Read lango Matayo 5 Bible Online

Matayo 5 - lango bible

Matayo 5

¹Ka oneno lwak, en te yito oko i wi kidi. A doŋ en obedo piny, jo mere a lube te bino baŋe.

²En te ero kop, opwonyogi kun kobo ni.

³“Tye kede winyo, jo ame ocan i lonyo me cuny, pien loc me polo megi.

⁴“Tye kede winyo, jo ame kumo, pien obino kweyo cunygi.

⁵“Tye kede winyo, jo ame mwol, pien lobo bino doko megi.

⁶“Tye kede winyo, jo ame kec kede oryo makogi me bedo jo a kitegi atir, pien gin bino yeŋ.

⁷“Tye kede winyo, jo ame okica, pien obino timogi kica.

⁸“Tye kede winyo, jo ame yigi cil, pien gin bino neno Obaŋa.

⁹“Tye kede winyo, jo ame kelo kuc, pien obino lwoŋogi otino Obaŋa.

¹⁰“Tye kede winyo, jo ame owunogi pi bedo jo a kitegi atira, pien loc me polo megi.

¹¹“Itye wunu kede winyo ka jo ŋalowu, dok owunowu, ame gin kobo kop ducu areco i komwu gobagoba pira.

¹²Lel wunu kede yomcuny adwoŋ, pien mot me pwoyowu bup i wi polo, pien odwarpiny ame ogeo nyimwu daŋ owunogi kittono.

¹³“Wun kado me lobo; ento kado ka odoko abot oko, obino loko doko amit iŋo? Konnyere doŋ mom; myero oony oko me jo nyoni.

¹⁴“Wun ceŋ me lobo. Boma ame ogero i wi tur mom twero pono.

¹⁵Dok mom ocwinyo tara ote dok wumo oko kede gulu; ento oketo i wi akara, a mio te menyo jo ducu a tye i ot.

¹⁶Ceŋ mewu oryeny i nyim jo amannono, me gin nen ticwu abeco, ote miyo kwogo baŋ Papawu ame tye i polo.

¹⁷“Kur itam wunu ni abino me weyo cik kede kop odwarpiny; mom abino me weyogi, ento me cobogi acoba.

¹⁸Ateni akobbiwu ni, ituno ka polo kede lobo bino tum oko, tunnoro acel, onyo wen nukuta moro acel me cik mom bino rwenyo, ituno ka kop luŋ ocobere kakare.

¹⁹Doŋ ba, dano ame bino miyo cikkoro acel atidi doko legelege, kun pwonyo kede jo amannono, obino lwoŋe dano atidi i loc me polo; ento dano ame gwoko, kun pwonyo kede jo, obino lwoŋe dano adwoŋ i loc me polo.

²⁰Pien akobbiwu ni, ka wun mom kitewu atira akato opwony-cik kede Oparicayo, mom ibino donyo wunu i loc me polo.

²¹“Doŋ iwinyo wunu kop a rik okobbi jo acon ni, ‘Kur inek; ŋat ame neko nek myero ŋolle kop.’

²²Ento an okobbiwu ni, ŋat acel acel ame akemo omako i kom ominnere myero ŋolle kop: dano ame yeto ominnere ni, ‘Yin ababaŋ’ myero atera i nyim okiko, aco dano ame yeto ominnere ni, ‘Imiŋ’ myero abola i mac me Geena.

²³Pi mannono, ka ikelo motti meri i nyim keno me lam, eka ite po i kuno ni ominni tye kede kopporo i komi,

²⁴wek motti-nono koŋ doŋ kuno i nyim keno lam, yin idok cen, ige notte wun ominni, eka ite dok wot miyo motti me lam.

²⁵Mer oyotoyot wun kede dano a mito pidi, ame pwod itye wunu kede i yo, me dano a pidi-ni kur teri i nyim aŋolkop, aŋolkop te miyi baŋ cirikale teri i buc.

²⁶Ateni akobbi ni, mom ibino ya i kuno, ituno ka iculo ducu, ame cente moro mom orem.

²⁷“Dok iwinyo wunu kop a rik okobo ni, ‘Kur icod cot.’

²⁸Ento an akobbiwu ni, dano acel ame neno dannoro te gomo pire, doŋ otyeko code kede oko i cunye.

²⁹Ka waŋi tuŋ cem en amii ipoto i bal, kole oko, ibole kan abor: pien twara ka irwenyo dul me komi moro acel, kato ame kono obolo komi ducu alutu i Geena.

³⁰Ce ka ciŋi tuŋ cem en ame mii ipoto i bal, ŋole oko, ibole kan abor, twara ber ka irwenyo dul me komi moro acel, kato ame kono iwoto kede komi ducu alutu i Geena.

³¹“Dok yam daŋ okobo ni, ‘Dano moro ame ryemo dako mere, ber mie waraga me keto nyom.’

³²Ento an akobbiwu ni, dano acel acel ame ryemo cege, kono pi kop me coco keken, nwoŋo omie eeodo cot; dok dano ame nyomo dako ame cware oryemo, en daŋ ocodo cot.

³³“Dok daŋ yam iwinyo wunu kop a rik okobbi jo acon ni, ‘Kur ikwoŋ kwoŋ me goba, ento cob kwoŋŋi ducu baŋ Rwot.’

³⁴Ento an akobbiwu ni, kur ikwoŋ kwoŋoro, kede polo, pien en kom me loc Obaŋa,

³⁵onyo kadi kede lobo, pien en ka teno tyene, onyo kede Jerucalem, pien en boma Abaka adwoŋ.

³⁶Daŋ kur ikwoŋ kede wii, pien yin mom itwero loko yerroro te doko atar aŋar acol.

³⁷Ento kop mewu myero obed ‘Ee ta’ onyo ‘Pe’; pien ame kato mano oko ya i baŋ Arac.

³⁸“Doŋ iwinyo wunu kop a rik oko bo ni, ‘Waŋ oculo i wan, lak oculo i lak.’

³⁹Ento an akobbiwu ni, kur igeŋ dano dano arac; dano ame obapo lemi tuŋ cem, lokke tuŋ ocele daŋ obapi;

⁴⁰dano ame mito pidi me eter kanyi meri, jalle anaka kotini daŋ.

⁴¹Dano ame odii ni iwot wunu kede wot me mairo acel, luny wot kede mairo aryo.

⁴²Dano ame kwai, mie; dano ame mito koporo ginnoro me banya baŋi, kur itwonne.

⁴³“Dok iwinyo wunu kop a rik okobo ni, ‘Mar dano wadwu, idag akworri.’

⁴⁴Ento an akobbiwu ni, mar wunu okworwu, kwa wunu Obaŋa pi jo ame wunuwu,

⁴⁵me ite doko wunu itino a Papawu ame tye i polo. Pien en mio cennere donnyo baŋ areco kede o abeco daŋ, dok mio kottere cwe baŋ jo a kitegi atir, anaka baŋ jo a mom kitegi atir daŋ.

⁴⁶Pien ka imaro wunu jo a marowu, kara ibino nwoŋo wunu iye pwoccene? Ora-ocoro mom daŋ timo amannono?

⁴⁷Kara ka imoto wunu ka omegowu keken, ŋo aber ame doŋ itimo wunu akato jo ocele? Orok a pe ŋeo Obaŋa mom daŋ timo amannono?

⁴⁸Wun bed wunu jo ocwiny acalo Papawu a tye i polo daŋ ocwiny.