Read lango Matayo 21 Bible Online

Matayo 21 - lango bible

Matayo 21

¹Ame gin doŋ ceggi i tuno i Jerucalem, gin odonyo i Betepage i wi kidi me Jeituni. Yecu te oro jo aryo i akina jo a lube.

²Ocikogi ni, “Wot wunu i paco i nyimwu ca. Oyotoyot ibino wunu nwoŋo kana ame otweo, tye gin kede atinnere; gonyu, ikel wunu baŋa.

³Ka dano moro bino kobbiwu kopporo, ibino kobo wunu ni, ‘Rwot en ame amitogi’, cite en bino cwayogi oyotoyot.”

⁴Man otimere me kop a nwaŋ adwarpiny okobo cobere kakare, ni,

⁵“Kob wunu baŋ Cion ni, Nen, abaka meri abino baŋi, kun mwol, obedo i wi kana, i wi atin kana.”

⁶Olub Yecu te wot timo i kite a Yecu ocikogi kede,

⁷ote kelo kana kede atinnere, ote peto boŋŋigi i komgi, en te bedo i wie.

⁸Pol a lwak te peto boŋŋigi i dye yo, jo mogo otoŋo jaŋ yen, te peto iyo.

⁹Lwak otelo yo kede ame alube oredo ni, “Ojana, pak wun Akwar Daudi! Opwo wun ŋat ame abino i nyiŋ Rwot! Pake wunu malo i wi polo!”

¹⁰Ka doŋ odonyo i Jerucalem boma ducu orubere pire, kun okobo ni, “Man kara ŋa-nie?”

¹¹Lwak te kobo ni, “Man en adwarpiny Yecu ame oya i Najareti i Galilaya.”

¹²Yecu odonyo i ot Obaŋa, te ryemo jo ducu ame aceto wil kede owil jami i ot Obaŋa. Oreto meja a jo a loko cente anaka gi-bedo a jo aceto amam,

¹³te kobbigi ni, “Rik ocoo ni, ‘Oda obino lwoŋo ni ot me kwac’, ento wun iloko wunu odoko aduu oyak.”

¹⁴Otowaŋ kede oŋwalo te bino baŋe i ot Obaŋa, en te caŋogi.

¹⁵Ka olamdog adoŋo kede opwony-cik oneno tic me awura ame en otio, kede itino ame oredo i ot Obaŋa, a kun okobo ni, “Ojana, pak wunu Akwar Daudi,” owaŋo yigi.

¹⁶Gin te penye ni, “Yin iwinyo gin a jo-nu okobo?” Yecu te gamo ni, “Awinyo. Rik mom ikwano wunu ni, ‘I dog itino atino kede gin a pwod dot yin iyiko iye pak meri?’ ”

¹⁷En owekogi, oya owoto i paco me Betania, obuto kuno.

¹⁸Odiko ame en adok i Jerucalem, kec oneke.

¹⁹Oneno oduro moro acel i ŋetyo, te gak iye; mom onwoŋo iye ginnoro, kono ka pote keken. Te kobbi oduro ni, “Mom dok ibino nyako nyiggi atwal.” Oduro te tal oko cuto.

²⁰Ka jo a lube oneno, owuro, ote kobo ni, “Oduro otal oko oyotoyot piŋo?”

²¹Yecu te gamo ni, “Ateni akobbi-wu ni, ka kono itye wunu kede iyee, kun mom ikalo wunu akala, kono mom itimo wunu ka gin otimere i kom oduro-ni keken, ento kono daŋ iciko wunu kidi man ni, ‘Mukere, rette i nam’ daŋ te timere.

²²Dok gin ducu ame ibino wunu penyo kun ikwao wunu Obaŋa ibino wunu nwoŋo ka itye wunu kede iyee.”

²³Ka en odonyo i ot Obaŋa, olamdog adoŋo kede odoŋe me Icrael obino baŋe ame en tye ka pwony, ote penye ni, “Twerrene omio itimo kit man? Daŋ ŋa omii twerrono?”

²⁴Yecu ogamo doggi ni, “An daŋ koŋ abino penyowu pennyoro acel; ka idokka wunu iye, an daŋ ate bino tittiwu twerrene omio atimo kit man.

