Read lango Marako 15 Bible Online

Marako 15 - lango bible

Marako 15

¹Oyotoyot ka piny oru, olamdog adoŋo oporo kop karacel kede odoŋe kede opwony-cik kede okiko luŋ. Gin otweo Yecu, otere, ote miye baŋ Pilato.

²Pilato te penye ni, “Yin abaka Ojudaya?” Ogamo doge ni, “Yin ikobo giri.”

³Olamdog adoŋo odote kede kop apol.

⁴Pilato te penye ni, “Mom koŋ idok i kopporo? Nen kop apol ame odoti kede-ni.”

⁵Yecu mom omedde i gamo kopporo, omio Pilato owuro.

⁶I kare me ecuban, Pilato yam gonnyigi abuccoro acel a jo okwao pire.

⁷Onwoŋo cen tye lo moro i buc nyiŋe Baraba, ame otweo karacel kede jo otubo lwak; en onwoŋo oneko dano i tubere-nono.

⁸Eka lwak te bino, te cako kwayo Pilato ni timmigi acalo yam etio.

⁹Pilato te penyogi ni, “Imito wunu ni agonnyiwu abaka Ojudaya?”

¹⁰En onwoŋo oŋeo aber ni olamdog adoŋo omio Yecu baŋe pi nyeko.

¹¹Olamdog adoŋo te cupo lwak ni twara gonnyigi Baraba.

¹²Pilato dok te penyo lwak ni, “Kara dano ame ilwoŋo wunu ni abaka Ojudaya abino timo nadi?”

¹³Gin dok oredo ni, “Gure i kom yataria!”

¹⁴Pilato openyogi ni “Kara piŋo? Gin aŋo arac ame otimo?” Ento gin omedde i redo ni, “Gure i kom yataria!”

¹⁵Pilato omito ni ekwe cuny lwak, omio ogonnyigi Baraba. Opwodo Yecu kede del, te miye me agura i kom yataria.

¹⁶Cirikale otere iyi ot aloc, en Praitorion, ote lwoŋo eryoŋet megi ducu karacel.

¹⁷Oruke kede boŋo amaramar, ote kado tok kwogo abaka me okuto, orwako i wie,

¹⁸ote cako mote ni, “Oreme ba, Abaka Ojudaya!”

¹⁹Ojwato wie kede ogada, opato lao i kome, ote rumo coŋgi ni, me wore.

²⁰A doŋ otyeko ŋale, ote doŋ gonyo boŋo amaramar i kome oko, ote ruke kede boŋŋi mere ikome, ote tere wot gure i kom yataria.

²¹Gin te diyo dano moro ame onwoŋo akato akata i yo me ye yataria mere; onwoŋo abino kun oya i myere, nyiŋe Cimon me Kurene, papa Alegejanda gin kede Rupo.

²²Otero Yecu i kabedo ame olwoŋo Golgota, ame te koppere ni, kabedo me Cogo Wic.

²³Ote miye vino ame orubo iye yat murra; ento en pe omato.

²⁴Eka doŋ ote gure i kom yataria, daŋ ote poko boŋŋi mere oko i akinagi, kun obolo iye kwir me nwoŋo dano a bino tero ginnoro-ni.

²⁵Ame ogure i kom yataria, onwoŋo caa doŋ oromo adek.

²⁶I waraga ame nyuto kop ame opide pire ocoo ni, “Abaka Ojudaya.”

²⁷Ogure karacel kede oyakkogo, dano acel i laŋete tuŋ cem, acel tuŋ cam. [

²⁸Omio coc a yam ocoo ocobere kakare, ame kobo ni, “Okwane i kin obalo.”]

²⁹Jo ame nwaŋ abeo akato oyete, kun oyeŋo wigi, ame okobo ni, “Aaa! Yin ame iketo ot Obaŋa, ite gero i nino adek,

³⁰larre keni, iya i kom yat oko!”

³¹Anaka olamdog adoŋo daŋ oŋale amannono kengi kengi karacel kede opwonycik, kun okobo ni, “Yam laro jo ocele, mom twero larre kene.

³²Wek Kricito, Abaka Icrael, koŋ yitto piny, ya i kom yataria amanni, me wan onen ote ye.” Anaka jo ame ogure karacel kede daŋ ocae amannono.

³³A doŋ caa oromo abicel, piny te doko col i wi lobo luŋ, tuno anaka i caa aboŋwen.

³⁴Caa aboŋwen Yecu oredo kede dwon aloŋo ni, “Eloi, Eloi, lama cabaktani?” ame te koppere ni, “Obaŋana, Obaŋana, iweka piŋo?”

³⁵Jo mogo ame Ocuŋ kuno, ka gin owinyo, ote kobo ni, “Winy wunu, alwoŋo Elia.”

³⁶Dano acel oriŋo, oluto abwaŋarot i vino awac, orwako i wi tir, te miye ni jwi, kun kobo ni, “Weku koŋ onen ka Elia abino me kwanye oko i kom yat.”

³⁷Yecu oredo kede dwon aloŋo, te to oko.

³⁸Eka boŋo icika me ot Obaŋa te yec oko dul aryo, ocakere i malo, odwogo kede piny.

³⁹Adwoŋ me cirikale, ame onwoŋo ocuŋ kuno i nyime, ka oneno kit ame oto kede, te kobo ni, “Dano man kara atin Obaŋa ateni!”

⁴⁰Onwoŋo tye monnogo daŋ ame obedo ka nene i teŋe; i akinagi onwoŋo tye Maliam me Magdala, Maliam tota a Yucepu atidi kede Yoce, kede Calume.

⁴¹Ka yam en tye i Galilaya gin olube, dok okonye; dok daŋ tye mon ocele apol ame obino kede i Jerucalem.

⁴²Onwoŋo ceŋ nino me Yikere, en nino ame ceŋ me cabit Ojudaya lubo. A doŋ piny oyuto.

⁴³Yucepu me Arimataya te bino; en amemba me okiko ame opwoo, en daŋ ikome yam kuro loc Obaŋa. Odio cunye, odonyo baŋ Pilato, okwao kom Yecu.

⁴⁴Pilato owuro, ka ce en doŋ oto oko; olwoŋo adwoŋ me cirikale, openye ka onyo doŋ oto.

⁴⁵A doŋ oniaŋ pire i baŋ adwoŋ me cirikale, en te ye me miyo kome baŋe.

⁴⁶Yucepu te wilo cuka camanini, ogweto kome i kom yat, te boyo kede cuka camanini, te pyele iyi Iyel ame oboro abora i lela, oloro kidi, ogacakino i dog lyel.

⁴⁷Maliam me Magdala kede Maliam tota a Yoce gin oneno kan ame oyike iye.