Read lango Matayo 2 Bible Online

Matayo 2 - lango bible

Matayo 2

¹Ame doŋ onywalo Yecu i Beterekem i lobo Judaya i kare abaka Kerode, oryeko mogo te nen oko kun ya i tuŋ kide, obino i Jerucalem. Ote penyo ni,

²“En ame onywalo me bedo abaka Ojudaya kara tye ka kwene? Pien wan oneno acerrere tuŋ kide, obino me wore.”

³Ka abaka Kerode owinyo kop man, cunye opoto, anaka cuny jo me Jerucalem luŋ aluŋa;

⁴omio en te coko olamdog adoŋo kede opwony-cik me rokgi luŋ, te penyogi ni, “Kricito obino nywale kwene?”

⁵Gin te kobbe ni, “I Beterekem i lobo Judaya, pien adwarpiny yam ocoo oko ni,

⁶‘Yin Beterekem i lobo Juda, yin mom itidi wok kadi acel i akina oloc a jo Juda; pien aloc bino ya i yin, en ame bino kwayo jo mera Icrael.’ ”

⁷Kerode te cwano oryeko i muŋ, gin te niaŋe kare ikome ame acer onen iye.

⁸Eka te cwayogi i Beterekem kun kobbigi ni, “Wun wotu, peny wunu kop i kom atin i yore i yore; ka doŋ ityeko wunu nwoŋo, dwoggo wunu koppere baŋa, me an daŋ awot, awore.”

⁹A doŋ gin owinyo kop abaka, gin owoto ote neno acer a yam koŋ gin oneno i tuŋ kide otelogi, obino olirakino malo kakan ame atin-nu tye iye.

¹⁰Ka gin oneno acer, oyomo yigi, ote lelo atek meicel.

¹¹Ka gin odonyo i ot, ote neno atin, kede tottere Maliam, ote ryebere piny, wore, ote gonyo jamigi me wel ame gin okelo, ote miye mot, jabu kede luban kede murra.

¹²Obaŋa te kwenyorogi i waŋ lek ni kur odok baŋ Kerode, gin te dok turgi deke yo ocele.

¹³A doŋ gin odok oko, amalaika a Rwok te nen baŋ Yucepu i waŋ lek kun kobbe ni, “Ya malo, iter atin gin kede tottere, iriŋ, ilar Miciri, bed wunu kuno ituno ka abino kobbi, pien Kerode bino moyo atin wek enek oko.”

¹⁴En te ya tero atin kede tottere dyewor, te wot i Miciri;

¹⁵naka obedo kuno ituno ka Kerode doŋ oto. Man otimere me kop a Rwot cobere kakare a rik okobo i dog adwarpiny ni, “Rik alwono woda i Miciri.”

¹⁶Kerode ka oneno ni oryeko opale, akemo omake atek; ocwao jo, oneko itino a co luŋ ame tye i Beterekem kede kabedo ducu ame ceggi i laŋete geye i kom itino me akina mwaka aryo, dwogo kede piny, ame porre kede kare a rik oryeko oniaŋe pire.

¹⁷Man te miyo kop a rik obino i dog adwarpiny Jeremia cobere kakare ni,

¹⁸“Dwon owinyere i Rama, kumo kede koko me wi lyel; Lakeri okoko itino mere. En okwero oko ni kur kwe cunye, pien gin doŋ omom.”

¹⁹Ame doŋ Kerode otyeko to, amalaika a Rwot te nen baŋ Yucepu i Miciri i waŋ lek,

²⁰te kobbe ni, “Ya malo iter atin kede tottere, idok i lobo me Icrael, pien jo a rik mito neko atin doŋ ototoa oko.”

²¹En oya, otero atin kede tottere, odwogo i lobo Icrael.

²²Ento ka en dok owinyo ni Arkelao en ame doŋ loo Judaya aka pappere Kerode, en te lworo wot kuno oko, cite ote kwenyoro en i waŋ lek, omie ewoto i lobo me Galilaya.

²³En owoto obedo i boma ame olwoŋo Najaret, me kop a nwaŋ obino i dog odwarpiny cobere kakare ni, “Obino lwoŋe Anajaret.”