Read lango Marako 14 Bible Online

Marako 14 - lango bible

Marako 14

¹Onwoŋo odoŋ nino aryo me tuno i ecuban me Kato kede me Ogati a Tobi Mom iye. Olamdog adoŋo kede opwony-cik oporo kop me mako Yecu kede ryeko, me ote neke.

²Pien gin okobo ni, “Pe i kare me ecuban, mio lwak bino tugere.”

³Ame en tye i Betania tuŋ a Cimon adobo, onwoŋo obedo i dog cem; dako moro te bino kun tye kede adomo me moo nard agili ame wellere dwoŋ. Oturo dog adomo, oonyo i wie.

⁴Jo mogo yigi owaŋ, ote kop kengi kengi ni, “Moo man obalo nono piŋo?

⁵Pien kono ocato moo man, kono okelo lim a kato ciliŋ mia adek, me amia baŋ ocan.” Cunygi owaŋ i kome atek.

⁶Yecu te kobo ni, “Weke wunu; kara icano wunu dan-ni piŋo? En otio tic aber i koma.

⁷Ocan itye wunu kedgi nino luŋ, itwero wunu konyogi i kare ducu ame imito wunu; ento an mom abino bedo kedwu nino ducu.

⁸En otio tic acalo etwero; ogeo onyo moo i koma me yika.

⁹Ateni akobbiwu ni, i wi podo luŋ kan ame obino tito iye amut aber-ri, obino kobo iye gin a dakoni otio, me poyo en.”

¹⁰Juda me Keriot, ame en dano acel i akina jo apar wie aryo ca, owoto baŋ olamdog adoŋo, me emi Yecu baŋgi

¹¹Gin ka owinyo, oyomoro yigi, ote cikere me miye lim; en daŋ te yenyo kare aber me miye baŋgi.

¹²I nino me agege me camo Ogati a Tobi Mom iye, a yam oŋolo iye atin romo me Kato, jo a lube openye ni, “Imito ni owot oyik tuŋ kwene me icam iye cam me Kato?”

¹³En te oro jo aryo i akina jo a lube kun cikogi ni, “Wot wunu i Jerucalem; lonnoro bino romere kedwu ame oyeo gulu pii; lube wunu.

¹⁴Kan a en bino donyo iye, kobbi wunu won ot ni, ‘Apwony okobo ni, Ane ot welo kan ame abino camo iye Kato, karacel kede jona a luba?’

¹⁵En bino nyuttiwu icika alac i malo ame opeto, ame oyiko; yikkiwa wunu kuno.”

¹⁶Jo mere a lube owoto, odonyo i Jerucalem, onwoŋo tye acalo en oporrigi, ote yiko cam me Kato.

¹⁷Ame piny doŋ oyuto, en obino, karacel kede jo mere apar wie aryo.

¹⁸A doŋ gin obedo piny, ame otye ka cem, Yecu te kobo ni, “Ateni akobbiwu ni, ŋat acel i akinawu bino keto erupe i koma, en ame acem karacel keda.”

¹⁹Eka gin te ero conne oko, kun dano acel acel penyere ni, “An ce?”

²⁰En te kobbigi ni, “En dano acel i akina wun apar wie aryo, ame agweyo keda i tabo acel.

²¹Pien Wot a dano awot gire i kite a yam ocoo i kome; ento dano a keto erupe i kom Wot a adanonu, kite ame ebino neno kede can! Onwoŋo kono obedo ber, dano-nu kono rik pe onywalo.”

²²Ame gin pwod acamo cem, Yecu omako ogati; ka doŋ okwao iye winyo, onyinyilo, omiogi kun kobo ni, “Gam wunu; man en koma.”

²³Otiŋo ikopo; ka doŋ opwoo, omiogi, gin ducu omato.

²⁴Okobbigi ni, “Man en remona me cikere, ame oony pi jo apol.

²⁵Ateni akobbiwu ni, mom dok abino mato pig olok, ituno i nino ca ka ate bino mato anyennere i loc Obaŋa.”

²⁶A doŋ gin otyeko wer, ote wot oko i wi kidi me Jeituni.

²⁷Yecu te kobbigi ni, “Wun ducu ibino wunu kwanyo genwu i koma oko; pien nwaŋ ocoo ni, ‘Abino neko akwat, rommi te ket oko ata,’

²⁸Ento ka doŋ ocera, abino telliwu yo me wot i Galilaya.”

²⁹Petero te kobbe ni, “Kadi bed jo ducu bino kwanyo gengi oko i komi, cite an mom abino kwanyo.”

³⁰Yecu te kobbe ni, “Ateni akobbi ni, tin, i dyewor man, a twon gweno pe ru okok iryo, yin giri ibino kwera tyen adek.”

³¹Ento en okobo atek meicel ni, “Kadi bed to, mom abino kweri.” Gin ducu okobo amannono.

³²Ote wot i kabedo a nyiŋe Gececemane, en te ciko jo a lube ni, “Bedu kan koŋ, an pwod akwayo Obaŋa.”

³³En te tero Petero kede Yakobo kede Lakana, cunye te ero poto meicel kede kumo adwoŋ.

³⁴Te kobbigi ni, “Waŋcuny atek amito neka oko. Bed wunu kan, ikiu piny.”

³⁵Te wot i nyim anok, oryebere piny, te kwayo ni, kono ka twerre, kodi caa-nono myero kat oko i baŋe.

³⁶Okobo ni, “Aba, Pappa, jami ducu i baŋi twerre; kwany ikopo man i koma oko; cite kur bed acalo an amito, ento acalo yin imito.”

³⁷Te dwogo onwoŋogi doŋ onino oko, te kobbi Petero ni, “Cimon, inino anina? Mom itwero kiyo piny keda pi caa acelloro?

