Read lango Marako 4 Bible Online

Marako 4 - lango bible

Marako 4

¹Yecu dok ocako pwony i dog nam. Lwak ecipan te cokere baŋe; pi mannono en te yito iyi yee; te bedo iye i nam, lwak luŋ te bedo i dog nam i wi tela.

²Opwonyogi kop apol i carokop. I pwonnyere okobbigi ni,

³“Winyu ba! Lo moro rik owoto ka coyo koti.

⁴Ame en doŋ tye ka coc, koti mogo te kir i dye yo, winy te bino depo oko.

⁵Mogo te kir kan obedo lela, ame lobo tye iye warawara. Cucuttono te tu, pien lobo mom tut;

⁶ento ka ceŋ oryeny ote two oko, pien lwitgi mom.

⁷Mogo te kir i akina okuto, okuto te lot diyogi oko, naka mom nyiggi te cek.

⁸Mogo te kir gigi i lobo aber, te tu, te jany, nyiggi te cek; mogo tyene acel acel ocek iye nyige pyeradek, mogo pyerabicel, mogo mia.”

⁹Icennere te kobbigi ni, “Ŋat a tye i yit me winyo, myero winy.”

¹⁰Ka onwoŋo Yecu tye kene, jo anwaŋ obedo kun ogure dyere karacel kede jo mere apar wie aryo openye pi carokop magu.

¹¹En te kobbigi ni, “Wun omiowu muŋ me loc Obaŋa, ento jo ca a tye oko, kop ducu omiogi i carokop,

¹²me bed acalo rik ocoo, ni, ‘Ka gin neno, onen cite kur onen aber, dok ka gin winyo, owiny, ento kur oniaŋ tere, kadi dwogo baŋ Obaŋa me wek balgi.’ ”

¹³En openyogi ni, “Wun ikwia wunu carokop-pi? Kara i carokop ducu ibino niaŋ wunu iye niŋo?

¹⁴Aco koti coo kop Obaŋa.

¹⁵Magi gin jo i dye yo kan ame ocoo iye koppere; ka gin owinyo, Catan bino oyotoyot, te kwanyo kop ame ocoo i yigi oko.

¹⁶Amannono magi gin ame ocoo kan obedo lela lela; gin ka owinyo kop, ote gamo cuto kede lelo,

¹⁷ento nwoŋo mom otye kede lwitgi i yigi. Ote ri ka anonokkoro; icennere tekki cannoro adwoŋ bino, onyo awuna, pi koppono, gin poto oko cucuttono.

¹⁸Ocele mere gin jo ame ocoo i okuto; gin jo ame winyo kop,

¹⁹ento par apol me lobo man; kede maro lonyo, kede mito jami ocele te donyo i cunygi, te diyo kop oko, mom nyak.

²⁰Ento maka ame ocoo i lobo aber ca, gin jo a winyo kop, ote jolo, te nyak mogo pyeradek, mogo pyerabicel, mogo mia.”

²¹Yecu te penyogi ni, “Tara okelo i ot me awuma oko kede wal bo, onyo me aketa i te itanda? Mom okelo wek ote keto malo wi gol?

²²Pien mom tye ginnoro ame okano, kono me wek nen kannaler; dok mom tye ginnoro ame owumo, kono me wek oyab kannaler.

²³Ka ŋattoro tye i yit me winyo, myero winy!”

²⁴Dok okobbigi ni, “Gwokere wunu i gin ame iwinyo wunu; kit gin ame iporo wunu iye, en ame daŋ obino porriwu kede, dok obino medo baŋwu.

²⁵Pien ŋat a mere tye, obino miye; ento ŋat a mere mom, obino gamo oko anaka gin a tye baŋe.”

²⁶Okobo ni, “Loc Obaŋa tye kite man, rom aroma kede ka dano ocoo koti i lobo;

²⁷en buto iwor, ya odiko, koti tu, doŋo, kun en kwia kite ame atimere kede.

²⁸Lobo kene en a mio koti cek; me agege koŋ tu, icennere nok, nyige te corre.

²⁹Ka kal doŋ ocek, dano-nu te cako kac oyot kede alwete, pien nwoŋo kare me kac doŋ oromo.”

³⁰Dok te kobo ni, “Obino poro loc Obaŋa kede gin aŋo? Onyo carokoppene ame obino nyuto kede?

³¹Rom aroma kede nyig dek karadali ame dano moro okwanyo, ame ka ocoo i lobo, en titino kato koti luŋ;

³²ento ka ocoo, doŋo doko adwoŋ a loo dek ducu, jaŋe pwodde adwoŋ, ame winyi a twarre malo twero gero udigi i tipo mere.”

³³Orabbigi koppere i carokop apol acalo mano, kite acalo gin twero niaŋ kede.

³⁴Mom okobo kedgi aboŋo carokop, ento ka en tye kede jo a lube kengi, en gonnyigi te kop ducu.

³⁵Otyeno me nino acel-lu Yecu te kobbigi ni, “Koŋ okat wunu loka tuŋ ca.”

³⁶Gin te weko lwak oko, ote tere kede yee ame onwoŋo en tye iye; yede ocele daŋ onwoŋo tye karacel kede.

³⁷Yamo adwoŋ te cako mor oko, pii te ero tagere, ocorre iyi yee, ame omio yee doŋ apoŋ oko.

³⁸En onwoŋo tye i ojwiny yee, onino gire oko i aten wic. Gin tecoye oko kun okobo ni, “Apwony, yin mom iparo en ame oto oko-ni?”

³⁹En te co oko, ojuko yamo kun kobo ni, “Kwe mot! Liŋ!” Yamo te kwe, nam daŋ te liŋ mot.

⁴⁰Openyogi ni, “Ŋo omio ilwor wunu aman? Iyeewu pe?”

⁴¹Gin obedo kede lworo adwoŋ, ote cako penyere kengi kengi ni, “Man kara ŋa, ame yamo kede nam-gu winye-nie?”