Read lango Matayo 8 Bible Online

Matayo 8 - lango bible

Matayo 8

¹A doŋ en oluŋere piny kun oya i wi kidi, lwak ecipan rik lube,

²cite nen adobo moro obino baŋe, orumo piny kun kobo ni, “Adwoŋ, ka imito, itwero lonya.”

³Yecu te ryeyo bade, te gude, kun kobo ni, “Ee, amito, lonyere giri.” Cucuttono dobo mere te lony oko.

⁴Yecu te cike ni, “Winy ba, kur ikob i dano moro, ento wot giri, inyutte keni baŋ alamdog, imi mot a yam Muca ociko, obed anyut bangi.”

⁵A doŋ Yecu odonyo i Kapernaum, adwoŋ me cirikale te bino baŋe, obako doge

⁶kun kobo ni, “Adwoŋ, amirona tye obuto piny i ot, too akwea kom omake, ocire atek meicel.”

⁷En te kobbe ni, “An awot caŋe.”

⁸Adwoŋ cirikale te gamo ni, “Adwoŋ, mom oporre yin idonyo i oda; twara ikobo ka kop keken, amirona bino can.

⁹An daŋ a dano ame oloo aloa, daŋ atye kede cirikale ame aloogi. Ka akobbi moro ni, ‘Woti’, en woto; onyo moro ocele ni, ‘Biye’, en bino; dok ka akobo opiina ni, ‘Ti man’, en tio.”

¹⁰Yecu ka owinyo kop man, owuro meicel, okobbi jo a lube ni, “Ateni akobbiwu ni, pe ru anwoŋo iyee a rom man, baŋ dano moro i Icrael.

¹¹Akobbiwu ni jo apol bino ya i tuŋ kide kede tuŋ to, gin bino bedo piny i dog cam karacel kede Iburaim, kede Icaka, kede Yakobo i loc me polo,

¹²ento otino me loc en ame dok obino bolo i colpiny a tye oko; kuno bino bedo iye koko kede kayo lak.”

¹³Eka Yecu te kobbi adwoŋ cirikale ni, “Wot giri, obed baŋi acalo iyeeni tye kede.” Amiro mere te caŋ oko i caanono ikome.

¹⁴Yecu odonyo i ot a Petero, te neno maro mere obuto, kun tye kede lyeto adwoŋ i kome.

¹⁵En omulo ciŋe, lyeto oket i kome, te ya malo, konyogi.

¹⁶Otyeno okelo baŋe wegi cen areco; en te ryemo cen ka i kop keken, te caŋo jo luŋ ame komgi lit,

¹⁷me kop a yam obino i dog adwarpiny Icaya cobere kakare, ni, “En otero gorowa, oyeo toowa.”

¹⁸Ka Yecu oneno lwak jo ecipan ogure dyere, en te kobo ni, “Owot wunu loka ca.”

¹⁹Apwony-cikkoro te bino kobbe ni, “Apwony, an abino lubi i kan ame ibino wot iye luŋ.”

²⁰Yecu odok iye ni, “Ekwe tye kede gorogorogi, winy daŋ tye kede udigi, ento wot a dano mom tye kan ame epyelo iye wie.”

²¹Dano ocele i akina jo mere alube okwae ni, “Rwot, koŋ iweka awot ayik pappa.”

²²Yecu te gamo ni, “Yin luba, wek jo oto yik jo oto wadgi.”

²³En odonyo i yee, jo mere a lube te wopo yore.

²⁴Cutocuto pii ocako twomere atek i dye nam, omio yee te mito lwiny oko i te pii; aco en onwoŋo onino oko.

²⁵Gin obino baŋe ote coye okobo ni, “Rwot, larwa; oto oko!”

²⁶En te kobbigi ni, “Kara piŋo ilwor wunu, wun jo ame iyeewu nok?” En te ya, te juko yamo kede nam, nam te liŋ mot.

²⁷Omio jo-nu owuro kun okobo ni, “Man kara kit dano aŋo ame yamo kede nam-gu winyonie?”

²⁸Ame en doŋ otuno loka ca, i lobo a jo Geraca, jo aryo ame wegi cen areco te rwatte kede, kun oya i tuŋ wi lyele, oger atek ateka, ame ŋattoro mom twero beo i yo nono.

²⁹Gin te redo ni, “Yin Wot Obaŋa, kara ilaro ŋo kedwa? Ibino me wunowa a kare mom ru oromo?”

³⁰Onwoŋo lwak puno ecipan tye a cem kan a bobor kedgi.

³¹Cen areco te bako doggi baŋe ni, “Ka iryemowa, cwawa i lwak puno.”

³²En te kobbigi ni, “Wot wunu.” Gin te ya pikere iyi punni; lwak puno luŋ obelle i nwec i kor kidi, ote poto i nam, ote mwonyere oko i pii.

³³Okwat te riŋo oko, otuno i boma, ote tito pi gin ducu ame otimere, anaka kede kop i kom jo a yam gin wegi cen areco.

³⁴Omio jo ducu oya i boma-nono, ociro me rwatte kede Yecu; ka onene, ote bako doggi ni myero ya oko i lobogi.