Read lango Matayo 26 Bible Online

Matayo 26 - lango bible

Matayo 26

¹Ame Yecu doŋ otyeko kobo kop magu luŋ, en te kobbi jo mere a lube ni,

²“Wun iŋeo wunu ni odoŋ nino aryo me te bedo ecuban me Kato, eka ote bino miyo Wot a dano me gure i kom yataria.”

³I kare-nu olamdog adoŋo kede odoŋe me Ojudaya ocokere karacel i dyekal alamdog adwoŋ ame nyiŋe Kayapa,

⁴ote poro kop karacel me mako Yecu kede ryeko me ote neke.

⁵Ento gin te kobo ni, “Pe i kare me ecuban, mio lwak bino tugere.”

⁶Ame Yecu tye i Betania tuŋ a Cimon adobo,

⁷dako moro obino baŋe kun tye kede adomo moo a ŋwece kur ame wellere dwoŋ, oonyo i wie kun en tye i dog cam.

⁸Ka jo a lube oneno, yigi owaŋ, ote kobo ni, “Man obalo nono piŋo?

⁹Pien kono ocato moo man, kono okelo lim abup me amia baŋ ocan.”

¹⁰Ka Yecu oŋeo, okobbigi ni, “Kara icano wunu dan-ni piŋo? En otio tic aber i koma.

¹¹Ocan itye wunu kedgi nino luŋ, ento an mom abino bedo kedwu nino luŋ.

¹²Moo man en oonyo i koma me eyik kede koma me ayika.

¹³Ateni akobbiwu ni, i wi podo luŋ kan ame obino tito iye amut aber-ri, obino kobo iye gin a dako-ni otio, me poyo en.”

¹⁴I kare-nono dano acel i akina jo apar wie aryo, nyiŋe Juda me Keriot, owoto baŋ olamdog adoŋo,

¹⁵te penyogi ni, “Ibino miya wunu ŋo, ka an abino miye baŋwu?” Gin te cule kede ciliŋ me kare naca pyeradek.

¹⁶Cakere i kare-naca en te yenyo kare aber me miyo Yecu baŋgi.

¹⁷I nino me agege me camo Ogati a Tobi Mom iye, jo a lubo Yecu obino baŋe te penye ni, “Imito ni owot oyik tuŋ kwene me icam iye cam me Kato?”

¹⁸En te gamo ni, “Wot wunu i Jerucalem baŋ ŋadi ite kobbe wunu ni, ‘Apwony okobo ni, karena doŋ ceggi. Abino camo Kato baŋi, karacel kede jo a luba.’ ”

¹⁹Jo a lube te timo acalo Yecu ocikogi, ote yubo cam me Kato.

²⁰Ame piny doŋ oyuto, en obedo piny i dog cem karacel kede jo a lube apar wie aryo.

²¹A doŋ gin tye ka cam, Yecu te kobo ni, “Ateni akobbiwu ni, ŋat acel i akinawu bino keto erupe i koma.”

²²Gin te conne meicel, eka ote ero penye acel acel ni, “Apwony, an ce?”

²³En te gamo ni, “Dano ame ogweo wan kede i tabo acel, en a bino keto erupe i koma.

²⁴Wot a dano awot acalo yam ocoo i kome; ento dano ame aketo erupe i kom Wot a dano-nu, kite ame ebino neno can kede! Onwoŋo kono obedo ber, dano-nono kono rik pe onywalo.”

²⁵Juda ame oketo erupe i kome te penye ni, “Rabbi, an ce?” En te dok iye ni, “Yin ikobo giri.”

²⁶Ame gin pwod acamo cem, Yecu omako ogati; ka doŋ okwao iye winyo, onyinyilo, omio baŋ jo a lube kun kobo ni, “Gam icam wunu, man en koma.”

²⁷Otiŋo ikopo; ka doŋ opwoo, omiogi kun kobo ni, “Wun ducu mat wunu man;

²⁸pien man en remona me cikere, ame oony pi jo apol me gonyo bal.

