Read lango Marako 6 Bible Online

Marako 6 - lango bible

Marako 6

¹Yecu oya oko i kuno, odwogo i lobo turgi; jo a lube owapo yore.

²I ceŋ me cabit en ocako pwony i kacokere. Jo apol ame owinye owuro, kun openyo ni, “Dano man onwoŋo gin man ducu i kwene? Man ryeko aŋo ame omie?” Kede dok ni, “Tic atek adoŋo a rom man ame en tye ka tiyo oya i kwene?

³Man mom apac, wot a Maliam, omin a Yakobo kede Yoce kede Juda kede Cimon? Anaka amego mere mom tye baŋwa kan?” Cunygi te ya oko i kome.

⁴Yecu te kobbigi ni, “Mom tye adwarpinnyoro ame mom oworo, kono ka i lobo me turgi, kede i akina doggola mere, kede i paco mere.”

⁵Tiyo ticcogo atek adoŋo kuno oloc, kono ka keto ciŋe i kom otwo mogo anok kede caŋogi.

⁶Owurogi atek pien iyeegi mom. Yecu owoto omano i akina myere kun pwonyo.

⁷Olwoŋo jo mere apar wie aryo baŋe, te cako orogi teŋe aryoaryo, omiogi twer i kom cen areco.

⁸Ocikogi atek ni kur gin owot kede ginnoro i wotgi-nono kono ka abiro keken. Owot aboŋo cem, aboŋo cao, aboŋo lim me arwaka i del pyergi;

⁹ento owot ame orwako war i tyengi, ame pe odoko kanyi aryo i komgi.

¹⁰Dok ocikogi ni, “Kan ame idonyo wunu iye i ottoro, bedu iye ituno ka ibino ya wunu i kuno.

¹¹Ka kabedo moro mom ojolowu, ame jo okwero winyo kopwu, ka iya wunu i kuno, teŋ wunu apua i tyenwu oko me bed caden baŋgi.”

¹²Gin owoto, orabo kop ni, jo myero oŋuti.

¹³Gin oryemo cen apol, owiro otwo apol kede moo, ocaŋogi.

¹⁴Abaka Kerode owinyo, pien nyiŋ Yecu onwoŋo orwo. Jo mogo kobo ni, “Lakana Abatija doŋ ocero oko i akina jo oto; en gin omio teko man tye ka tic i yie.”

¹⁵Ento jo ocele kobo ni, “Mano Elia gire.” Jo ocele ni, “En adwarpiny, bala ŋat acel i akina odwarpiny acon.”

¹⁶Ento Kerode ka owinyo, te kobo ni, “Lakana a nwaŋ aŋolo ŋuteni doŋ ocere oko.”

¹⁷Pien Kerode onwoŋo ooro jo, omako Lakana, te tweye i buc pi Kerodia, ci-ominnere Pilipo; pien onwoŋo en oloko odoko cege.

¹⁸Lakana nwaŋ okobbi Kerode ni, “Cik pe ye in ibed i ci-ominni.”

¹⁹Omio yi Kerodia owaŋ i kom Lakana, omito neke, ento mom otwerre,

²⁰pien Kerode onwoŋo lworo Lakana kun ŋeo ni en dano ame kite atira, dok dano acil daŋ, obedo ka gwoke oreme. Ka winyo kop a Lakana orabo, otwoo doge oko, ento winyo koppere pire obedo mit baŋe.

²¹Cite kare aber te romo i nino a nwaŋ Kerode oyiko iye arama me po pi nywalle, olwoŋo iye odoŋe me abumenti mere, kede odoŋe a telo wi lweny, kede odoŋe me Galilaya.

²²Nyaka a Kerodia odonyo i ot, omyelo, te yomoro cuny Kerode oko kede wele mere. Abaka te kobbi nyako ni, “Kwa gin ducu ame imito, abino miyi.”

²³Okwoŋo akwoŋa kun kobo ni, “Jami luŋ aluŋa ame ibino kwayo, abino miyi oko, anaka nucu me locca.”

²⁴Nyako te donyo oko, te penyo tottere ni, “An akwa ŋo?” Okobbe ni, “Wi Lakana Abatija.”

²⁵Nyako te ru bolle dok baŋ abaka kede mitkome, te kwaye ni, “Amito imia wi Lakana Abatija amanni, i weer-ri.”

²⁶Cuny abaka owaŋ meicel, cite pi kwoŋŋere i nyim wele mere, mom dok etwero twono nyan-nu.

