Read lango Marako 13 Bible Online

Marako 13 - lango bible

Marako 13

¹Ame en aya oko i ot Obaŋa, dano acel i akina jo a lube okobbe ni, “Apwony, nen kiddi magi me awura, kede gedo magi me awura!”

²Yecu te gamo doge ni, “Ineno gedo magi adoŋo wok-ki? Mom obino weko kidi moro kan ame ododde i wi wadgi, a mom obino coro piny.”

³Ame en doŋ obedo piny i wi kidi me Jeituni kun otikere kede ot Obaŋa, Petero kede Yakobo kede Lakana kede Anderiya openye i muŋ ni,

⁴“Tittiwa, man bino bedo awene ba? Dok gin aŋo ame bino nyuto ni ginnono ducu doŋ ceggi cobere kakare?”

⁵Yecu ocako kobbigi ni, “Gwokere wunu ba, ŋattoro kur rwenywu be.

⁶Pien jo apol bino bino i nyiŋa, ame obino kobo ni, ‘An ennono’; gin bino miyo jo apol rwenyo.

⁷Dok ka ibino winyo wunu pi mony, kede amut me mony, cunywu kur poti; mano myero timere, ento agikki nwoŋo pwod mom.

⁸Pien rok bino romo kede rok, loc bino romo kede loc ocele, oyeŋo bino bedo i kabedo apol, kec daŋ bino poto; mano ducu pwod en ageyi me rem.

⁹“Ento wun myero igwokere wunu ba; pien gin bino terowu i okiko, obino pwodowu i kacokere; ibino cuŋ wunu i nyim oloc kede i nyim rwode pira, me kobo kop me caden baŋgi.

¹⁰Dok amut aber myero koŋ rab baŋ rok ducu.

¹¹Ikare ame oterowu oko me kelowu i okiko, kur iru wunu bedo i tam apol, ni, ibino wunu kobo niŋo? Ento kob wunu kop ame obino miyowu i caanono; pien pe wun ame ibino wunu kop, ento Cuny Acil en a bino kop.

¹²Omego bino miyo omegogi me aneka, odoŋe bino miyo itinogi me aneka, otino bino twarre i kom onywalgi, miyo oneko onywalgi.

¹³Jo luŋ bino dagowu pi nyiŋa: ento ŋat ame kanyakino ituno i agikki, en bino larre.

¹⁴“Ento ka ineno wunu ginnoro me kwer ame balo cuny jo kun ocuŋ kan ame pe myero (dano ame kwano myero niaŋ iye), i kare-nono jo a tye i Judaya myero riŋ oko i wi kidi,

¹⁵dano ame tye i wi ot kur dok yitto piny, daŋ kur dony i ot, ni ebino kwanyo ginnoro a tye iye;

¹⁶kede dano ame tye i poto kur dok cen ni edok omo rukkere.

¹⁷Mon ayac bino neno can i kare-nono, kede mon ame doto itino!

¹⁸Kwa wunu Obaŋa wek ginnono kur timere i cwir.

¹⁹Pien i kare-nono bino bedo can adwoŋ, kit a yam pe ru onen, ya i ageyi keto lobo ame Obaŋa oketo, tuno naka tin, daŋ pe dok bino nen.

²⁰Kono Rwot mom ojwiko kare-nu, kono dano moro mom obwot; daŋ pi jo ame oyero, ame en oyerogi, omio Rwot ojwiko kare-nu oko.

²¹“I kare-naca ka dano moro bino kobbiwu ni, ‘Neno, Kricito tye kan-e, onyo ni, tye kaca’, kur iye wunu.

²²Jo ame kobo ni gin obedo Kricito bino pello, anaka odwarpiny ame ogoba, bino nyuto anyuttogo kede taŋo, me ka twerre gin orweny jo ame oyero.

²³Gwokere wunu ba; doŋ atyeko tittiwu kop ducu con.

²⁴“Ento i kare-nono, ame can adwoŋ otum oko, bino bedo acalo rik ocoo ni, ‘Ceŋ bino doko col, dwe mom bino ryeny,

²⁵acer luŋ bino ya i polo, ote rutte piny, teko ame i polo bino yeŋere’;

²⁶eka jo bino neno Wot a dano kun bino iyi pol, kun tye kede teko kede kwogo adwoŋ.

²⁷En bino oro amalaika, bino coko jo mere ame oyero, iya i twok piny aŋwen ducu, kun ya i agikki me lobo, tuno i agikki me polo.

²⁸“Mak wunu pwony ame oya i kom oduro: ka jaŋe onyinyiro, pote olot, iŋeo wunu ni oro doŋ ceggi.

²⁹Ammannono wun daŋ, ka ineno wunu ginnono atimere, ber iŋe wunu ni, en doŋ tye ceggi, tye i doggola.

³⁰Ateni akobbiwu ni, lwagi jo man mom bino tum, ame mannono luŋ mom ru otimere.

³¹Polo kede lobo bino tum oko, ento kop ame an apwonyo mom bino tum.

³²“Ento nino-nono, onyo caa-nono, ŋattoro a ŋeo pire mom tye, kadi omalaika ame tye i polo, kadi Wod, kono ka Papo keken.

³³Gwokere wunu, bed wunu ame ineno wunu, pien mom iŋeo wunu nino ame kare bino romo iye.

³⁴Rom aroma kede dano ame awot i weno; en ka aya i paco, mio twer baŋ omiro mere, ŋat acel acel kede ticcere, kun ciko agwok doggola ni, ki piny.

³⁵Kiu piny doŋ, pien mom iŋeo wunu ceŋ a won ot bino tuno iye, onyo otyeno, onyo cuny dyewor, onyo ka ibai, aŋar odiko;

³⁶me kur tuwu atua i waŋ nino.

³⁷Gin ame akobbiwu, akobbi jo luŋ ni, Kiu piny.”