Read lango Marako 11 Bible Online

Marako 11 - lango bible

Marako 11

¹Ame gin doŋ ceggi i tuno i Jerucalem, tuŋ Betepage kede Betania, i kor kidi me Jeituni, Yecu ooro jo aryo i akina jo a lube,

²ocikogi ni, “Wot wunu i paco i nyimwu ca. Ame doŋ idonyo wunu iye, oyotoyot ibino nwoŋo wunu atin kana, ame otweo, ame ŋattoro mom ru oyito i wie; gonyu, ikel wunu kan.

³Ka dano moro bino penyowu ni, ‘Ŋo omio itimo wunu amannono?’ dok wunu iye ni, ‘Adwoŋwa en ame amito; daŋ adwoggo en kan oko oyotoyot.’ ”

⁴Gin owoto, onwoŋo otweo atin kana i doggola oko i ŋet yo, ote gonyo.

⁵Jo mogo ame onwoŋo ocuŋ kuno te penyogi ni, “Kara itimo wunu ŋo omio igonyo wunu atin kana?”

⁶Gin te dok iye i kite ame Yecu okobbigi kede. Jo-nu te ye ni gin woti.

⁷Ote kelo atin kana baŋ Yecu, ote peto boŋŋigi i kome, en te bedo i wie.

⁸Jo apol opeto boŋŋigi i dye yo, jo mogo opeto boke ame ojako i potti.

⁹Jo ame otelo yo kede ame alube oredo ni, “Ojana, pak wunu Rwot! Gum myero bed i kom ŋat ame abino i nyiŋ Rwot!

¹⁰Gum myero bed i kom loc a kwarowa Daudi ame abino! Pake wunu malo i wi polo!”

¹¹En odonyo i Jerucalem, owoto i ot Obaŋa, te ŋiyo jami ducu, eka te dok oko i Betania karacel kede jo mere apar wie aryo, pien piny onwoŋo oyuto oko.

¹²Orwo mere ka gin oya i Betania, kec oneke.

¹³Te neno oduro i teŋe kun pote olot, owoto oneno ka kono ce etwero nwoŋo moro ame ocek iye. Ka otuno i tere, mom onwoŋo ginnoro, kono ka pote keken, pien mom ru kare me cekkere.

¹⁴Te kobo oduro ni, “Ŋattoro mom dok bino camo nyigi atwal.” Jo a lube owinyo.

¹⁵Ka gin otuno i Jerucalem, Yecu odonyo i ot Obaŋa, te cako ryemo jo ame cato wil kede owil jami i ot Obaŋa. Oreto meja a jo a loko cente, anaka gi-bedo a jo a cato amam;

¹⁶mom oye ni dano moro ŋol dye ot Obaŋa kede yec.

¹⁷Dok te ero pwonyogi kun kobo ni, “Rik mom ocoo ni, ‘Oda obino lwoŋo ni ot me kwac a rok luŋ?’ Ento wun iloko wunu odoko adu oyak.”

¹⁸Olamdog adoŋo kede opwony-cik owinyo koppere, ote yenyo yo me neke; pien onwoŋo gin lwore, pien lwak luŋ owuro pwonnyere.

¹⁹A doŋ piny oyuto, en te ya oko i Jerucalem.

²⁰Odiko ame onwoŋo gin beo iyo-nu, oneno oduro otal oko cakere i lwite.

²¹Petero opo iye, okobo ni, “Rabbi, neno oduro iceno-ni otal oko.”

²²Yecu te gamo ni, “Bed wunu kede iyee i kom Obaŋa.

²³Ateni akobbiwu ni, ŋat ame bino kobbi kidi man ni, ‘Mukere, irette i nam,’ a kun mom okalo akala i cunye, ento oye ni gin ame ekobo bino timere, daŋ bino timere.

²⁴Pi kop man akobbiwu ni, gin ducu ame ibino wunu penyo ame ikwayo wunu Obaŋa, myero iye wunu ni inwoŋo wunu oko, daŋ ibino wunu nwoŋo.

²⁵Dok daŋ kare ducu ame icuŋ wunu kun ikwao wunu Obaŋa, ka itye wunu kede kopporo i kom ŋattoro, time wunu kica, me wek Papawu a tye i polo daŋ timwu kica i kom balwu. [

²⁶Ento ka mom itimo wunu jo kica, Papawu ame tye i polo daŋ mom bino timowu kica i balwu.]”

²⁷Gin dok obino i Jerucalem. Ka onwoŋo en tye ka wowota i ot Obaŋa, olamdog adoŋo kede opwony-cik kede odoŋe obino baŋe.

²⁸Ote penye ni, “Twerrene omio itimo kit man? Daŋ ŋa omii twer man me timo?”

²⁹Yecu te kobbigi ni, “An koŋ abino penyowu pennyoro acel; wun koŋ idokka wunu iye, an daŋ ate bino tittiwu twer omio atimo kit man.

³⁰Batija a Lakana oya i baŋ Obaŋa aŋar onyo oya i baŋ dano? Dokka wunu iye.”

³¹Gin ote bedo pyem kengi kengi kun okobo ni, “Ka okobo ni, ‘Oya i baŋ Obaŋa’, en bino penyowa ni, ‘Kara piŋo dok mom iye wunu en?’

³²Ka okobo ni, ‘Oya i baŋ dano’, kono?” Gin olworo lwak, pien gin luŋ oŋeo ni Lakana en adwarpiny ateni.

³³Omio gin te dokki Yecu ni, “Wan okwia giwa.” Yecu daŋ te kobbigi ni, “An daŋ mom abino kobbiwu twer omio atimo kite man.”