Read lango Matayo 25 Bible Online

Matayo 25 - lango bible

Matayo 25

¹“I kare-naca loc me polo bino rom aroma kede anyira apar ame rik otero taragi, ote wot me wot jolo anyom.

²Jo abic i akinagi onwoŋo omiŋo, jo abic onwoŋo oryeko.

³Anyira amiŋ otero taragi, ento mom otero moo;

⁴ento anyira aryek ca otero moo i cupagi karacel kede taragi.

⁵Ame anyom pwod ogal, gin ducu nino te mako waŋgi, ote nino oko.

⁶I dye idiŋ te bedo woo ni, ‘Anyom otuno oko; biye ojole wunu.’

⁷Anyira ca ducu te ya oko, ote yiko taragi.

⁸Anyira amiŋ te kwayo anyira aryek ca ni, ‘Konywa wunu ba kede moo, tarawa oto oko.’

⁹Anyira aryek te gamo ni, ‘Calo bala mom romowa karacel kedwu. Tikatika ame iwoto iwilo wunu megwu i duka.’

¹⁰Ame gin pwod owoto me wilo moo, anyom te bino oko; jo a nwaŋ oyikere te donyo karacel kede i arama me nyom, ote cego doggola oko.

¹¹Icennere anyira ca te dwogo, ote kwayo ni, ‘Adwoŋ, adwoŋ, yabwa ba!’

¹²Anyom te dok iye ni, ‘Ateni akobbiwu ni, an akwiawu gira.’

¹³Pi mannono kiu wunu, pien mom iŋeo wunu nino kadi caa.

¹⁴“Rorom kede lo moro ame awot weno, eka te lwoŋo omiro mere, te wekkigi limmere.

¹⁵Te miyo dano acel ciliŋ tutumia abic, baŋ dano acele te miyo ciliŋ tutumia aryo, kede baŋ en ocele tutumia acel; omio dano acel acel dullere a romo en itic kede, cite en te wot gire oko.

¹⁶Dano ame rik omio ciliŋ tutumia abic te cako tic kede oyotoyot, daŋ te nwoŋo en ocele tutumia abic.

¹⁷Won ciliŋ tutumia aryo daŋ amannono te nwoŋo tutumia aryo ocele.

¹⁸Ento dano a rik ogamo ciliŋ tutumia acel owoto te kunyo piny, te kano lim adwoŋŋere oko.

¹⁹A doŋ kare okato alac, adwoŋ omiro-nu te dwogo oko, te kwano lim karacel kedgi.

²⁰Dano a rik ogamo ciliŋ tutumia abic te bino baŋe kun okelo ciliŋ ocele tutumia abic, te kobbe ni, ‘Adwoŋ, rik omia ciliŋ tutumia abic; neno dok anwoŋo ciliŋ ocele tutumia abic.’

²¹Adwoŋŋere te gamo ni, ‘Ber meicel, yin amiro aber ame genne. Rik yin agen i kom jami anok, abino miyi twer i kom jami apol. Dony giri i yomcuny adwonŋi.’

²²Won ciliŋ tutumia aryo daŋ te bino baŋe kun okelo ciliŋ tutumia aryo ocele, te kobbe ni, ‘Adwoŋ, rik imia ciliŋ tutumia aryo; neno, dok anwoŋo ciliŋ tutumia aryo ocele.’

²³Adwoŋŋere te gamo ni, ‘Ber meicel, yin amiro aber ame genne. Rik yin agen i kom jami anok, abino miyi twer i kom jami apol. Dony giri i yomcuny adwonŋi.’

²⁴Dano ame rik omio ciliŋ tutumia acel daŋ te bino baŋe, te kobo ni, ‘Adwoŋ, nwaŋ aŋeo ni yin i dano agwa. Ikao i kan a mom icoo, igwaro i kan a mom ionyo iye;

²⁵omia abedo kede lworo, ate wot kano ciliŋ meri piny i lobo. Neno, giri en.’

²⁶Ento adwoŋŋere te dok iye ni, ‘Yin amiro arac, ame komi wac. Yam iŋeo ni akao i kan a mom acoo, agwaro i kan a mom aonyo iye?

²⁷Kara ŋo omoni tero limma baŋ jo beŋne, me wek ka adwogo, anwoŋ limma kede agoba mere?

²⁸Gam wunu ciliŋ i baŋe oko, mi wunu baŋ won ciliŋ tutumia apar.

²⁹Pien ŋat acel acel a mere tye obino miye, te durre baŋe; ento ŋat a mere mom obino gamo anaka gin a tye baŋe oko.

³⁰Amiro ame konnyere pe ca bole wunu i colpiny a tye oko; kuno bino bedo iye koko kede kayo lak.’

³¹“I kare ame Wot a dano bino dwogo kede kwogo mere karacel kede omalaika mere ducu, en bino bedo i wi kom loccere me kwogo.

³²Rok luŋ bino cokere karacel i nyime, en bino poko akinagi papat, bala akwat ame poko romi i akina dyegi.

³³En bino keto rommi i bade tuŋ cem, kede dyegi i bade tuŋ cam.

³⁴Cite abaka bino kobbi jo i bade tuŋ cem ni, ‘Biye wunu, wun jo ame Pappa omiowu winyo, igam wunu loc ame oyiko pirwu geye i acakki piny.

³⁵Pien rik ka kec neka, wun imia wunu cem; ka oryo pii cira, wun imia wunu amato; ka rik a welowu, itera wunu i ot;

³⁶ame atye onoro, iruka wunu; a rik koma lit, ibino wunu baŋa; ame atye i buc, ilima wunu.’

³⁷Jo ame kitegi atira bino gamo ni, ‘Rwot, rik oneni awene ame kec aneki, ote miyi cem; onyo a rik oryo pii ociri, ote miyi imato?

³⁸Wan oneni awene ame i welo, ote teri i ot; onyo ame itye onoro, ote ruki?

³⁹Wan oneni awene ame komi lit onyo ame itye i buc, ote limi?’

⁴⁰Abaka bino dokkigi iye ni, ‘Ateni akobbiwu ni, gin ame itimo wunu i kom dano acel i akina omega atino-ni, mano itimo wunu an,’

⁴¹Doŋ icennere en bino kobbi jo i bade tuŋ cam ni, ‘Wun jo ame oceno, wot wunu oko i nyima, i mac a mom to ame oyikki Catan kede omalaika mege.

⁴²Pien rik ka kec aneka, mom imia wunu cem; ka oryo pii ocira, mom imia wunu amato;

⁴³ame rik a welowu, mom itera wunu i ot; ame atye onoro, mom iruka wunu; a rik koma lit onyo ame atye i buc, mom ilima wunu.’

⁴⁴Cite gin daŋ obino gamo ni, ‘Rwot, rik oneni awene ame kec aneki, onyo ame oryo pii ciri, onyo ame i welo, onyo ame itye onoro, onyo ame komi lit, onyo ame itye i buc, mom okonyi?’

⁴⁵En bino dokkigi iye ni, ‘Ateni akobbiwu ni, Gin a mom itimo itimo wunu i kom ŋattoro acel i akina jo-ni atino-ni, mano nwoŋo mom itimo wunu i koma,’

⁴⁶Cite gin bino wot i can a mom tum, ento jo ame kitegi atira bino wot i kwo a perakino odoco.”