Read lango Marako 12 Bible Online

Marako 12 - lango bible

Marako 12

¹Yecu te cako kop kedgi i carokop ni, “Nwaŋ tye dano moro ame opito poto olokkere, te guro oko kede cel, okunyo bur me jolo pige, te gero pem, te joko baŋ opur, eka te wot oko i lobo ocele.

²Ame kare doŋ oromo, en te cwayo amiro baŋ opur ni wot om dul ginnoro ocek i peto.

³Ento gin omake, ote pwode, oryeme, odok i ciŋe nono.

⁴En dok te medde oro amiro ocele; man daŋ ote goyo, tuco wie oko, omie lewic.

⁵Dok te oro dano ocele, man gin oneko oko. Gin obedo limo kite-nono i kom jo apol; jo ocele opwodo apwoda, jo mogo oneko aneka.

⁶Onwoŋo pwod odoŋ baŋe dano moro acel, en wode ame emaro. Me agikki mere ocwao en ikome baŋgi, kun kobo ni, ‘Gin bino woro woda.’

⁷Cite gin opur ote bedo kop kengi kengi ni, ‘Kom man en ale-lim; biye wunu, oneke oko, me lim eleyo-nono bed megwa’.

⁸Omake ote neke oko, ote bole teŋe i poto olok.

⁹Won poto olok bino timo ŋo? En bino bino, te neko opur-ru oko, te miyo poto olok baŋ jo apat.

¹⁰Rik mom ikwano wunu coc man a yam ocoo, ni, ‘Kidi ame ogedo okwero en ame odoko kidi me gwic ot;

¹¹man en tic a Rwot, en gin me awura baŋwa?’ ”

¹²Gin te temo make, ento ote lworo lwak oko, pien gin oniaŋ ni en okobo carokop man i komgi. Ote ya i baŋe wot gigi oko.

¹³Gin te oro Oparicayo kede jo a Kerode mogo baŋ Yecu, me gin mak kopporo a ya i doge.

¹⁴Gin obino te kobbe ni, “Apwony, wan oŋeo ni yin dano me ateni, dok mom iparo pi dano moro, pien mom ineno dano i oko, cite ipwonyo yo Obaŋa i ateni, Myero ogelli Kaicari ocoro onyo mom?

¹⁵Ogel onyo kur ogel?” Ento en te ŋeyo gobagi oko, te kobbigi ni “Kara ibita wunu pi ŋo? Koŋ ikella wunu ciliŋnoro, me anen.”

¹⁶A doŋ gin okelo, en te penyogi ni, “Cal kede coc ame ogoro iye-ni mea ŋa-nono?” Gin ogamo ni, “Mea Kaicari.”

¹⁷Yecu te kobbigi ni, “Dwok wunu baŋ Kaicari jami a Kaicari, jami Obaŋa dwok wunu baŋ Obaŋa.” Gin owure meicel.

¹⁸Ocadukayo mogo obino baŋ Yecu; jo-ni gin jo ame kobo ni jo oto pe cer. Gin okelo peny baŋe ni,

¹⁹“Apwony, Muca nwaŋ ocoo pirwa ni, ka omin a ŋattoro oto oko, oweko dako, ento mom oweko atinnoro, ominnere myero lak dako mere me nywal ominnere itino.

²⁰Aco, nwaŋ tye jo abiro ame gin omego. Dano me agege onyomo dako, te to kun mom oweko atinnoro;

²¹me aryo te lako dan-nu, te to kun mom oweko atinnoro; me adekkere daŋ amannono;

²²gin abiro luŋ mom oweko atinnoro, lcennere en dako daŋ te to oko.

²³Kara i kare me cer, dan-nu bino bedo cik a ŋa? Pien gin abiro luŋ obedo kede.”

²⁴Yecu okobbigi ni, “Wun mom irwenyo wunu pi mannono, pien ikwia wunu coc a yam ocoo, anaka teko Obaŋa daŋ ikwia wunu?

²⁵Pien ka jo doŋ ocer, jo mom bino nyomere, ento bino bedo bala omalaika ame i polo.

²⁶Ento ka i kom cero jo oto, wun mom ikwano wunu i buk a Muca, kop i kom yat obuŋere ame olyel, kite ame Obaŋa okobbe ni, ‘An Obaŋa Iburaim, kede Obaŋa Icaka, kede Obaŋa a Yakobo?’

²⁷En mom Obaŋa a jo oto, ento mea jo akwo; irwenyo wunu meicel.”

²⁸Apwony-cikkoro obino onoke a ceggi, owinyogi kun olaro kop. Ka owinyo kit ame Yecu odokkigi i kop aber kakare, en te penye ni, “I kom cik luŋ, mene ce ame obedo me agege?”

²⁹Yecu te gamo ni, “Me agege en ene, ni, ‘Winy ba Icrael, Rwot Obaŋawa en Rwot acel;

³⁰mar Rwot Obaŋani kede cunyi luŋ, kede tiponi luŋ, kede tammi luŋ, kede tekoni luŋ.’

³¹Me aryo mere en ene, ni, ‘Mar dano wadwu acalo imarre keni.’ Mom dok tye cikkoro ame pire dit kato magi.”

³²Apwony-cik te kobo ni, “Kakare, Apwony; ikobo giri kop ateni, ni, Obaŋa en acel, dok mom tye Obaŋa ocele, kono en keken.

³³Dok mare i cuny luŋ, i ryeko luŋ, kede maro dano wadwu acalo imarre keni, pire dit kato leyi ducu ame oŋolo, ame owaŋo alutu, kede kwon gin ame oŋolo ducu.”

³⁴Ka Yecu oneno ni en odok i koppere kede ryeko, te dok kobbe ni “Yin mom ibor kede loc Obaŋa.” Ŋattoro mom dok odio cunye me penye kopporo.

³⁵Ame Yecu tye apwony i ot Obaŋa, openyo ni, “Kara opwony-cik kobo niŋo ni, Kricito en akwar Daudi?

³⁶Aco kono Cuny Acil nwaŋ omio Daudi ikome okobo ni, ‘Rwot okobbi Rwotta ni, Bed i laŋeta tuŋ cem, i kabedo me kwogo, ituno ka abino keto okworri piny i te tyeni.’

³⁷Ka Daudi ikome olwoŋe ni Rwot, kara Kricito dok bedo akwarre niŋo?” Lwak ecipan owinyo koppere kede lelo.

³⁸Ka Yecu tye a pwony, okobo ni, “Gwokere wunu i kom opwony-cik ame maro wot a kun orukere kede boŋŋi abeco, ame mito daŋ ni jo motgi i cuk,

³⁹dok omaro bedo i kome me dito i kacokere, kede i kabedo me kwogo i dog cem.

⁴⁰Gin mao udi a mon a coggi oto, dok okwao Obaŋa nakanaka me gobagoba. Kop ame obino ŋolo i wigi bino bedo pek akato.”

⁴¹Yecu obedo piny kun otikere kede canduk me coko lim, te neno kite ame lwak abolo kede lim i canduk. Jo apol ame olonyo obolo adwoŋ.

⁴²Cite dako moro ame acan, ame cware oto, obino, te bolo cente aryo keken.

⁴³En te lwoŋo jo a lube baŋe, okobbigi ni, “Ateni akobbiwu ni, dako man a cware oto, ame acan, obolo adwoŋ ame kato jo luŋ ame obolo mot i canduk me coko lim;

⁴⁴pien gin ducu obolo mot ame ogito agita i kom limgi adwoŋ, cite en i kom cannere obolo gin ducu ame tye baŋe, ame konyo kwo mere.”