³⁸Kiu piny, kwa wunu Obaŋa, me kur idony wunu i abita a Catan. Cuny mito ta, ento kom nyap.”

³⁹Te dok wot, te kwayo Obaŋa, kun kobo kop acellaca.

⁴⁰Dok te dwogo, onwoŋogi doŋ onino oko, pien onwoŋo nino onuro waŋgi meicel; yo me culle kop te loyogi oko.

⁴¹Te dwogo tyen me adekkere, openyogi ni, “Pwod inino wunu? Pwod iweo wunu bo? Doŋ otum. Caa doŋ oromo; Wot a dano otye a miye i ciŋ obalo.

⁴²Ya wunu malo; nen, dano ame keto erupe i koma doŋ tye ceggi.”

⁴³Cucuttono ame en pwod tye ka kop, Juda te pello, en dano acel i akina jo apar wie aryo ca. En obino kede lwak jo ame oya i baŋ olamdog adoŋo kede opwony-cik kede odoŋe, kun otye kede pale me romo kede abiriŋ.

⁴⁴Dano ame oketo erupe i kome nwaŋ omiogi anyut, kun kobo ni, “Dano ame abino moto kun anoto leme, nwoŋo en ennono ikome; make wunu, itere wunu kun igwoke wunu aber.”

⁴⁵Ka obino, te onyakino baŋe, te mote ni, “Rabbi”, omote kun noto leme.

⁴⁶Gin opoto i kome, ote make oko.

⁴⁷Ento dano moro acel ame ocuŋ i laŋete owoto pala romo mere, te toŋo kede opii alamdog adwoŋ, te ŋolo yite oko.

⁴⁸Yecu okobbigi ni, “Ibino wunu i koma kede pale me romo kede abiriŋ, bala ibino wunu mako ayak?

⁴⁹Nino luŋ nwaŋ abedo kedwu i ot Obaŋa kun apwonyo, mom imaka wunu. Ento wek coc a yam ocoo cobere kakare.”

⁵⁰Gin ducu oriŋo, ote weke oko.

⁵¹Awobi moro nwaŋ olube ame orwao ka cuka camanini i kome. Gin omake,

⁵²ento en oweko cuka odoŋ, oriŋo onoro.

⁵³Gin otero Yecu baŋ alamdog adwoŋ; onwoŋo alamdog adoŋo kede odoŋe kede opwony-cik ocokere ducu karacel.

⁵⁴Petero olubo yore me icecen ituno naka i dyekal alamdog adwoŋ; obedo piny karacel kede otic ka oyo mac.

⁵⁵Olamdog adoŋo kede okiko ducu te yenyo caden me kelo kop i kom Yecu me oneke, naka mom onwoŋo.

⁵⁶Pien ocaden apol okelo kop me goba i kome, kopgi mom orwatte.

⁵⁷Jo mogo oya malo ote kelo kop me goba i kome kun okobo ni,

⁵⁸“Wan owinyo kun kobo ni, ‘An abino keto ot Obaŋa-ni ame jo otio kede ciŋ, eka ate dok gero en ocele pi nino adek, a mom otio kede ciŋ.’ ”

⁵⁹Kadi bed amonnono, kop ame gin okelo mom orwatte.

⁶⁰Alamdog adwoŋ te putte malo, te cuŋ i dyere, te penyo Yecu ni, “Mom idok iye kopporo? Man kop aŋo ame odoti kede-ni?”

⁶¹Ento en oliŋ gire aliŋa, mom ogamo kopporo. Alamdog adwoŋ dok te penye kun kobo ni, “Yin i Kricito, Wot a ŋat ame opwoo?”

⁶²Yecu te gamo ni, “An a en; dok ibino neno wunu Wot a dano ame obedo piny i kabedo me kwogo i laŋet Won Twer tuŋ cem, kun bino kede pol me polo.”

⁶³Alamdog adwoŋ te yeco kanyi mere kene kene kun kobo ni, “Kara pwod omito caden me ŋo?

⁶⁴Doŋ iwinyo wunu kite a en oyeto kede Obaŋa. Itamo wunu niŋo iye?” Gin ducu oŋolo ni, ballere romo to.

⁶⁵Jo mogo te cako pato lao i kome; owumo waŋe oko, ote done kun okobo ni, “Yin adwarpiny do, tuci! Kara ŋa ojwati?” Otic daŋ te game kede adoŋ.

⁶⁶Petero onwoŋo tye piny i dyekal. Aŋeca moro mea alamdog adwoŋ te bino.

⁶⁷Ka oneno Petero kun aoyo mac, ogae kede waŋe kun kobo ni, “Yin daŋ woki itye wun kede dano ca me Najaret, Yecu.”

⁶⁸Ento en okwero oko, kun kobo ni, “Mom aŋeo dok mom aniaŋ i gin ame ikobo.” En te kato i dog paco, twon gweno te mwoco koko.

⁶⁹Aŋeca ca onene, te dok ero kobbi jo ame Ocuŋ kuno ni “Dano man ŋat acel i akinagi.”

⁷⁰En dok te kwero oko. Kare okato anok, jo ame ocuŋ kuno dok okobbi Petero ni, “Ateni, yin dano acel i akinagi, pien yin dano me Galilaya.”

⁷¹En te kwoŋ kun lamere kene, kobo ni, “An gira mom aŋeo dano man ame ikop wunu i kome-nono.”

⁷²Cucutto no twon gweno te mwoco koko tyen me aryo mere. Petero te po i kop a cen Yecu okobbe, ni, “Ame pe ru twon gweno okok iryo, ibino kwera tyen adek.” Eka te ero koko oko i pig waŋe.