²⁹Atittiwu ni, cakere amanni, mom dok abino mato pig olok, ituno i nino ca ka ate bino mato anyennere karacel kedwu i loc a Pappa.”

³⁰A doŋ gin otyeko wer, ote wot oko i wi kidi me Jeituni.

³¹Yecu te kobbigi ni, “Dyewor a tin wun ducu ibino wunu kwanyo genwu i koma oko; pien nwaŋ ocoo ni, ‘Abino neko akwat, rommi te ket ata.’

³²Ento ka doŋ ocera, abino telliwu yo me wot i Galilaya.”

³³Petero te kobbe ni, “Kadi bed jo ducu bino kwanyo gengi oko i komi, cite an mom abino kwanyo.”

³⁴Yecu te kobbe ni, “Ateni akobbi ni, tin, i dyewor man, a twon gweno pe ru okok, yin ibino kwera tyen adek.”

³⁵Petero te kobbe ni, “Kadi bed to, mom abino kweri.” Jo a lube ducu te kobo kite-nono.

³⁶A doŋ Yecu owoto kedgi i kabedo ame olwoŋo Gececemane, en te ciko jo a lube ni, “Bedu kan koŋ, pwod awot kwayo Obaŋa kano.”

³⁷En te tero Petero kede itino a Jebedayo aryo, eka te ero conne oko kede kumo adwoŋ.

³⁸Te kobbigi ni, “Waŋcuny atek amito neka oko. Bed wunu kan, ikiu piny karacel keda.”

³⁹Te wot i nyim anok, oryebere piny, te kwayo ni, “Pappa, ka twerre, wek ikopo man kat oko i baŋa: cite kur bed acalo an amito, ento acalo yin imito.”

⁴⁰Te dwogo baŋ jo mere a lube, onwoŋogi doŋonino oko, te kobbi Petero ni, “Kara mom itwero wunu kiyo piny keda pi caa acelloro?

⁴¹Kiu piny, kwa wunu Obaŋa, me kur idony wunu i abita a Catan. Cuny mito ta, ento kom nyap.”

⁴²Tedok wot tyen me aryo, te kwayo Obaŋa kun kobo ni, “Pappa, ka ikopo man mom twero kato ame pe ru amato, wek gin ame imito timere.”

⁴³Te dok dwogo, onwoŋo doŋ gin onino oko, pien onwoŋo nino onuro waŋgi.

⁴⁴Te dok wekogi, owoto okwao Obaŋa tyen me adek, kun kobo kite kop acellaca.

⁴⁵Ka otum, en te dwogo baŋ jo mere a lube, te penyogi ni, “Pwod inino wunu? Pwod iweo wunu bo? Nen, ca doŋ ceggi, Wot a dano otye a miye iciŋ obalo.

⁴⁶Ya wunu malo, owotu. Nen dano ame oketo erupe i koma doŋ ceggi.”

⁴⁷A pwod etye ekop, nen, Juda te pello, en dano acel i akina jo apar wie aryo-ca. En obino kede lwak jo apol ame oya ibaŋ olamdog adoŋo kede odoŋe me Ojudaya, kun gin tye kede pale me romo kede abiriŋ.

⁴⁸Dano ame oketo erupe i kome nwaŋ omiogi anyut, kun kobo ni, “Dano ame abino moto kun anoto leme, nwoŋo en ennono ikome; make wunu.”

⁴⁹Te onyakino baŋ Yecu, te mote ni, “Rabbi, itye?” Onoto leme.

⁵⁰Yecu te gamo ni, “Awotta, i bino piŋo?” Eka gin te bino poto i kom Yecu, ote make oko.

⁵¹Nen, dano moro acel ame tye baŋ Yecu oryeo ciŋe, owoto pala romo mere, te toŋo i yit opii alamdog adwoŋ, ŋolo oko.

⁵²Yecu te kobbe ni, “Dwok pala batti i akuro mere; pien jo ducu amako pala me romo obino tyekogi i pala me romo.

