere dano man bedo arac akato a yam con. Bino bedo amannono daŋ baŋ lwagi jo areco me kare man.”

⁴⁶Ka rik en pwod tye ka kop kede lwak, nen, tottere kede omego mere onwoŋo ocuŋ oko, kun omito kop kede.

⁴⁷Dano moro te kobbe ni, “Neno, totti kede omegoni tye ocuŋ oko, omito kop kedi.”

⁴⁸Ento en odok i dano-nu ni, “Kara totta en ŋa? Omegona gin jo mene?”

⁴⁹Te ryeyo bade tuŋ baŋ jo a lube kun kobo ni, “Nenu ba totta kede omegona!

⁵⁰Dano a tio gin ame Pappa a tye i polo mito, en ominna, en aminna kede totta.”