²⁵Batija a Lakana oya i kwene? Oya i baŋ Obaŋa aŋar onyo oya i baŋ dano?” Gin ote bedo pyem kengi kun okobo ni, “Ka okobo ni, ‘Oya baŋ Obaŋa’, en bino penyowa ni, ‘Kara piŋo dok mom iye wunu en!’

²⁶Ento dok ka okobo ni, ‘Oya baŋ dano’, olworo lwak; pien gin luŋ oŋeo ni Lakana obedo adwarpiny.”

²⁷Omio gin te dokki Yecu ni, “Wan okwia giwa.” Yecu daŋ te kobbigi ni, “An daŋ mom abino kobbiwu twerrene omio atimo kite man.

²⁸“Wun itamo wunu niŋo? Lo moro onwoŋo tye kede awobe mere aryo. En owoto baŋ atin me agege, te cike ni, ‘Atinna, wot tin iti tic i poto olok.’

²⁹En te gamo ni, ‘Mom abino wot’; icennere en oŋut, owoto iye.

³⁰Lo-nu te wot baŋ awo bi me aryo, te kobbe kite kop acellaca; en te gamo ni, ‘Adwoŋ, awot’, ento naka mom te wot.

³¹I kom jo-nu aryo-nu ŋa ame otimo gin a pappere omito?” Gin te gamo ni, “Awobi me agege.” Yecu te kobbigi ni, “Ateni akobbiwu ni, oraocoro kede mon ame ococo bino geyo donnyiwu i loc Obaŋa.

³²Pien Lakana rik obino baŋwu kun lubo yo me kite atira, wun ikwero ye wunu en oko; ento ora-ocoro kede mon ame ococo oye en. Dok daŋ ka ineno wunu gin otimere, mom ibin iloko cunywu me ye en.

³³“Koŋ iwiny wunu carokop ocele. Rik tye won ottoro ame opito poto olokkere, te guro oko kede cel, daŋ te kunyo iye bur me biyo pige, te gero pem, te joko baŋ opur, eka te wot oko i lobo ocele.

³⁴Ka kare me pwono doŋ ceggi, en te cwayo omiro mere baŋ opur ni wot om nyig olokkere.

³⁵Opur te mako omiro mere, ote pwodo acel, acel ote neko oko, en ocele mere ote napo kede gweŋ.

³⁶En dok te medde cwayo omiro ocele apol ame kato ame eteko cwayo ca oko, gin daŋ ote timogi i kite acellaca.

³⁷Icennere en te ewayigi wode ikome kun kobo ni, ‘Gin bino woro woda.’

³⁸Ento ka opur oneno wode ote kobo kengi kengi ni, ‘Kom man en ale-lim: biye wunu, oneke oko, me lim eleyo: nono bed megwa.’

³⁹Omake ote core oko teŋe i poto olok, ote neke oko.

⁴⁰Kara won poto olok ka bino tuno en bino timo ŋo i kom opur-ru?”

⁴¹Gin, ote gamo ni, “En bino neko jonu i kite to arac, eka te joko poto olok baŋ opur ocele ame twero miye nyige ka kare oromo.”

⁴²Yecu te gamo doggi ni, “Rik mom ikwano wunu i coc a yam ocoo, ni, ‘Kidi ame ogedo okwero, en ame odoko kidi adwoŋ me gwic ot; man en tic a Rwot, en gin me awura baŋwa?’

⁴³Pi mano atittiwu ni, loc Obaŋa obino kwanyo oko i baŋwu, obino miyo baŋ rok ame bino nyako nyig ame oporre iye. [

⁴⁴Dano ame rette i kom kidi man, bino ŋidde oko atitino; ento ka kidi man orette i kom ŋattoro, bino ŋinyo oko.]

⁴⁵Ka olamdog adoŋo kede Oparicayo owinyo carokoppere, gin oniaŋ ni en okobo kop-pi i komgi.

⁴⁶Gin otemo make, ento ote lworo lwak oko pien lwak ŋeo ni en adwarpiny.”