⁵³Onyo itamo ni mom atwero kwayo Pappa me mia omalaika ame kato eryoŋet apar wie aryo oko, i caa man?

⁵⁴Kara coc a yam ocoo bino cobere kakare niŋo, ni myero bed amannono?”

⁵⁵I kare-nono Yecu te kobbi lwak ni, “Ibino wunu i koma kede pale me romo kede abiriŋ, bala ibino wunu mako ayak? Nino luŋ nwaŋ abedo kedwu i ot Obaŋa kun apwonyo, mom imaka wunu.

⁵⁶Ento mano ducu otimere wek coc a yam ocoo cobere kakare.” I kare-nu jo a lube ducu oriŋo, ote weke oko.

⁵⁷Jo ame omako Yecu otere baŋ Kayapa, alamdog adwoŋ, kan ame opwony-cik kede odoŋe ocokere iye karacel.

⁵⁸Petero obedo lubo yore me icecen ituno naka i dyekal alamdog adwoŋ. Odonyo iye te bedo piny karacel kede otic me enen kit a bino gik kede.

⁵⁹Olamdog adoŋo kede okiko ducu te yenyo caden me kel kop goba i kom Yecu me oneke,

⁶⁰naka mom onwoŋo, kadi bed caden apol okelo kop me goba. Me agikki mere jo aryo te bino,

⁶¹kun okobo ni, “Dano man okobo ni, ‘Atwero ke to ot Obaŋa, eka ate dok gero i nino adek.’ ”

⁶²Alamdog adwoŋ te putte malo, te penye ni, “Mom idok iye kopporo? Man kop aŋo ame odoti kede-ni?”

⁶³Ento Yecu te liŋ gire aliŋa. Alamdog adwoŋ te dok kobbe ni, “Amito ikwoŋ i nyiŋ Obaŋa akwo, itittiwa ka yin i Kricito, Wot Obaŋa.”

⁶⁴Yecu te gamo ni, “Yin ikobo; ento akobbiwu ni cakere amanni ibino neno wunu Wot a dano ame obedo piny i kabedo me kwogo i laŋet Won Twer tuŋ cem, kun bino kede pol me polo.”

⁶⁵Alamdog adwoŋ te yeco boŋŋi mere kene kene kun kobo ni, “Oyeto Obaŋa; kara pwod omito wunu caden me no? Doŋ iwinyo wunu kite a en oyeto kede Obaŋa.

⁶⁶Itamo wunu nino iye?” Gin te dokke iye ni, “Ballere romo to.”

⁶⁷Gin ote pato lao i waŋe, ote doŋe: jo mogo obape kun okobo ni,

⁶⁸“Yin i Kricito, yin adwarpiny do, tucciwa! Kara ŋa ojwati?”

⁶⁹Petero onwoŋo tye oko, obedo piny i dyekal. Aŋeca moro te bino baŋe, te kobo ni, “Yin daŋ woki itye wun kede Yecu me Galilaya.”

⁷⁰Ento en okwero i nyimgi ducu kun kobo ni, “An mom aniaŋ gin ikobo.”

⁷¹En te kato i dog paco, aŋeca ocele te nene te kobbi jo a tye kuno ni, “Dano man woki tye gin i Yecu me Najaret.”

⁷²En dok te kwero oko kun kwoŋo akwoŋa, akobo ni, “An gira mom aŋeo dano-naca.”

⁷³Kare te kato anok, jo ame ocuŋ kuno te bino baŋe kun okobbe ni, “Ateni yin daŋ dano acel i akinagi, pien kite me koppi nyuti.”

⁷⁴En te dok kwoŋ kun lamere kene akobo ni, “An gira mom aŋeo dano-naca.” Cucuttono twon gweno te mwoco koko.

⁷⁵Petero te po i kop a rik Yecu okobbe, ni, “Ame pe ru twon gweno okok, ibino kwera tyen adek.” Okato oko, okok kun cunye waŋ meicel.