Read lango Matayo 23 Bible Online

Matayo 23 - lango bible

Matayo 23

¹Icennere Yecu okobbi lwak kede jo a lube ni,

²“Opwony cik kede Oparicayo bedo i kom a Muca;

³pi mannono kop ducu ame gin pwonyowu kede, ti wunu daŋ ite mako wunu, ento gin ame gin tio, kur iti wunu; pien gin kobo akoba keken, mom otio.

⁴Gin tweo yec apek, a yeyo tek, ote keto i wi gwok jo, ento gin ikomgi mom koŋ oniŋo kede nyako ciŋgi.

⁵Ticgi ducu gin tio ka ni jo nengi; pien oyaro pulakterigi[3] bedo alac, omedo ayayak me boŋŋigi bedo aboco meicel,

⁶dok daŋ omaro kabedo me kwogo i dog cem, kede kome me dito i kacokere,

⁷dok omito ni jo motgi i cuk, dok daŋ ni jo wadgi lwongi ni, Rabbi.

⁸Ento wun mom myero lwoŋwu ni, Rabbi, pien apwonywu tye acel, wun ducu omego.

⁹Dok daŋ kur ilwoŋ wunu dano moro ni papawu i wi lobo, pien Papawu tye acel, en ame tye i polo.

¹⁰Dok daŋ kur lwoŋowu ni opwony, pien apwonywu tye acel, en Kricito.

¹¹Dano ame adwoŋ a loo i akinawu myero bed aticwu.

¹²Dano ame kette kene ni etye malo, obino dwoke piny, ento ŋat a mwolle kene, obino tine malo.

¹³“Ibino wunu neno can, wun opwony-cik kede Oparicayo, wun ogoba! Pien iceggi wunu jo doggola loc me polo oko; wun ikomwu mom idonyo wunu iye, dok daŋ igeŋo wunu jo a mito donyo iye oko. [

¹⁴Ibino neno wunu can, wun opwony-cik kede Oparicayo, wun ogoba! Pien imao wunu udi a mon a coggi oto, dok ikwao wunu Obaŋa nakanaka me gobagoba; kop ame obino ŋolo i wiwu bino bedo pek akato.]

¹⁵Ibino wunu neno can, wun opwonycik kede Oparicayo, wun ogoba! Pien iloŋo wunu piny i wi nam kede peto piny i wi tela pi miyo dano acel loko dini mere me dwog i megwa, ento ka doŋ olokere, imie wunu doko atin me Geena ame rom aroma kedwu tyen aryo.

¹⁶“Ibino wunu neno can, wun ope jo a waŋwu oto, ame ikobo wunu ni, ‘Ka dano okwoŋo kede ot Obaŋa, kopporo bedo mom iye, ento ka okwoŋo kede jabu me ot Obaŋa, kwoŋŋere bino make,’

¹⁷Wun otowaŋ amiŋ! Kara mene a pire dwoŋ akato, jabu onyo ot Obaŋa ame omio jabu bedo acil?

¹⁸Dok wun ikobo wunu ni, ‘Ka dano okwoŋo kede keno lam, kopporo mom iye, ento ka okwoŋo kede mot ame omio ame opyelo i wie, kwoŋŋere bino make,’

¹⁹Wun jo a waŋwu oto! Kara mene ame pire dwoŋ akato, mot ame omio onyo keno me lam, ame en a mio mot omio iye bedo acil?

²⁰Dano ame okwoŋo kede keno me lam, nwoŋo okwoŋo kede keno anaka gin ame opyelo iye luŋ.

²¹Dano ame kwoŋo kede ot Obaŋa, nwoŋo okwoŋo kede ot Obaŋa anaka ŋat a bedo iye daŋ.

²²Dano ame kwoŋo kede polo, nwoŋo okwoŋo kede kom me loc Obaŋa anaka ŋat ame bedo iye.

²³“Ibino wunu neno can, wun opwony-cik kede Oparicayo, wun ogoba! Pien imio wunu dul acel me apar me apuruku kede malakwaŋ kede kummin, ento kop adoŋo me cik ijalo wunu ata, acalo ŋolo kop atira, timo kica kede bedo jo a genne. Magu ducu myero itim wunu, kun mom iweko wunu maca daŋ.

²⁴Wun ope jo a waŋwu oto, ilio wunu ober i pii oko, imwonyo wunu inaga!

²⁵“Ibino wunu neno can wun opwony-cik kede Oparicayo, wun ogoba! Pien ilwoko wunu ŋe ikopo kede cani me bed acil, ento yigi opoŋ iye yako jo kede mit a mom jukere.

²⁶Yin Aparicayo a waŋi oto, koŋ ikwoŋ lwoko yi ikopo kede cani, en ami ŋee te bedo acil.

²⁷“Ibino neno wunu can, wun opwony cik kede Oparicayo, wun ogoba! Pien irom wunu kede lyele ame opuo i loba atar, kun i tuŋ oko onen aber, ento yigi opoŋ iye coggi a jo oto, kede jami ducu areco ame pe olony.

²⁸Wun daŋ amannono i tuŋ oko inen wunu baŋ jo ni wun jo a kitewu atira, ento yiwu opoŋ i goba kede tim areco.

²⁹“Ibino neno wunu can, wun opwony-cik kede Oparicayo, wun ogoba! Pien icano wunu gweŋe i wi lyelle odwarpiny, gin ame rik ogero pi po i kom jo a kitegi atira wun iyiko wunu wek nen aber,

³⁰dok ikobo wunu ni, ‘Kono wan rik obedo i kare a kwarowa, kono rik mom onotte kedgi ioonyo remo odwarpiny.’

³¹Kite-nono itucere wunu kenwu ni wun ikwae a jo a nwaŋ oneko odwarpiny.

³²“Ber, cobu giwu tic a kwarowu.

³³Wun twolle, itino ororo, kara ibino wunu bwot niŋo i ŋolo kop me bolowu i Geena?

³⁴En omio abino oro odwarpiny baŋwu, kede jo aryek, kede opwony. Jo mogo i akinagi ibino neko wunu kun igurogi wunu i kom yataria, mogo ibino pwodo wunu i del i kacokere mewu kun iryemogi wunu paco i paco;

³⁵wek remo ducu a mom tye i balloro ame oonyo i wi loba bed i wiwu, cakere i kom remo Abel ame mom i bal ituno kede i kom remo a Jekeria wot a Barakia, ame rik ineko wunu i akina kabedo acil kede keno me lam.

³⁶Ateni akobbiwu ni, kop magu ducu bino bedo i wi jo me kare man.

³⁷“Jerucalem, Jerucalem, yin ame ineko odwarpiny, inapo jo ame oorogi baŋi kede gweŋ, tyen adi ame rik amito coko itino meri calo min gweno coko itino mere i te bwome, ento wun mom iye wunu!

³⁸Nen otwu doŋ ojalliwu giwu, odoŋ nono.

³⁹Pien akobbiwu ni, mom dok ibino nena wunu, ituno ka ibino wunu kobo ni, ‘Opwo wunu ŋat ame bino i nyiŋ Rwot!’ ”