Read lango Matayo 13 Bible Online

Matayo 13 - lango bible

Matayo 13

¹I nino acel-lu rik Yecu te ya oko i ot, te wot bedo piny i ŋet nam.

²Lwak ecipan te cokere baŋe; pi mannono en te yito iyi yee, te bedo iye, lwak luŋ te bedo oko i dog nam i wi tela.

³En te kobbigi kop apol i carokop kun kobo ni, “Lo moro rik owoto ka coyo koti.

⁴Ame en doŋ tye ka coc, koti mogo te kir i dye yo, winy te bino-depo oko.

⁵Mogo te kir kan obedo lela lela, ame lobo tye iye warawara. Cucuttono ote tu, pien lobo mom tut;

⁶ento ka cen oryeny ote two oko, pien lwitgi mom.

⁷Mogo te kir i akina oku to, okuto te lot diyogi oko.

⁸Mogo te kir gigi i lobo aber, nyiggi te cek; mogo tyene acel acel ocek iye nyige mia acel, mogo pyerabicel, mogo pyeradek.

⁹Ŋat a tye kede yit myero winy.”

¹⁰Jo mere a lube obino baŋe, ote penye ni, “Piŋo ikobo kedgi i carokop?”

¹¹En te gamo doggi ni, “Wun omiowu ŋeyo muŋ me loc Obaŋa, ento jo ca mom omiogi.

¹²Pien ŋat a mere tye obino medde te durre baŋe; ento ŋat a mere mom obino gamo oko anaka gin a tye baŋe.

¹³Man en gin omio akobo kedgi i carokop, pien ka gin oneno rom a mom oneno; dok ka gin owinyo rom a mom owinyo kadi niaŋ tere.

¹⁴Cite kop Obaŋa a rik adwarpiny Icaya okobo ocobere kakare i komgi ni, ‘Me winyo, ibino winyo wunu, ento mom ibino niaŋ wunu tere; me neno, ibino neno wunu, ento mom ibino ŋeyo wunu.

¹⁵Pien rok-ki cunygi odoko nwaŋ, yitgi odiŋ oko, mom owinyo aber, waŋgi daŋ omio gigi oko; me kur onen kede waŋgi, kadi winyo kede yitgi, kadi niaŋ i cunygi, kadi dwogo baŋa me acaŋgi.’

¹⁶Ento wun waŋwu tye kede winyo, pien oneno, yitwu daŋ tye kede winyo, pien owinyo.

¹⁷Ateni, akobbiwu ni, odwarpiny apol kede jo a kitegi atira rik obedo kede keo me neno gin ame wun ineno wunu, ento naka mom oneno, kede winyo gin ame wun iwinyo wunu, ento naka daŋ mom owinyo.

¹⁸“Koŋ doŋ iwiny wunu carokop i kom acoc.

¹⁹Ka dano moro owinyo kop i kom loc Obaŋa eka mom te niaŋ iye, Arac ca bino te kwanyo koti ame ocoo i cunye oko; man en ame i dye yo.

²⁰En ame ocoo kan obedo lela lela, en dano ame ka owinyo kop, daŋ te gamo cuto kede lelo,

²¹ento mom tye kede lwite i yie, te ri ka anokkoro; tekki cannoro adwoŋ obino, onyo awuna, pi koppono, en poto oko cucuttono.

²²En ame ocoo i okuto, en dano ame winyo kop, ento par apol me lobo man kede mito lonyo te diyo kop oko, mom nyak.

²³En ame ocoo i lobo aber, en dano a winyo kop kun niaŋ tere daŋ en nyige nyak atika, moro mia, moro pyerabicel, moro pyeradek.”

²⁴Te dok kelligi carokop ocele kun kobo ni, “Loc me polo rom aroma kede dano ame ocoo koti abeco i poto mere.

²⁵Kajo doŋ obuto oko, akworrere te bino, te coyo ekitu i akina kal, eka en te wot gire oko.

²⁶Ka otu, daŋ te keto nyige, cite te nen iye ekitu.

²⁷Omiro a won ot te wot baŋe, ote penye ni, ‘Adwoŋ, rik mom icoo koti abeco i potoni? Kara ekitu dok onen iye niŋo?’

²⁸En te gamo ni, ‘Mano akwor en otimo.’ Omiro te dok penye ni, ‘Imito owot odoo oko?’

²⁹En te kobbigi ni, ‘Pe gire; ka idoo wunu ekitu, mio ibino doyo wunu anaka kal daŋ.

