Read lango Matayo 4 Bible Online

Matayo 4 - lango bible

Matayo 4

¹Icennere Cuny Acil otero Yecu i tim me Catan bite.

²En ofi nino pyeraŋwen dyeceŋ kede dyewor kun kanyo kec, icennere kec te neke.

³Abit jo te pello, te kobbe ni, “Ka in i Wot Obaŋa, koŋ ikobbi gweŋe magi me lokere dok kwone.”

⁴En te dok iye ni, “Yam ocoo ni, ‘Dano mom bino bedo kwo ka i kwon keken, kono ka i kop ducu ame ya i dok Obaŋa!’ ”

⁵Catan dok te tere i boma acil, te cibe i wi atenni ot Obaŋa malo,

⁶te kobbe ni, “Ka yin Wot Obaŋa, koŋ iŋoye, irette piny, pien yam daŋ ocoo ni, ‘En bino ciko omalaika mere piri’, ‘Gin bino joli i ciŋgi, me kur itwom tyeni kede gweŋ.’ ”

⁷Yecu te gamo doge ni, “Yam daŋ ocoo ni, ‘Kur iom yi Rwot Obaŋani.’ ”

⁸Catan dok otere i amiddi kidi amalo meicel, te nyutte loc luŋ me wi podo, anaka kede kwogo a tye i yigi,

⁹te kobbe ni, “Magu ducu abino miyi, ka iryebere piny, iwora.”

¹⁰Yecu te gamo ni, “Jer teŋe, Catan, pien nwaŋ ocoo ni, ‘Wor Rwot Obaŋani, iti pi en keken.’ ”

¹¹Icennere Catan oweke, omalaika obino okonye.

¹²Yecu ka owinyo ni oketo Lakana i buc, en odok i Galilaya,

¹³te weko Najaret, te wot bedo i Kapernaum, ame tye i dog nam, i lobo Jabulon kede Naputali,

¹⁴wek kop a nwaŋ obino i dog adwarpiny Icaya cobere kakare, ni,

¹⁵“Lobo Jabulon kede lobo Naputali, tuŋ nam, loka Jordan, Galilaya me Orok.

¹⁶Rok a yam bedo i piny acol doŋ oneno lero adwoŋ, jo a yam bedo i lobo kede tipo me to, cen doŋ opello i komgi.”

¹⁷Cakere i kare-nono Yecu ogeo rabo kop kun kobo ni, “Ŋut wunu, pien loc me polo doŋ onoko ceggi.”

¹⁸Ka Yecu ceŋ tye a be bea i dog nam Galilaya, te neno omego aryo, Cimon ame olwoŋo Petero, kede Anderiya ominnere; otye ka ciko bwo iyi nam, pien ceŋ gin ocik rec.

¹⁹En te kobbigi ni, “Biye, iluba wunu, abino lokowu ocok jo akaka rec.”

²⁰Oyotoyot gin oweko bwoyigi, ote lube.

²¹Dok oya i kuno owoto anyim anonok, te neno jo aryo ocele ame gin omego, Yakobo wot a Jebedayo kede Lakana ominnere; otye i yee karacel kede papagi Jebedayo, oropo bwoyigi. En te lwoŋogi;

²²oyotoyot ote weko yee oko, anaka papagi, ote lube.

²³En owoto omano Galilaya luŋ, kun pwonyo i kacokeregi, dok rabo amut aber me loc Obaŋa, te caŋo too ducu kede goro luŋ i akina jo.

²⁴Rwoŋe olal i lobo Curia luŋ, ote kelo baŋe jo ducu ame komgi lit, kede jo a kwon too kede rem apapat wunogi, wegi cen areco, jo a two ekwikwiŋ, kede ame two too akwea kom; ocaŋogi.

²⁵Lwak jo ecipan olube ame oya i Galilaya, Dekapoli, Jerucalem, Judaya kede loka Jordan.