²⁷Abaka te ru oro cirikale moro a gwoke kun cike ni, “Kel wi Lakana Abatija.” En te wot, te ŋolo ŋute i buc.

²⁸Okelo wie kede weer, te miyo baŋ nyan-nu, nyako te miyo baŋ tottere.

²⁹Ka jo a lubo Lakana owinyo kop man, gin obino otiŋo kome, oyiko oko.

³⁰Okwena odwogo baŋ Yecu, te titte kop i kom gin ducu ame gin otio, kede ame gin opwonyo.

³¹En te kobbigi ni, “Biye wunu kan a jo mom iye, me koŋ iwe wunu anok”, pien jo apol obino aluca luca, omio gin mom obedo kede kare anaka me cem.

³²Gin ote wot oko teŋe kede yee, gin kengi, kan a jo mom iye.

³³Jo apol oneno ka gin woto, oŋeogi oko. Gin daŋ oriŋo kuno kede tyengi kun oya i boma ducu, gin dok te geyo tuŋŋigi kuno.

³⁴Tekki Yecu ya i yee, ete neno lwak apipim; ocone meicel, pien ocalo rommi ame akwatgi mom; te cako pwonyogi i kop apol.

³⁵Ka kare me otyeno doŋ okato, jo mere a lube obino baŋe kun okobo ni, “Kan obedo i dye tim, caa daŋ doŋ okato oko.

³⁶Cwagi i akina pacci kede i akina myere ame ceggiceggi, me gin wil cem pirgi kengi.”

³⁷En te gamo ni, “Wun migi wunu cem.” Gin ote gamo ni “Owot owil ogati me ciliŋ mia aryo, me omigi ocam?”

³⁸En te penyogi ni, “Itye wunu kede ogati adi? Wot inenu koŋ.” Ka doŋ gin oŋeo, ote kobbe ni, “Abic, kede rec aryo.”

³⁹En te ciko ni jo ducu bed piny awu awu i Ium alyabu.

⁴⁰Gin obedo piny i eryoŋet apapat, mogo mia, mogo pyerabic.

⁴¹Omako ogati abic kede rece aryo-nu, oneno malo i polo, okwao iye winyo, onyinyilo ogati, omio baŋ jo a lube wek oket i nyim jo; dok opoko rece aryo-nu baŋgi ducu.

⁴²Gin ducu ocamo, oyeŋ.

⁴³Ocoko ŋide cem kede me rece, oromo aditti apar wie aryo ame opoŋ.

⁴⁴Jo ame ocamo ogati oromo co tutumia abic.

⁴⁵Cucuttono Yecu te ruyo jo mere a lube me donyo i yee, otel yo, okat loka tuŋ ca i Betecaida, en koŋ ecik lwak.

⁴⁶Ka doŋ otyeko cikogi, te yito i wi kidi ka kwayo Obaŋa.

⁴⁷A doŋ piny oyuto, onwoŋo yee tye i dye nam, en onwoŋo odoŋ kene i wi tela.

⁴⁸Oneno kwaŋo yee awunogi, pien yamo onwoŋo abino i tuŋ nyimgi. Dyewor i akina ame gwen akoko en te bino baŋgi kun awot i wi nam i tyene, te mito katogi akata.

⁴⁹Ento ka gin onene kun awot i wi nam i tyene, ote tamo ni gwok onyo cennoro, ote kuko duro oko;

⁵⁰pien gin ducu onene, tipo komgi oto oko. Yecu te kop kedgi oyotoyot ni, “Di cunywu, an ennono, kur ilwor wunu.”

⁵¹Te yito baŋgi i yee, yamo daŋ te kwe oko mot; omio doggi otwo meicel,

⁵²pien onwoŋo woki mom oniaŋ i te kop me ogati ca, pien cunygi pwod nwaŋ.

⁵³Ka doŋ gin odokoro loka, oyito i wi tela i Genecaret, ote tweyo yee kuno.

⁵⁴Ka doŋ oya oko i yee, lwak te ŋeyo Yecu oyotoyot.

⁵⁵Gin te ririŋa mano kabedo-nono ducu, kun ocako kela jo a komgi lit i gi-butogi kan ame gin owinyo ni tye iye ducu.

⁵⁶I kabedo ducu ame en bino iye, i akina myere, i boma ducu kede i akina pacci atino, gin pyelo otwo i cuk, obako doggi baŋe ni ogud ka ayayak me boŋo mere keken; jo ducu ame ogudo te caŋ oko.