³⁰Koŋ iwek wunu gin aryo ducu doŋ karacel, ituno ka oromo me akaa. Eka i kare me kac abino kobbi jo a kayo ni. Koŋ ige coko wunu ekitu, itwe wunu me awaŋa, ento kal iony wunu i derona.’ ”

³¹Okelligi dok carokop ocele kun kobo ni, “Loc me polo rom aroma kede nyig dek karadali ame dano moro okwanyo te poto i poto mere.

³²En titino akato koti luŋ, ento ka odoŋo bedo adwoŋ a loo dek ducu. Doko twon yattoro a winyi a twarre malo bino gero udigi iye.”

³³Okobbigi carokop ocele ni, “Loc me polo rom aroma kede tobi ame dako ojuko, te rubo i moko a romo dita adek, ituno ka oyenyo ducu.”

³⁴Kop magi ducu Yecu okobo kede lwak i carokop. Mom okobo kedgi aboŋo carokop,

³⁵me kop a yam adwarpiny okobo cobere kakare, ni, “Abino yabo doga i carokop, abino rabo kop okano geye acakki piny.”

³⁶Eka en te weko lwak, te donyo i ot, jo mere a lube te bino baŋe kun okobo ni, “Nyuttiwa carokop me ekitu ame i peto.”

³⁷En te dok iye ni, “Ŋat ame ocoo koti abeco en Wot a dano;

³⁸poto en lobo ducu, koti abeco gin itino me loc me polo, ekitu gin itino Arac.

³⁹Akwor ame ocoogi en Catan; kac en agikki piny, okac gin omalaika.

⁴⁰Acalo ogwaro ekitu, obolo owaŋo i mac, bino bedo kittono i agikki piny.

⁴¹Wot a dano bino oro omalaika mere, gin bino coko i te loccere jami ducu a mio jo poto i bal, kede jo ducu ame otim tim areco,

⁴²te bologi i keno me mac, kan ame bino bedo iye koko kede kayo lak.

⁴³I karenono jo ame kitegi atira bino ryeny bala cen i te loc a Papagi. Ŋat ame tye kede yit, myero winy.

⁴⁴“Loc me polo rom aroma kede lim ame okano i poto, ame dano onwoŋo, te dok wumo oko; eka pi yomcunye, en te wot cato jami mere luŋ, te wilo poto-nu oko.

⁴⁵“Dok loc me polo rom aroma kede acat-wil a con obedo ka yenyo tiggi abeco me wel,

⁴⁶eka te nwoŋo tigo acel ame wellere tye malo meicel, te wot cato jami mere ducu, te wilo tigo-nu oko.

⁴⁷“Dok loc me polo rom aroma kede bwo ame oryeo i dye nam, ame ocoko rece ame kwongi papat.

⁴⁸Ka doŋ opoŋ, jo wao, te kelo i wi tela, ote bedo piny me yero en abeco mege coko i dwoŋ, ento en areco mege ote bolo oko.

⁴⁹Bino bedo kite-nono i agikki piny. Omalaika bino bino, ote poko jo areco oko i akina jo a kitegi atira,

⁵⁰eka te bologi i keno me mac, kan ame bino bedo iye koko kede kayo lak.”

⁵¹Yecu te penyogi ni, “Doŋ ityeko niaŋ wunu i kopi luŋ?” Gin te gamo ni, “Ee ta.”

⁵²En te kobbigi ni, “Pi mannono, apwony-cikkoro ame nwoŋo doŋ opwonyo pi loc me polo, rom aroma kede won ot ame okelo jami anyen kede acon i akina jami mere a yam ekano.”

⁵³Ka Yecu doŋ otyeko carokop magi, te ya oko i kuno,

⁵⁴odwogo i lobo turgi, opwonyogi I kacokeregi, omio gin owuro kun okobo ni, “Dano man onwoŋo ryeko man i kwene? Ticcere magi atek adoŋo oya i kwene?

⁵⁵Man mom wot apac? Tottere mom nyiŋe Maliam? Kede omego mere mom Yakobo kede Yucepu kede Cimon kede Juda?

⁵⁶Dok anaka amego mere ducu mom tye baŋwa kan? Kara dano man dok onwoŋo gin man ducu i kwene?”

⁵⁷Cunygi te ya oko i kome. Ento Yecu te kobbigi ni, “Mom tye adwarpinnyoro ame mom oworo, kono ka i lobo me turgi, kede i paco mere.”

⁵⁸Daŋ en mom te tiyo ticcoro atek adoŋo kuno, pien onwoŋo iyeegi mom.