Read lango Matayo 14 Bible Online

Matayo 14 - lango bible

Matayo 14

¹I kare-nono Kerode aloc owinyo dwon Yecu;

²te kobbi omiro mere ni, “Man en Lakana Abatija. Ocere oko i akina jo oto, en gin omio teko magi tye ka tic i yie.”

³Pien Kerode onwoŋo omako Lakana, otweo, te keto i buc pi Kerodia, ci-ominnere Pilipo;

⁴pien Lakana rik okobbe ni, “Cik mom ye yin ibed i ci-ominni.”

⁵En te mito neko Lakana, ento te lworo lwak, pien gin onwoŋo wore acalo adwarpiny.

⁶Doŋ ka nino ame opo iye pi nywalo Kerode oromo, nyaka a Kerodia te myel i nyim jo, te yomoro cuny Kerode;

⁷omio te cikke kun kwoŋo akwoŋa ni, ebino miyo jami ducu ame agin-nu bino kwaye.

⁸Cite tota a nyan-nu te cupe, en te kwayo ni, “Mia i weer-ri wi Lakana Abatija.”

⁹Cuny abaka owaŋ, cite pi kwoŋŋere, kede pi Lakana wele mere, te ciko ni mie;

¹⁰te oro dano, ote ŋolo ŋut Lakana i buc oko,

¹¹ote kelo wie i weer, miyo baŋ nyako, en te tero baŋ tottere.

¹²Jo mere a rik lube te bino tiŋo kome, ote yike; eka ote tero koppere baŋ Yecu.

¹³Ka Yecu owinyo, te ya oko i kuno, te wot kede yee kan a jo mom iye; ka lwak owinyo, ote lube kede tyengi a kun gin ya i boma apapat.

¹⁴Tekki eya i yee, ete neno lwak apipim; ocone meicel, te caŋo otwo ame gin okelo.

¹⁵Otyeno jo a lube obino baŋe kun kobo ni, “Kan obedo i dye tim; caa daŋ okato oko, cwa lwak wot i akina myere, me gin will cemgi kengi.”

¹⁶Yecu te gamo ni, “Gin ame miogi owoto mom tye. Wun migi wunu cem.”

¹⁷Gin te gamo ni, “Wan mom otye kede ginnoro kan, kono ka aŋina ogati abic kede rece aryo keken.”

¹⁸En te kobbegi ni, “Kelugi baŋa kan.”

¹⁹Dok en te ciko lwak ni bed piny i modo; omako ogati abic kede rec aryo-nu, oneno malo i polo, okwao iye winyo, onyinyilo, omio ogati baŋ jo a lube; eka jo a lube te miyo baŋ lwak.

²⁰Gin ducu ocamo, oyeŋ. Ocoko ŋide cem ame oloogi, oromo aditti apar wie aryo ame opoŋ.

²¹Jo ame ocamo onwoŋo welgi mito romo co tutumia abic, a kun mom okwano iye mon kede itino.

²²Cucuttono Yecu te ruyo jo a lube me donyo i yee, me gin tel yo, kat loka tuŋ ca, en koŋ ecik lwak.

²³Ka doŋ otyeko ciko lwak, te yito i wi kidi en kene ka kwayo Obaŋa. A doŋ piny oyuto, onwoŋo en tye kuno kene.

²⁴I kare-nono onwoŋo yee doŋ otyeko kato oko mairo apopol ya i wi tela, kun pii tye apuye, pien yamo onwoŋo abino i tuŋ nyimgi.

²⁵Dyewor i akina ame gwen akoko, en te bino baŋgi kun awot i wi nam i tyene.

²⁶Ento ka jo a lube onene kun awot i wi nam i tyene, tipo komgi te ya oko, kun okobo ni, “Man tipo”, pi lworo ote kuko duro oko.

²⁷Yecu te kop kedgi oyotoyot ni, “Di cunywu, an ennono, kur ilwor wunu.”

²⁸Petero te gamo doge ni, “Rwot, ka in ennono, cwana me abin baŋi i wi pii.”

²⁹En te gamo ni, “Biye.” Petero te ya oko i yee, te wot i wi pii kun bino baŋ Yecu.

³⁰Ka en oneno yamo, te doko alwor oko, daŋ te ero lwiny oko, te redo ni, “Rwot, lara ba.”

³¹Oyotoyot Yecu te ryeyo bade, te gamoro en, kun kobbe ni, “Yin dano ame iyee meri nok. Ŋo omii ikalo akala?”

³²Ka doŋ gin oyito iyi yee, yamo te kwe oko mot.

³³Jo ame tye i yee te wore, kun okobo ni, “Ateni, yin Wot Obaŋa atika.”

³⁴Ka doŋ gin odokoro loka, oyito i wi tela i Genecaret.

³⁵Jo i kabedo-nu ka oŋee, ote cwayo kwena i kabedo ducu ame ceggi i kuno, ote kelo jo luŋ ame komgi lit.

³⁶Gin te bako doggi baŋe ni ogud ayayak me boŋo mere keken, eka jo ducu ame ogudo te caŋ oko aber.