Read lango Matayo 17 Bible Online

Matayo 17 - lango bible

Matayo 17

¹Ame nino abicel doŋ okato, Yecu otero Petero kede Yakobo kede ominnere Lakana, oyito kedgi i wi kidi abor i muŋ.

²Kit kome te lokere oko i nyimgi, waŋe te lyel bala ceŋ, rukkere te doko atar acalo raŋ cen.

³Nen, Muca kede Elia te nen baŋgi kun okobo kede.

⁴Petero te kobbi Yecu ni, “Rwot, ber meicel wan ibedo kan. Ka ce imito, abino gero gonye adek kan, acel meri, acel mea Muca, acel me Elia.”

⁵A kun pwod etye ekop, aco ba, tipo pol aryeny te wumogi ipuk, dwon te ya i pol, ni, “Man en Woda ame amaro; a yia yom i kome, winye wunu.”

⁶Ka jo a lube owinyo man, ote rette aryeba cuny pi lworo adwoŋ.

⁷Yecu te bino baŋgi, ogudogi kun kobbigi ni, “Ya wunu malo; kur ilwor wunu.”

⁸Ka otiŋo waŋgi, mom oneno dano moro, kono ka Yecu kene.

⁹Ame oyito piny iya i wi kidi, Yecu te cikogi ni, “Kur ititti wunu dano moro gin ame ineno wunu, ituno a doŋ ocero Wot a dano iya i akina jo oto.”

¹⁰Jo a lube te penye ni, “Piŋo opwonycik kobo ni Elia myero koŋ bin?”

¹¹En ogamo ni, “Elia bino tuno, bino dwoko jami ducu kakare.

¹²Ento an atittiwu ni, Elia doŋ otyeko bino oko, cite jo mom oŋee, ote time i gin a yigi omito. Wot a dano daŋ obino time arac kite-nono.”

¹³Jo a lube te doŋ niaŋ ni en okobbigi kop i kom Lakana Abatija.

¹⁴Ame doŋ gin otuno baŋ lwak, dano moro te bino rumo cone baŋe, obako doge ni,

¹⁵“Rwot, tim woda-ni ber ba, pien two ekwikwiŋ omake arac meicel; pien tyen apol en rette i mac, kede tyen apol anaka i pi i daŋ.

¹⁶Cite woki akele baŋ jo a lubi, caŋo oloogi oko.”

¹⁷Yecu ogamo ni, “Wun lwagi jo me kare man, iyeewu mom, kitewu doŋ oballe oko; kara abino bedo kedwu naka awene? Abino diyo cunya i komwu ituno awene? Kele wunu baŋa kan.”

¹⁸Yecu te juko cen, cen te ya oko i kome, awobi-nu te caŋ oko i caa-nono.

¹⁹Icennere jo a lube te bino baŋe i muŋ kun openye ni, “Kara ŋo omono wan daŋ ryeme?”

²⁰En te gamo doggi ni, “Pien iyee mewu nok. Ento ateni atittiwu ni, ka kono itye wunu kede iyee acalo nyig koti karadali, ibino wunu kobbi kidi man ni, ‘Mukere i kan oko, ilor kuca’, daŋ bino lor; ginnoro mom bino loyowu. [

²¹Ento gin acalo man mom ya, kono ka pi kwayo Obaŋa kede kanyo kec keken.]”

²²Ame gin ocokere karacel i Galilaya, Yecu okobbigi ni, “Wot a dano obino miye i ciŋ jo,

²³obino neke, ento i ninome adekkere obino cere oko.” Gin te kumo meicel.

²⁴Ka gin otuno i Kapernaum, jo a rao ocoro me ot Obaŋa te bino baŋ Petero, ote penye ni, “Apwonywu mom gelo ocoro me ot Obaŋa?”

²⁵En te gamo ni, “Gelo.” Ka en odonyo i ot, Yecu te geyo penye ni, “Yin itamo niŋo Cimon? Oloc me lobo man orao ocoro kede owalo i baŋ jo a kite mene? Baŋ jogi, kade nyo i baŋ jo ocele?”

²⁶En te gamo ni, “Baŋ jo ocele.” Yecu dok te dok iye ni, “Ka kite-nono, jo megi tye kede kuc.

²⁷Kadi bed amannono, kur doŋ ocan jo-nu. Apee wot i dog nam, ibol golo, iyut rec okwoŋo moko, eka ite yabo doge, ibino nwoŋo iye cekel. Kwany imigi pi mera kede meri.”