Read lango Matayo 24 Bible Online

Matayo 24 - lango bible

Matayo 24

¹Yecu oya i ot Obaŋa, te medde kede wottere, jo mere a lube te bino baŋe me nyutte gedo me ot Obaŋa.

²En te dokkigi iye ni, “Ineno wunu jami magi ducu? Ateni akobbiwu ni, mom obino weko kidi moro kan acel ame ododde i wi wadgi, a mom obino coro piny.”

³Ka en doŋ obedo piny i wi kidi me Jeituni, jo a lube obino baŋe i muŋ, ote kobbe ni, “Tittiwa, man bino bedo awene ba? Dok gin aŋo ame bino nyuto dwogoni kede agikki piny me kare man?”

⁴Yecu te gamo ni, “Gwokere wunu ba, ŋattoro kur rwenywu be.

⁵Pien jo apol bino bino i nyiŋa, ame obino kobo ni, ‘An a Kricito’, gin bino miyo jo apol rwenyo.

⁶Dok ka ibino winyo wunu pi mony kede amut me mony, cunywu kur poti, pien mano myero timere, ento agikki nwoŋo pwod mom.

⁷Pien rok bino romo kede rok, loc bino romo kede loc ocele, kec kede oyeŋo bino bedo i kabedo apol;

⁸mano ducu pwod en ageyi me rem.

⁹“I kare-nu obino keto erupe i komwu me ite neno wunu can, obino nekowu, jo luŋ bino dagowu pi nyiŋa.

¹⁰Dok i kare-nono jo apol bino poto, obino keto erupe i komgi kengi kengi.

¹¹Odwarpiny ame ogoba bino pello apol, obino rwenyo jo apol.

¹²Pi tim areco ame bino medde bino miyo mar a jo apol kwe oko.

¹³Ento ŋat ame kanyakino ituno i agikki, en bino larre.

¹⁴Dok amut man aber me loc Obaŋa obino rabo i wi podo luŋ, me te bedo caden baŋ rok ducu; icennere agikki bino tuno.

¹⁵“Doŋ ka ibino neno wunu ginnoro me kwer ame balo cuny jo, a rik adwarpiny Daniel orabo pire, kun ocuŋ i kabedo acil (dano ame kwano myero niaŋ iye),

¹⁶i karenono jo a tye i Judaya myero riŋ oko i wi kiddi.

¹⁷Dano ame tye i wi ot kur dok yitto piny ni ebino kwanyo jami i ode;

¹⁸kede dano ame tye i poto kur dok cen ni edok omo rukkere.

¹⁹Mon ayac bino neno can i kare-nono, kede mon ame doto itino!

²⁰Kwa wunu Obaŋa wek ŋwecwuni kur timere i cwir, onyo i cabit.

²¹Pien i kare-nono bino: bedo can adwoŋ, kite a yam pe ru onen, ya i geyi keto lobo tuno naka tin, daŋ pe dok bino nen.

²²Kono Rwot mom ojwiko kare-nu, kono dano moro mom obwot; doŋ pi jo ame oyero, en omio obino jwiko kare-nu oko.

²³I kare-naca ka dano moro bino kobbiwu ni, ‘Neno, Kricito tye kane’, onyo ni, ‘Tye kaca’, kur iye wunu,

²⁴pien jo ame kobo ni gin obedo Kricito bino pello, anaka odwarpiny ame ogoba, bino nyuto anyuttogo kede taŋo, wek ka twerre gin orweny anaka jo ame oyero.

²⁵Nen ba, doŋ atyeko tittiwu con.

²⁶Doŋ ka gin bino kobbiwu ni, ‘En tye i tim’, kur iwot wunu kuno, onyo ni, ‘Tye i tyelo’, kur iye wunu.

²⁷Pien acalo lutkot ya i tuŋ kide caro naka tuŋ to, dwogo a Wot a dano daŋ bino bedo amannono.

²⁸Kan a kom oto tye iye, acut daŋ bino cokere kuno.

²⁹“Oyotoyot ka can adwoŋ me karenono otum oko, bino bedo acalo rik ocoo ni, ‘Ceŋ bino doko col, dwe mom bino ryeny, acer luŋ bino ya i polo, ote rutte piny, teko i polo bino yeŋere’;

³⁰eka gin a nyuto Wot a dano te bino nen i polo, I kare-nono atekere ducu me wi lobo bino kumo, cite gin bino neno Wot a dano kun bino i wi pol me polo, kun tye kede teko kede kwogo adwoŋ.

³¹En bino oro omalaika mere kun gwara kok aloŋo, gin bino coko jo mere ame oyero, iya i twok piny aŋwen ducu, kun ya i tuŋ agikki polo tuŋ cel ituno kede i agikki polo tuŋ ocele.

³²“Mak wunu pwony ame oya i kom oduro: ka jaŋe onyinyiro, pote olot, iŋeo wunu ni oro doŋ ceggi.

³³Amannono wun daŋ, ka ineno wunu magi ducu, ber iŋe wunu ni, en doŋ tye ceggi, tye i doggola.

³⁴Ateni akobbiwu ni, lwagi jo man mom bino tum, ituno ka koŋ magi-nogo luŋ otimere.

³⁵Polo kede lobo bino tum oko, ento kop ame an apwonyo mom bino tum.

³⁶“Ento nino-nono, onyo caa-nono, ŋattoro a ŋeo pire mom tye, kadi amalaika ame tye i polo, kadi Wod. Kono ka Papo keken.

³⁷Pien dwogo a Wot a dano bino bedo bala kare a Nua.

³⁸I kare ca ame nwaŋ abwal pii mom ru opoŋ i wi lobo, jo nwaŋ camo, mato, awobe kede anyira onyomere, ituno i nino-nono ame rik Nua odonyo kede i yee;

³⁹gin mom oŋeo ginnoro ituno ka abwal pii opoŋ, te mologi oko ducu. Bino bedo kite-nono ka Wot a dano bino dwogo.

⁴⁰I kare-naca jo aryo bino bedo i poto; obino kwanyo ŋat acel, ŋat acel te doŋ.

⁴¹Mon aryo bino bedo ka rego; obino kwanyo ŋat acel, ŋat acel te doŋ.

⁴²Kiu wunu, pien mom iŋeo wunu ceŋ a Rwotwa bino bino iye.

⁴³Ento myero iŋe wunu man, ni, kono won ot rik ŋeo kare ame ayak bino tuno iye, kono okio, mom oweko jo oturo ode.

⁴⁴Pi mannono, wun daŋ bed ame doŋ iyikere wunu, pien Wot a dano bino tuno i caa a mom itamo wunu.

⁴⁵“Agwok ot ame agen, aryek, en ŋa, ame adwoŋŋere bino weko jo i ode i te loccere, wek opokkigi cam megi i kare a mitte?

⁴⁶Tye kede winyo amironono ame adwoŋŋere, ka odwogo, bino nwoŋo otimo kite-nono.

⁴⁷Ateni akobbiwu ni, bino keto jam i mere luŋ i twerrere.

⁴⁸Ento ka amiro arac-cu okobo i cunye kene kene ni, ‘Adwoŋ doŋogal wok’,

⁴⁹ento te cako pwodo omiro wadgi kede aŋeca, kun camo, mato, dok mer,

⁵⁰won amiro-nono bino dwogo i nino a mom etamo, kede i caa a mom en ŋeo,

⁵¹bino ŋoŋolo en, te kette i akina ogoba; kuno bino bedo iye koko kede kayo lak.