Read lango Marako 10 Bible Online

Marako 10 - lango bible

Marako 10

¹Yecu oya i kuno, te bino i lobo Judaya kede loka Jordan. Lwak dok ocokere baŋe, en opwonyogi doki, acalo kite mere me kare luŋ.

²Oparicayo obino baŋe, ote bite kun openye ni, “Cik ye ni ico ryem dako mere?”

³En ogamo doggi kun penyogi ni, “Kara Muca nwaŋ ocikowu niŋo?”

⁴Gin te gamo ni, “Muca yam oye ni ico myero co waraga me keto nyom, kede ryemo dako.”

⁵Cite Yecu okobbigi ni, “Pi nwaŋcunywu omio Muca ocoyiwu cikkono.

⁶Ento ya i ageyi keto lobo, ‘Obaŋa ocweogi co kede mon.

⁷En omio dano bino weko pappere kede tottere, te moko i kom dako mere,

⁸gin aryo ote doko kom acel.’ Kite-nono gin mom doŋ otye aryo, ento kom acel keken.

⁹Gin ame Obaŋa onoto karacel, dano kur ket akinagi.”

¹⁰Ame otye i ot, jo mere a lube dok openye pi koppono.

¹¹En te kobbigi ni, “Dano moro ame ryemo cege, eka te nyomo dako ocele nwoŋo ocodo cot, kun obalo i nyim cege ca.

¹²Anaka dako daŋ, ka oya i baŋ cware te nyomere kede lo ocele, nwoŋo ocodo cot.”

¹³Jo okelo itino baŋ Yecu, ni en mulgi. Jo a Lube te jukogi oko;

¹⁴cite Yecu ka oneno, yie owaŋ, te kobbigi ni, “Wek wunu itino bin baŋa, kur igeŋgi wunu; pien loc Obaŋa tye pi jo acalo gin.

¹⁵Ateni akobbiwu ni, dano a mom jolo loc Obaŋa acalo atin, mom bino donyo iye kadi atidi moro.”

¹⁶Otiŋogi i kore, omiogi winyo, kun keto ciŋe i komgi.

¹⁷Ame en doŋ oya otuno iyo, dano moro te riŋo, te rumo coŋe i nyime kun penye ni, “Apwony aber, atim ŋo me anwoŋ kwo a perakino odoco?”

¹⁸Yecu te penye ni, “Kara piŋo ilwoŋa ni aber? Dano moro aber mom tye, kono ka Obaŋa keken.

¹⁹Iŋeo cik, ‘Kur inek, Kur icod cot, Kur ikwal, Kur ikel kop goba i pido, Kur icer jo, Wor pappi kede totti.’ ”

²⁰En te gamo ni, “Apwony, magu ducu atyeko mako cakere i tinona.”

²¹Yecu onene, omare, te kobbe ni, “Ginnoro acel pwod orem i baŋi. Wot icaŋami luŋ ame itye kede, ite miyo baŋ ocan, eka ite bedo kede lonyo ame ikano i polo; yin doŋ ibin, iluba.”

²²Lonu ka owinyo kodi kop-pu, waŋe te cido oko, te wot oko a doŋ aconne acona, pien onwoŋo limmere rik dwoŋ.

²³Yecu oŋoloro waŋe te kobbi jo mere a lube ni, “Bino bedo tek meicel olonyo idonyo i loc Obaŋa!”

²⁴Jo a lube owuro koppere-nono atek, ento Yecu dok te kobbigi ni, “Itino, donyo i loc Obaŋa mom yot!

²⁵Twara donyo inaga i waŋ pico yot, kato alonyo idonyo i loc Obaŋa!”

²⁶Omio gin owuro atek meicel, ote penye ni, “Kara ŋa a dok twero larre?”

²⁷Yecu onenogi, te kobo ni, “Baŋ dano mom twerre, ento tuŋ baŋ Obaŋa twerre, pien jami ducu twerre baŋ Obaŋa.”

²⁸Petero te ero kobbe ni, “Aco wan oweko jami luŋ, olubi.”

