Read lango Marako 5 Bible Online

Marako 5 - lango bible

Marako 5

¹Gin otuno loka nam tuŋ ca i lobo a jo Geraca.

²Yecu ka otyeko ya i yee, dano moro won cen areco orwatte kede, kun oya i akina lyele.

³En bedo i ka Iyele, mom tye dano moro ame twero tweye kadi kede jegere;

⁴pien yam otwee tyen apol i nyony kede jegere, ento en codo jegere, turo nyony oko, ŋattoro pe ame twero loye.

⁵Nino ducu, dyewor kede iceŋŋere, en bedo gire i ka lyele kede i wi tur, rio koko, bedo ŋolo kome kene kede gweŋe.

⁶En ka oneno Yecu i teŋe, oriŋo, oryebere i nyime,

⁷te redo kede dwon aloŋo ni, “Yecu Wot Obaŋa Amalo Meicel, kara ilaro ŋo keda. Akwai i nyiŋ Obaŋa, kur iwuna.”

⁸Pien onwoŋo okobbe ni, “Ya oko i kom dano man, yin cen arac.”

⁹Yecu openye ni, “Yin nyiŋi ŋa?” Te gamo ni, “Nyiŋa Mony[1], pien wan opoŋ.”

¹⁰Obako doge baŋ Yecu atek ni kur ryemgi oko i lobo-nono.

¹¹Lwak puno ecipan onwoŋo tye ka cem i kor kidi kuno.

¹²Gin obako doggi kun okwao ni, “Cwawa i punni, me odony i yigi.”

¹³En oyegi. Cen areco te ya, pikere iyi punni; lwak puno ame mito romo tutumia aryo obelle i ŋwec i kor kidi, ote poto i nam, ote mwonyere oko iyi nam.

¹⁴Okwat te riŋo oko, tero koppere i boma kede i akina pacci, jo ociro me bino neno gin aŋo ame otimere-nu.

¹⁵Gin obino baŋ Yecu, ote neno won cen areco obedo kuno, orukere i boŋŋi, wie odoko aber, en a yam tye kede lwak cen areco; lworo omakogi.

¹⁶Jo ame oneno otito baŋgi gin ame otimere i kom won cen areco kede i kom punni.

¹⁷Gin ote bako doggi baŋ Yecu ni myero ya oko i Iobogi.

¹⁸A doŋ en ayito i yee, dano a rik tye kede cen areco-nu obako doge ni ber ebed doŋ baŋe.

¹⁹Ento en okwero oko kun kobbe ni, “Dok paco baŋ jo turu, itittigi gin adit ame Rwot otimo i komi, kede kite ame otimi kede ber-ri.”

²⁰En owoto, te cako rabo i Dekapoli gin adit ame Yecu otimo i kome; jo luŋ te wuro.

²¹Ame Yecu doŋ okato loka nam, odok tuŋ ca kede yee, lwak ecipan ocokere baŋe, ogure dyere; onwoŋo en tye i dog nam.

²²Lo moro obino ame en ŋat acel i akina odoŋe me kacokere, nyiŋe Yairo. Ka oneno Yecu, te ryebere piny i te tyene,

²³te bako doge baŋe atek ni, “Nyara atidi tye a doŋ ceggi to. Biye iket ciŋi i kome me caŋ oko, obed kwo.”

²⁴Owoto gin kede, lwak ecipan daŋ olube kun odie.

²⁵Onwoŋo tye dako moro a nwaŋ otwo too me kwer remo mwakki apar wie aryo.

²⁶En oneno can adwoŋ baŋ odakatal apol; limmere ducu oket oko, ento too omedde ka ameda.

²⁷Ka en owinyo kop ame jo kobo i kom Yecu, odonyo i akina lwak, te pello i tuŋ ŋec, ogudo boŋo mere.

²⁸Pien okobo ni, “Kom ka agudo kadi boŋo mere keken, abino caŋ oko.”

²⁹Cucuttono remo mere te cok oko, en oŋeo i kome ni doŋ ecaŋ oko i kom cannere.

³⁰Yotoyot Yecu owinyo i kome kene ni teko moro oya i kome; en olokere i dye lwak kun penyo ni, “Ŋa ogudo boŋŋina?”

³¹Jo a lube te gamo doge ni, “Ineno lwak adiyi, pwod dok ipenyo apenya ni, ‘Ŋa oguda-nie?’ ”

³²Yecu oŋoloro tuŋŋi i tuŋŋi me neno ŋat otimo man.

³³Dako-nono, ka oŋeo gin otimere i kome, obino kede lworo ame doŋ kome amyel amyela, te ryebere i nyime, otitte kop ducu me ateni.

³⁴Yecu te kobbe ni, “Nyara, iyeeni ocaŋi oko, wot giri i kuc, ame doŋ icaŋ oko atwal i kom canni.”

³⁵Ame en pwod tye ka kop, jo mogo obino ame oya i paco adwoŋ me kacokere, ote kobo ni, “Nyari doŋ oto oko; piŋo dok imedde cano apwony?”

³⁶Ento Yecu pe oketo cunye i kom kop ame gin okobo, te lunyo kobbi adwoŋ kacokere ni, “Kur ilwor; ye ayea keken.”

³⁷Doŋ pe te ye ni ŋattoro lube, kono ka Petero kede Yakobo, kede Lakana omin Yakobo.

³⁸Ka gin otuno i ot adwoŋ me kacokere, oneno lwak jo a wo kun oliakino i koko.

³⁹Ame en odonyo, openyogi ni, “Kara piŋo iwo wunu i koko? Atin-ni gire mom oto, onino anina.”

⁴⁰Gin onyere meicel, en te ryemogi ducu oko, te tero ka papa atin kede tottere kede jo ame onwoŋo tye baŋe, ote donyo kan ame opyelo iye atin.

⁴¹Te mako ciŋe kun kobbe ni, “Talita kum,” ame te koppere ni, “Nyako, akobbi, ya malo.”

⁴²Cucuttono nyako te ya malo, te ero wowota; pien onwoŋo doŋ tye kede mwaka me dittere a romo apar wie aryo. Gin owuro meicel.

⁴³Te cikogi atek ni kur ŋattoro ŋe kop-pi, dok te cikogi ni mi nya-nu cem.