Read lango Marako 16 Bible Online

Marako 16 - lango bible

Marako 16

¹Ame cabit Ojudaya doŋ otum, Maliam me Magdala kede Maliam tota a Yako bo kede Calume owilo gin a ŋwece kur me wot wire kede.

²Odiko con meicel i ni no ame lubo cabit, gin owoto i wi lyel, ame ceŋ doŋ odonyo oko.

³Ote penyere kengi ni, “Ŋa ce ame bino corriwa kidi oko i dog lyel?”

⁴Ka gin otiŋo waŋgi, oneno kidi doŋ ocoro oko, pien onwoŋo dwoŋ meicel.

⁵Ka gin odonyo i Iyel, ote neno awobi obedo i tuŋ cem, oruko boŋo atar; gin owuro atek.

⁶En te kobbigi ni, “Kur iwur wunu awura; iyenyo wunu Yecu me Najaret ame oguro i kom yataria. En doŋ ocer oko, mom tye kan; nen wunu kan ame yam opyele iye ene.

⁷Ento wot ikobbi wunu jo mere a lube, kede Petero, ni en otelliwu yo me wot i Galilaya; ibino nene wunu kuno, kite a yam otittiwu.”

⁸Gin te donnyo oko i Iyel, ote mako ŋwec, pien myelkom kede lworo adwoŋ doŋ ocirogi oko; naka daŋ mom ote kobbi ŋattoro kopporo, pien olworo. [

⁹Ame en doŋ ocer i nino ame lubo cabit, okwoŋo nen baŋ Maliam me Magdala, a nwaŋ eryemo cen abiro i kome.

¹⁰Daŋ en te tero koppere baŋ jo a yam bedo kede Yecu; onwoŋo gin tye akwero cola kun okoko.

¹¹Gin ka owinyo ni en tye kwo, dok ni Maliam onene, mom oye.

¹²Icennere te dok nen i kite apat baŋ jo aryo I akinagi, ame anwoŋo gin awot i akina pacci.

¹³Jo-nono daŋ owoŋo, otito baŋ jo odoŋ, gin mom ote ye gigi kopgi.

¹⁴Icennere te nen baŋ jo-nu apar wie acel ame gin tye i dog cem. En te da kedgi pien mom oye, kede pi nwaŋcunygi, pien okwero ye kop a jo ame onene a doŋ en ocer.

¹⁵En te kobbigi ni, “Wot wunu i wi podo luŋ, kun irabo wunu amut aber baŋ gin ame oketo ducu.

¹⁶Dano ame oye, te batija, en bino larre; dano a mom oye, kop bino loye.

¹⁷Gin a nyuto acalo magi bino nen baŋ jo a ye: gin bino ryemo cen kede nyiŋa, obino kop kede leb anyen,

¹⁸obino mako twol; ka gin bino mato gin a neko dano, pe bino timogi rac; gin bino keto ciŋgi i kom otwo, te caŋ oko.”

¹⁹A doŋ Rwot Yecu otyeko kop kedgi, otere malo i polo, eka en te bedo piny i kabedo me kwogo i laŋet Obaŋa tuŋ cem.

²⁰Jo-nu te ya me wot rabo kop i kabedo luŋ, kun Rwot bedo tic karacel kedgi, dok moko kop ame gin orabo kede ticcogo me awura ame timere.]