Read lango Marako 2 Bible Online

Marako 2 - lango bible

Marako 2

¹Ka nino okato anok, Yecu dok odwogo i Kapernaum, jo te winyo ni en tye paco.

²Ote cokere apol, omio kabedo te dokkigi adiŋ oko, anaka atot i doggola daŋ; en obedo ka rabo kop baŋgi.

³Jo moro te bino kun okelo baŋe dano ame two too me akwea kom, ame jo aŋwen odyelo.

⁴Ka yo me tere i nyim Yecu oloogi pi pol a lwak, gin te tuco wi ot kan a en tye iye; ka doŋ omuko, ote cwayo gi-buto ame atwo obuto iye.

⁵Yecu ka oneno iyeegi, te kop kede atwo ni, “Awobi, balli doŋ oweko oko.”

⁶Opwony-cikkogo ame onwoŋo obedo kuno opyem i cunygi kengi ni,

⁷“Dano man kobo aman piŋo? En ayeto Obaŋa! Ŋa ame twero weko bal, kono Obaŋa keken gire?”

⁸Piopio-nono Yecu te niaŋ oko i cunye ni gin otye ka tamo amannono i yigi, te penyogi ni, “Piŋo ipyem wunu i cunywu amannono?

⁹Kara ayottere mene, ka okobbi atwo ni, ‘Balli doŋ oweko oko’, onyo ni, ‘Ya, itiŋ gibutoni, iwoti?’

¹⁰Ento an amito iŋe wunu ni, Wot a dano tye kede twer i lobo me weko bal.” En te kobbi lo ame two too akwea kom ni,

¹¹“An akobbi ni, ya, itiŋ gi-butoni, iwot giri paco.”

¹²En oya, otiŋo gi-buto mere oyotoyot, odonyo oko kun kato i nyimgi ducu, omio gin luŋ owuro meicel, daŋ ote pako Obaŋa a kun okobo ni, “Anaka cene mom ru oneno gin acalo man.”

¹³Yecu dok te wot oko i dog nam me Galilaya; lwak ducu obino baŋe, en opwonyogi.

¹⁴Ka okato iyo, oneno Levi, wot a Alipayo ame obedo piny i ka rayo ocoro; okobbe ni, “Luba.” En oya, olube.

¹⁵Ame Yecu obedo piny i dog cem i ot a Levi, ora-ocoro apol anaka obalo obedo piny karacel kede Yecu kede jo a lube, pien onwoŋo kodi jo-nono apol tye a lube.

¹⁶Opwony cik ame i akina Oparicayo oneno ni en acem karacel kede obalo kede oraocoro, ote penyo jo a lube ni, “Kara piŋo en cemo karacel kede ora-ocoro anaka obalo-gu?”

¹⁷Ka Yecu owinyo, te kobbigi ni, “lo a komgi yot mom mito dakatal, kono ka jo a komgi lit. An mom abino me cwano jo a kitegi atira, ento obalo.”

¹⁸Jo a lubo Lakana kede jo a lubo Oparicayo onwoŋo otye ka kanyo kec; jo moro obino, te penyo Yecu ni, “Kara piŋo jo a lubo Lakana kede jo a lubo Oparicayo gin kanyo kec, aco jo a lubi mom kanyo kec?”

¹⁹Yecu te gamo doggi ni, “Owote a ŋat a nyom twero kanyo kec a kun en anyom tye baŋgi? Pi kare luŋ ame anyom tye baŋgi mom otwero kanyo kec.

²⁰Kare bino tuno ame obino kwanyo anyom oko i baŋgi, eka gin te kanyo kec i ninonono.

²¹Mom tye dano moro ame dapo dul boŋo anyen, ame pe ru olwoko, i kom en ame doŋ oti. Ka en otimo kite-nono, dul boŋo ame odapo kede-ni lunyo telo boŋe-nu, en anyen telo en aconni, waŋe te yec medde ameda.

²²Dok mom tye dano ame piko koŋo anyen i ocoe acon; ka ce opiko, koŋo anyen bino yeco ocoe, koŋo te balle oko kede ocoe daŋ; ento koŋo anyen mito ocoe anyen.”

²³Ka nwaŋ Yecu woto kun aŋolle i poto bel i nino me cabit, jo a lube oero rito wit bel kun owoto.

²⁴Oparicayo te penye ni, “Kara piŋo jo a lubi otimo gin ame cik okwero ni jo kur ti i ceŋ cabit?”

²⁵En te gamo doggi ni, “Wun ce mom ikwano wunu gin ame nwaŋ Daudi otio ka rik en tye arac, ame kec oneke, en kede jo a rik tye karacel kede?

²⁶Kite ame en odonyo kede i ot Obaŋa, i kare ame Abiatar obedo alamdog adwoŋ, te camo ogati ame oketo i nyim Obaŋa, a yam cik okwero ni dano moro kur cam, kono ka olamdog keken? En ocamo dok te miyo baŋ jo ame tye karacel kede.”

²⁷Te kobbigi ni, “Cabit tye gire pi dano, mom dano en a tye pi cabit.

²⁸Pi mannono, Wot a dano en rwot anaka me cabit.”