Read lango Matayo 19 Bible Online

Matayo 19 - lango bible

Matayo 19

¹Ame Yecu doŋ otyeko kobo kop magu, te ya i Galilaya te bino i dul lobo me Judaya a tye loka Jordan.

²Lwak ecipan te lube, en daŋ te caŋogi kuno.

³Oparicayo obino baŋe, ote bite kun openye ni, “Cik ye ni ico ryem dako mere pi kop duc aduca?”

⁴En te gamo ni, “Wun ce mom ikwano wunu ni, cakere i ageyi Acwec ocweogi co kede mon?

⁵Dok okobo ni, ‘Pi mano dano bino weko pappere kede tottere, te moko i kom dako mere, gin aryo ote doko kom acel.’

⁶Kite-nono, gin mom doŋ otye aryo, ento kom acel keken. Gin ame Obaŋa onoto karacel dano kur ket akinagi.”

⁷Dok ote penye ni, “Piŋo Muca rik ociko ni mi waraga me keto nyom, kede ryemo dako?”

⁸En te kobbigi ni, “Pi nwaŋ cunywu omio Muca oye ni iryem wunu monwu, ento cakere i ageyi mom obedo amannono.

⁹Ento akobbiwu ni, dano moro ame ryemo cege, ame mom pi coco, eka te nyomo dako ocele, nwoŋo ocodo cot.”

¹⁰Jo a lube te kobbe ni, “Ka kop i kom ico kede dako mere tye kite-nono, twara jo obedo aboŋo nyomere.”

¹¹Yecu te kobbigi ni, “Jo luŋ mom twero mako koppono, kono ka jo ame omiogi keken.

¹²Pien tye jo mogo ame gin obwoc cakere iyi totogi, ame onywalogi kite-nono; tye jo ocele ame doko obwoc pien nwoŋo jo ocele oroogi oko; tye jo ocele ame gin roye kengi gigi pi loc me polo. Dano ame twero mako koppono, maki.”

¹³Icennere okelo itino baŋe me eket ciŋe i komgi kun ekwao Obaŋa. Jo a lube te jukogi oko.

¹⁴Ento Yecu te kobbigi ni, “Wek wunu itino bin baŋa, kur igeŋgi wunu, pien loc me polo tye pi jo acalo gin.”

¹⁵En oketo ciŋe i komgi, te ya i kuno oko.

¹⁶Nen, dano moro obino baŋe kun penye ni, “Apwony, atim ŋo aber me abed i kwo a perakino odoco?”

¹⁷Yecu te penye ni, “Kara piŋo ipenya pi gin aber? Ŋat aber tye acel keken. Ka imito donyo i kwo, gwok cik.”

¹⁸En te penyo ni, “Cikkene?” Yecu te kobbe ni, “Kur inek, Kur icod cot Kur ikwal, Kur ikel goba i pido:

¹⁹Wor pappi kede totti, kede dok ni, Mar dano wadwu acalo imarre keni.”

²⁰Awobi-nu te kobbe ni, “Magu doŋ atyeko mako ducu; kara ŋo a pwod dok odoŋ?”

²¹Yecu te gamo ni, “Ka imito bedo aber aboŋo roccoro, ape wot icat lim a tye baŋi oko, ite miyo baŋ ocan, eka ite bedo kede lonyo ame ikano i polo; yin doŋ ibin, iluba.”

²²Awobi ka owinyo kodi kop-pu, te wot oko a doŋ aconne acona, pien onwoŋo limmere rik dwoŋ.

²³Yecu okobbi jo a lube ni, “Ateni akobbiwu ni, bino bedo tek meicel, olonyo idonyo i loc me polo.

²⁴An dok akobbiwu ni, twara donyo inaga i waŋ pico yot, kato alonyo idonyo i loc me polo.”

²⁵Olub Yecu ka owinyo kodi kop-pu owuro meicel, ote penye ni, “Kara ŋa a dok twero larre?”

²⁶Yecu onenogi, te kobo ni, “Baŋ dano mom twerre, ento baŋ Obaŋa jami ducu twerre.”

²⁷Petero te gamo ni, “Aco, nen wan oweko jami luŋ, olubi; kara obino nwoŋo ŋo iye?”

²⁸Yecu te gamo ni, “Ateni akobbiwu ni, i kare ame lobo bino doko anyen, ame Wot a dano bino bedo i wi kom me loccere me kwogo, wun jo a doŋ iluba wunu ibino bedo wunu i wi kom me loc apar wie aryo kun iŋolo wunu kop i kom atekere apar wie aryo me Icrael.

²⁹Doŋ dano acel acel a yam oweko udi onyo omego, onyo amego, onyo pappere onyo tottere, onyo itino, onyo lobo pi nyiŋa, en bino nwoŋo jami akato mano tyen mia, daŋ en bino nwoŋo kwo a perakino odoco.

³⁰Ento jo apol ame obedo me agege bino doŋ cen, kede jo odoŋ cen bino bedo me agege.