Read lango Matayo 20 Bible Online

Matayo 20 - lango bible

Matayo 20

¹“Loc me polo rom aroma kede dano moro won ot ame odilo odiko con pi wako otic i poto olokkere.

²Te yiko kop kedgi ni ebino miyogi denari acel pi nino acel, i ŋe cikeregi en ocwaogi i poto olokkere.

³I caa adek en dok owoto, te neno jo ocele ame acuŋ acuŋa i cuk aboŋo ticgi moro.

⁴En te kobbigi ni, ‘Wun daŋ wot wunu i poto olokka, abino miyowu cul ame oporre.’ Gin daŋ ote wot.

⁵I caa abicel kede caa aboŋwen en dok owoto otimo i kite acellaca.

⁶I akina caa apar wie acel en dok owoto onwoŋo jo ocele ame acuŋ kuno; en te penyogi ni, ‘Piŋo icuŋ wunu acuŋa kan naka ceŋ iyul aboŋo ticcoro?’

⁷Gin te dok iye ni, ‘Dano moro a kono wakwa obedo mom.’ En te daŋ kobbigi ni, ‘Wun daŋ wot wunu i poto olokka.’

⁸A doŋ piny oyuto, won poto te ciko nyampara mere ni, ‘Lwoŋ otic, imigi ocaragi. Cak i kom jo ame otuno icen, iwot kede anaka i komjo ame ogeo bino.’

⁹Jo a rik obino caa apar wie acel, ogamo denari acel acel.

¹⁰Ka jo ogeo obino, gin otamo ni obino miyogi abup akato mannono oko, ento gin daŋ ogamo denari acel acel.

¹¹Ka doŋ ogamo, ote ŋunura i kom won ot,

¹²kun okobo ni, ‘Jo obino icen ca otio pi caa acel keken, ento yin dok iporogi kedwa a kun wan ololle i tic nakanaka i dye ceŋ alyet.’

¹³Ento en okobbi dano acel i akinagi ni, ‘Awotta, an mom timi rac. Yin rik mom icikere keda ni ibino gamo denari acel?

¹⁴Gam meri en ta, woti. An amito miyo dano man ame obino icen arom aroma kedi.

¹⁵Mom myero ati gira i jamina acalo amito? Onyo waŋi oballe pi gin aber a doŋ atio?’

¹⁶Kite-nono jo ame odoŋ cen bino bedo me agege, kede jo me agege bino doŋ cen.”

¹⁷Yecu ka rik mito kwaro tur me wot i Jerucalem, otero jo mere apar wie aryo i muŋ, i yo te kobbigi ni,

¹⁸“Nenu, wan doŋ otye okwaro tur me wot i Jerucalem. Wot a dano obino miye baŋ olamdog adoŋo kede opwony-cik, gin bino ŋolle kop me to.

¹⁹Obino miye baŋ Orok me ŋale, pwode kede del, ote gure i kom yataria, ento i nino me adekere obino cere oko.”

²⁰Toto otino a Jebedayo obino baŋe karacel kede itino mere, te ryebere piny i nyime pi kwaye ginnoro.

²¹En openye ni, “Imito ŋo?” Te gamo ni, “Cik pi itinona aryo-ni ni, ŋat acel bed i laŋeti tuŋ cem, ŋat acel bed i laŋeti tuŋ cam i locci.”

²²Yecu te dok iye ni, “Wun mom iŋeo wunu gin ame ikwao wunu. Itwero wunu mato i kopo me peko ame abino mato kede?” Gin ogamo ni, “Wan otwero.”

²³En te kobbigi ni, “Ibino wunu mato kede ikopona, ento bedo i laŋeta tuŋ cem onyo tuŋ cam, an mom apoko. Bino bedo ka baŋ jo ame Pappa oyiko pirgi.”

²⁴Ka jo ocele apar owinyo, yigi owaŋ i kom omego aryo-nu.

²⁵Yecu te lwoŋogi baŋe, okobbigi ni, “Wun iŋeo wunu ni, oloc Orok bwoogi kede teko, dok odoŋegi nyuto twergi i komgi.

²⁶Mom bino bedo amannono i akinawu; ŋattoro i akinawu ame mito bedo adwoŋ myero bed aticwu,

²⁷dok ŋattoro amit bedo me agege i akinawu, myero bed opii mewu ducu;

²⁸kite acalo Wot a dano daŋ mom obino me jo tiye, ento wek en ti pi jo, dok ete miyo kwo mere me lakoro jo apol.”

²⁹Ame gin aya i Jeriko, lwak ecipan olube.

³⁰Nen, otowaŋ aryo ame obedo piny i ŋet yo, ka owinyo ni Yecu en akato-nono, gin oredo ni, “Akwar Daudi, timwa kica.”

³¹Lwak te jukogi ni, “Liŋ wunu”, ento gin te medo redogi ameda ni, “Rwot, timwa ber, Akwar Daudi.”

³²Yecu ocuŋ, olwonogi te penyogi ni, “Kara wun imito wunu ni atimmiwu ŋo?”

³³Gin odok iye ni, “Rwot, omito waŋwa yabere.”

³⁴Gin ocono Yecu, eka te mulo waŋgi. Oyotoyot ote cako neno piny, ote lube.