Read lango Matayo 22 Bible Online

Matayo 22 - lango bible

Matayo 22

¹Yecu dok okobo kedgi i carokop, ni,

²“Loc me polo rom aroma kede abaka moro a rik oyiko arama me-nyom a wode

³te oro omiro mere me lwoŋo jo a rik olwoŋo i arama me nyom, gin te kwero bino oko.

⁴Dok te oro omiro ocele kun kobo ni, ‘Wotu, ititti wunu jo ame olwoŋo ni, An doŋ atyeko yiko cam, oroyina kede roce olobakino doŋ onekogi oko, jami luŋ doŋ oyiko oko; biye wunu i arama me nyom.’

⁵Ento gin mom oketo cunygi iye, ote wot gigi oko; ŋat acel owoto i poto mere, ŋat ocele owoto i cato willere,

⁶jo doŋ te mako omiro mere, te timo kop me lewic I komgi, eka ote nekogi oko.

⁷Akemo omako abaka te cwayo monnyere, te neko onek-ku, te waŋo bomagi oko.

⁸Dok en te kobbi omiro mere ni, ‘Arama doŋ oyiko oko, cite jo a rik ocwanogi mom oromo bino iye.

⁹Pi mannono wot wunu i yo adoŋo, ilwoŋ wunu jo ame ibino wunu nwoŋo, me gin bin i nyom.’

¹⁰Omiro-nu te wot iyo, ote wako jo ame gin onwoŋo luŋ, jo areco kede jo abeco, wele te poŋ i nyom.

¹¹“Ka abaka obino me neno wele te dok neno lo moro kuno ame mom oruko ruk me nyom.

¹²Te penye ni ‘Awotta, kara idonyo kan i yo mene ame rukki me nyom daŋ mom-mie?’ En oliŋ aliŋa.

¹³Omio abaka te ciko oticcere ni, ‘Twe wunu tyen lo-nu kede ciŋe, bole wunu i piny acol a tye oko; kuno bino bedo iye koko kede kayo lak.’

¹⁴Pien jo ame olwoŋo pol, ento ame oyero nok.”

¹⁵Oparicayo te wot poro kop kite a myero gin omake kede i kopporo a ya i doge.

¹⁶Gin te oro baŋe jo a lubogi karacel kede jo a Kerode, ote penye ni, “Apwony, wan oŋeo ni yin dano me ateni, dok mom iparo pi dano moro pien mom ineno dano i oko cite ipwonyo yo Obaŋa i ateni.

¹⁷Tittiwa in iparo niŋo, myero ogelli Kaicari ocoro onyo mom?”

¹⁸Ento Yecu te ŋeyo kec yigi oko, te kobbigi ni, “Kara ibita wunu piŋo, wun ogoba?

¹⁹Koŋ inyutta wunu lim ame ogelo kede ocoro.” Gin te kelle ciliŋŋoro.

²⁰Te penyogi ni, “Cal kede coc ame ogoro lye-ni mea ŋa-nono?”

²¹Gin te gamo ni, “Mea Kaicari.” En te dok iye ni, “Pi mannono dwok wunu baŋ Kaicari jami a Kaicari, jami Obaŋa dwok wunu baŋ Obaŋa.”

²²Ka gin owinyo, owure meicel, ote ya i baŋe, ket gigi oko.

²³I nino-nono Ocadukayo mogo obino baŋ Yecu, jo-ni gin jo ame kobo ni jo oto pe cer.

²⁴Gin okelo peny baŋe ni, “Apwony, Muca nwaŋ okobo ni, ka ŋattoro oto aboŋo nywalo atin, ominnere myero lak dako mere, me nywal ominnere otino.

²⁵Aco, nwaŋ tye jo abiro i akinawa ame gin omego. Dano me agege onyomo dako te to oko kun mom oweko atinnoro, eka te weko dako baŋ ominnere.

²⁶Dano me aryo mere daŋ amannono, kede dano me adekkere, naka tyeko gin abiro luŋ.

²⁷I agikki mere dako daŋ te to oko.

²⁸Kara i kare me cer, dan-nu bino cik aŋa i akina jo abiro-nu? Pien gin luŋ obedo kede.”

²⁹Ento Yecu te dokkigi iye ni, “Irwenyo wunu, pien ikwia wunu coc yam ocoo, anaka teko Obaŋa daŋ ikwia wunu.

³⁰Pien i kare me cer jo mom bino nyomere, ento jo bino bedo bala omalaika ame i polo.

³¹Ento ka i kom cer a jo oto, wun ce mom ikwano wunu kop ame Obaŋa rik okobbiwu ni,

³²‘An Obaŋa Iburaim, kede Obaŋa Icaka, kede Obaŋa a Yakobo?’ En mom Obaŋa ajo oto, ento mea jo akwo.”

³³Ka lwak owinyo, owuro pwonnyere meicel.

³⁴Ka Oparicayo owinyo ni Yecu otwoo dog Ocadukayo oko, gin te cokere karacel.

³⁵Dano moro acel i akinagi te bite kun penye ni,

³⁶“Apwony, i kom cik luŋ, mene ce ame pire dit akato?”

³⁷En te kobbe ni, “Mar Rwot Obaŋani kede cunyi luŋ, kede tiponi lung, kede tammi luŋ.

³⁸Man en cik adwoŋ, daŋ me agege.

³⁹Me aryo mere ame rom kede daŋ ene, ni, Mar dano wadwu acalo imarre keni.

⁴⁰I kom cik aryo-ni kop ducu a tye Cik kede buke odwarpiny ocuŋ iye.”

⁴¹Ka Oparicayo doŋ ocokere karacel Yecu okelligi peny ni,

⁴²“Wun itamo wunu niŋo i kom Kricito? Kara en akwar ŋa?” Gin te gamo ni, “En akwar Daudi do.”

⁴³En te penyogi ni, “Kara piŋo dok Cuny Acil omio Daudi olwoŋe ni Rwot? Pien rik okobo ni,

⁴⁴‘Rwot okobbi Rwotta ni, Bed i laŋeta tuŋ cem, i kabedo me kwogo, ituno ka abino keto okworri piny i te tyeni.’

⁴⁵Kara Daudi olwoŋe ni Rwot kittono, en dok bedo akwarre niŋo?”

⁴⁶Dano moro mom doŋ romo dokke i kopporo, dok daŋ cakere i nino-nono dano moro mom dok otiŋere me penye kopporo.