²⁹Yecu te gamo ni, “Ateni akobbiwu ni, mom tye ŋattoro ame oweko ode, onyo omego, onyo amego, onyo tottere, onyo pappere, onyo potti mere, pira kede pi amut aber,

³⁰ame mom bino nwoŋo jami akato mano tyen mia i kare man, udi, omego, amego, toto, kede itino, kede potti, karacel kede awuna; kede i kare abino anyim bino nwoŋo kwo a perakino odoco.

³¹Ento jo apol ame obedo me agege bino doŋ cen, kede jo odoŋ cen bino bedo me agege.”

³²Ame gin tye iyo, a kun gin owot i Jerucalem, Yecu onwoŋo atelligi yo; gin owuro atek, jo a lube obedo kede lworo. En dok te tero jo mere apar wie aryo, te cako tittigi gin ame bino timere i kome,

³³kun kobo ni, “Nenu, wan doŋ otye okwaro tur me wot i Jerucalem. Wot a dano obino miye baŋ olamdog adoŋo kede opwony-cik, gin bino ŋolle kop me to, obino miye baŋ Orok.

³⁴Gin bino ŋale, obino pwode kede del, obino neke; cite ame nino adek doŋ okato, en bino cer oko.”

³⁵Yakobo kede Lakana, itino a Jebedayo, obino i nyim, Yecu, ote kobbe ni, “Apwony omito itimmiwa gin ame okwayi pire-ni.”

³⁶En openyogi ni, “Imito ni atimmiwu ŋo?”

³⁷Gin te gamo ni, “Yewa imi ŋat acel bed i laŋeti tuŋ cem, ŋat acel bed tuŋ cam, i kare me kwogoni.”

³⁸Ento Yecu okobbigi ni, “Wun mom iŋeo gin ame ikwao wunu. Itwero wunu mato i kopo me peko ame abino mato kede; onyo itwero wunu batija i kite ame abino batija kede?”

³⁹Gin ogamo ni, “Wan otwero.” Yecu okobbigi ni, “Kopo ame an abino mato iye, wun daŋ ibino mato wunu kede; dok kite ame an abino batija kede, wun daŋ ibino batija wunu kede;

⁴⁰ento bedo i laŋeta tuŋ cem onyo tuŋ cam an mom apoko. Bino bedo ka baŋ jo ame oyiko pirgi.”

⁴¹Ka jo ocele apar owinyo, igi ocako waŋ i kom Yakobo kede Lakana.

⁴²Yecu te lwonogi baŋe, okobbigi ni, “Wun iŋeo wunu ni, i baŋ Orok, jo ame olwoŋo ni olocgi bwoogi kede teko, dok odonegi nyuto twergi i komgi.

⁴³Ento mom myero bed amannono i akinawu; cite ŋattoro i akinawu ame mito bedo adwoŋ, myero bed aticwu;

⁴⁴dok ŋattoro ame amito bedo me agege i akinawu, myero bed opiiwu ducu.

⁴⁵Pien anaka Wot a dano mom obino me jo tiye, ento me en ti pi jo, dok ete miyo kwo mere me lakoro jo apol.”

⁴⁶Gin obino i Jeriko. Ame doŋ Yecu aya oko i Jeriko, karacel kede jo mere a lube kede lwak jo ecipan, atowaŋŋoro ame akwa lim, nyiŋe Bartimayo, wot a Timayo, onwoŋo kara obedo i ŋet yo.

⁴⁷Ka en owinyo ni Yecu me Najaret ennono, te ero lwoŋo kede dwon adit ni, “Yecu, Akwar Daudi, tima kica ba!”

⁴⁸Jo apol te juke ni, “Liŋ, lo-ni!” En omedo redo mere ameda ni, “Akwar Daudi, tima kica ba!”

⁴⁹Yecu Ocuŋ, okobo ni, “Lwoŋe wunu.” Gin te lwoŋo atowaŋ kun okobo ni, “Di cunyi, ya malo, en alwoŋi.”

⁵⁰En te bolo rukkere oko, oya malo, te ru yutte, bino baŋ Yecu.

⁵¹Yecu te penye ni, “Kara imito atimi ŋo?” Atowaŋ te gamo ni, “Rabbi, amito anen piny.”

⁵²Yecu te kobbe ni, “Wot giri, iyeeni ocaŋi.” Cucuttono te cako neno piny, te wapo yore.