Read lango Matayo 18 Bible Online

Matayo 18 - lango bible

Matayo 18

¹I kare-nono jo a lubo Yecu obino baŋe, ote penye ni, “Ŋa ame loo kede dit i loc me polo?”

²En ocwano atin baŋe, omio ocuŋ i akinagi,

³te kobo ni, “Ateni akobbiwu ni, ka mom koŋ ilokere wunu, idoko wunu acalo itino, mom ibino donyo wunu i loc me polo.

⁴Dano ame mwolle kene bala atin-ni en ame loo kede dit i loc me polo.

⁵Dano ame jolo atinnoro acel bala man i nyiŋa, nwoŋo ojolo an.

⁶“Ento dano ame miyo ŋattoro acel i akina jo magi atino-ni ame oye an poto i bal, twara ame otweo kidi rego adwoŋ i ŋute, ote core elwiny kede i dye nam atut.

⁷“Lobo bino neno can pi gin a mio jo poto i bal. Pien gin a mio jo poto i bal myero bin, ento dano a kela gin a mio jo poto, bino neno can!

⁸Ka ciŋi onyo tyeni en a mii ipoto, toŋ oko, ibole kan abor; bedo ber baŋi ka idonyo i kwo ame ciŋi onyo tyeni tuŋ cel mom tye, kato a kono oboli kede ciŋi onyo tyeni tyoryo i mac a mom to.

⁹Ce ka waŋi en a mii ipoto, kole oko, ibole kan abor; bedo ber baŋi ka idonyo i kwo kede waŋi acel, kato a kono boli kede waŋi ryoryo i mac me Geena.

¹⁰“Myero inen ni kur icao wunu ŋattoro acel i kom jo magi atino; pien akobbiwu ni, i polo omalaikagi neno waŋ Pappa a tye i polo didik. [

¹¹Pien Wot a dano obino me laro jo orwenyo.]

¹²Kara wun itamo wunu niŋo? Ka dano tye kede rommi mere mia acel, ka moro acel i akinagi orwenyo oko, en mom bino weko maka pyeraboŋwen wie aboŋwen i wi kidi, te wot yenyo en ame orwenyo ca?

¹³Ka en onwoŋo, ateni akobbiwu ni, yie bedo yom i kome, ame kato maka pyeraboŋwen wie aboŋwen a rik mom orwenyo.

¹⁴Amannono Pappa a tye i polo daŋ mom mito ŋattoro acel i akina jo magi atino-ni oto.

¹⁵“Ka ce ominni obalo balloro baŋi, wot inyutte ballere kun itye wun aryo kede. Ka owinyi, doŋ idwoggo ominni.

¹⁶Ento ka okwero winyi oko, ter ŋattoro acel onyo aryo ocele, me i dog ocaden aryo onyo adek mok kop luŋ.

¹⁷Ka en okwero winyogi, tit baŋ lwak oye an; ento ka okwero winyo lwak oye an, myero en bed bala arokkoro baŋi onyo ara-ocoro.

¹⁸“Ateni akobbiwu ni, ginnoro ducu ame itweo wunu i wi lobo obino tweyo anaka i wi polo, ginnoro ducu ame igonyo wunu i wi lobo obino gonyo daŋ i wi polo.

¹⁹Dok daŋ akobbiwu ni, ka jo aryo i akinawu bino ribere i wi lobo i kom ginnoro ame gin okwayo, Pappa a tye i polo bino timmigi.

²⁰Pien ka jo aryo onyo adek ocokere karacel i nyiŋa, an daŋ atye kannono i akinagi.”

²¹Petero te bino baŋe, penye ni, “Rwot, kara ominna bino timo bal tyen adi baŋa eka ate time kica? Ame romo tyen abiro?”

²²Yecu te kobbe ni, “Mom akobbi ni a romo tyen abiro, ento a romo tyen pyerabiro tyen abiro.

²³“Omio loc me polo rom aroma kede abaka moro a rik omito yiko kop me banyi kede omiro mere.

²⁴A doŋ ocako yiko, okelo baŋe dano a rik tye kede banya ame kato ciliŋ milion.

²⁵Ka onwoŋo ni gin ecul kede mom tye, te ciko ni myero cate, en kede cege anaka itinogi, kede jami mere luŋ, me cul kede banya.

²⁶Amiro-nu te ryebere piny i nyime, te kwaye ni, ‘Ama adwoŋ, koŋ idii cunyi i koma, an abino culli ducu.’

²⁷Amiro-nu te cono adwoŋ, te gonye oko, te weke i kom banya-nono.

²⁸Amiro-nu te kato oko, te rwatte kede amiro wadgi ame tye kede banya mere baŋe ame romo mia acelloro keken; te make oko, odedeo ŋute kun kobo ni, ‘Cul banyana!’

²⁹Amiro wadgi orumo piny ame bako doge ni, ‘Ama, koŋ idi cunyi i koma, an abino culli.’

³⁰En okwero; owoto ocwae ka i buc, ituno ka bino culo banya mere.

³¹Ka omiro wadgi oneno gin otimere-ni, owaŋo yigi meicel, ote wot tero koppere baŋ adwoŋgi, gin te titte gin otimere ducu.

³²Adwoŋ daŋ te lwoŋe, okobbe ni, ‘Yin amiro arac! An onwoŋo doŋ aweki gira oko i banya ca luŋ pien ibako dogi baŋa.

³³Mom myero yin daŋ itim amiro wadwu ikca, acalo an rik atimi kica ca?’

³⁴Owaŋo cuny adwoŋ atek meicel; ote miye baŋ cirikale me wune ituno waŋ ame oculo banya mere luŋ.

³⁵Pappa a tye i polo daŋ bino timowu amannono, ka mom itimo wunu jo kica i cunywu ducu, dano acel acel kede ominnere.”